ਸਮਾਲਸਰ, 28 ਜੂਨ (ਗੁਰਜੰਟ ਕਲਸੀ ਲੰਡੇ)-’ਮੈ ਸਿੱਖ ਧਰਮ ਦੀ ਮਰਯਾਦਾ ਦੀ ਬਹਾਲੀ ਅਤੇ ਸਿਰਸਾ ਸਾਧ ਦਾ 2007 ‘ਚੋ ਵਿਰੋਧ ਕੀਤਾ ਪਰ ਬਾਦਲ ਸਰਕਾਰ ਨੇ ਤੁਰੰਤ ਮੈਨੂੰ ਬਾਘਾ ਪੁਰਾਣੇ ਪੁਲਿਸ ਸਟੇਸ਼ਨ ‘ਚੋ ਵੱਖਵਾਦੀ ਘੋਸ਼ਿਤ ਕਰਵਾ ਦਿੱਤਾ। ਉਸੇ ਤਰਜ਼ ‘ਤੇ ਅੱਜ ਅਕਾਲ ਤਖਤ ਸਾਹਿਬ ਦੇ ਸਿਧਾਂਤ ਬਚਾਉਣ ਦੀ ਨਿਗੂਣੀ ਕੋਸ਼ਿਸ਼ ਕਰ ਰਿਹਾ ਹਾਂ। ਇਹ ਗੱਲ ਉੱਘੇ ਸਮਾਜ ਸੇਵਕ, ਵਾਤਾਵਰਨ ਪ੍ਰੇਮੀ ਅਤੇ ਸਿੱਖ ਚਿੰਤਕ ਚੰਦ ਸਿੰਘ ਵੈਰੋਕੇ ਨੇ ਪ੍ਰੈੱਸ ਨਾਲ ਗੱਲਬਾਤ ਦੌਰਾਨ ਕਹੀ। ਉਨ੍ਹਾਂ ਆਖਿਆ ਕਿ ਸਰਕਾਰਾਂ ਆਉਂਦੀਆਂ ਜਾਂਦੀਆਂ ਰਹਿੰਦੀਆਂ ਹਨ, ਪਰ ਅਕਾਲ ਤਖਤ ਸਥਿਰ ਹੈ। ਅੱਜ ਲੋੜ ਹੈ ਅਕਾਲ ਤਖਤ ਦੇ ਸਿਧਾਂਤ ਸਥਿਰ ਕਰਨ ਦੀ। ਮੈਂ ਅਕਾਲ ਤਖਤ ਦੇ ਜਥੇਦਾਰ ਦਾ ਨਾ ਵਿਰੋਧੀ ਹਾਂ ਤੇ ਨਾ ਹੀ ਹਮਾਇਤੀ। ਇਸੇ ਤਰਾਂ ਨਾ ਮੁਖ ਮੰਤਰੀ ਭਗਵੰਤ ਮਾਨ ਦਾ ਵਿਰੋਧੀ ਹਾਂ ਤੇ ਨਾ ਹੀ ਹਮਾਇਤੀ ਹਾਂ। ਮੈ ਅਕਾਲ ਤਖਤ ਸਾਹਿਬ ਅਤੇ ਭਗਵੰਤ ਮਾਨ ਸਰਕਾਰ ਦਾ ਟਕਰਾ ਖ਼ਤਮ ਕਰਾਉਣ ਤੇ ਅਕਾਲ ਤਖਤ ਸਾਹਿਬ ਦੀ ਮਰਯਾਦਾ ਬਹਾਲ ਕਰਾਉਣ ਲਈ ਆਪਣੇ ਆਪ ਦੀ ਕੁਰਬਾਨੀ ਦੇਣ ਲਈ ਤਿਆਰ ਹਾਂ।
