ਭਵਾਨੀਗੜ੍ਹ, 4 ਅਪ੍ਰੈਲ (ਰਣਧੀਰ ਸਿੰਘ ਫੱਗੂਵਾਲਾ)-ਹਰ ਰੋਜ਼ ਮੌਸਮ ਦੀ ਖ਼ਰਾਬੀ 'ਤੇ ਚੱਲਦਿਆਂ ਚਿੰਤਾ 'ਤੇ ਪਏ ਕਿਸਾਨਾਂ ਵੱਲੋਂ ਕਣਕ ਦੀ ਕਟਾਈ ਸ਼ੁਰੂ ਕਰ ਦਿੱਤੀ | ਪਿੰਡ ਨਾਗਰਾ ਵਿਖੇ ਕਣਕ ਦੀ ਕਟਾਈ ਹੱਥਾਂ ਨਾਲ ਕਰਦੇ ਕਿਸਾਨ ਦਰਬਾਰਾ ਸਿੰਘ, ਕੁਲਜੀਤ ਸਿੰਘ ਨਾਗਰਾ, ਜਸਪਾਲ ਸਿੰਘ ਘਰਾਚੋਂ ਨੇ ਦੱਸਿਆ ਕਿ ਹਰ ਦਿਨ ਮੌਸਮ ਖ਼ਰਾਬ ਹੋਣ ਅਤੇ ਰੋਜ਼ ਮੀਂਹ ਪੈਣ ਦੇ ਆਸਾਰਾਂ ਨੂੰ ਲੈ ਕੇ ਕਿਸਾਨਾਂ ਵਿਚ ਚਿੰਤਾ ਪਈ ਰਹਿੰਦੀ ਹੈ | ਉਨ੍ਹਾਂ ਦੱਸਿਆ ਕਿ ਅੱਜ ਅਸੀਂ ਕਣਕ ਦੀ ਵਾਢੀ ਹੱਥਾਂ ਨਾਲ ਇਸ ਲਈ ਕਰ ਰਹੇ ਹਾਂ ਤਾਂ ਕਿ ਕਣਕ ਕੱਟਣ ਸਮੇਂ ਜੇਕਰ ਕਣਕ ਕੋਈ ਸਿਲ ਰਹੀ ਤਾਂ ਕਣਕ ਕੱਢਣ ਤੋਂ ਪਹਿਲਾਂ ਕਣਕ ਸੁੱਕ ਜਾਵੇਗੀ | ਇਸ ਸਬੰਧੀ ਕਈ ਹੋਰ ਕਿਸਾਨਾਂ ਨਾਲ ਗੱਲ ਕਰਨ 'ਤੇ ਉਨ੍ਹਾਂ ਕਿਹਾ ਕਿ ਭਾਵੇਂ ਆਪਣੇ ਇਲਾਕੇ ਵਿਚ ਹਲਕੀ ਬਾਰਸ਼ ਹੋਣ ਕਾਰਨ ਕਣਕ ਦਾ ਕੋਈ ਨੁਕਸਾਨ ਨਹੀਂ ਹੋਇਆ, ਪਰ ਹਰ ਕਿਸਾਨ ਕਣਕ ਨੂੰ ਲੈ ਕੇ ਚਿੰਤਾ 'ਚ ਪੈਂਦਿਆਂ ਜਲਦੀ ਕਟਾਈ ਕਰਨ ਦੀ ਤਿਆਰੀ ਕਰ ਰਿਹਾ ਹੈ |
