ਜ਼ਿਲ੍ਹਾ ਮਲੇਰਕੋਟਲਾ ਦੇ ਪ੍ਰਮੁੱਖ ਸਿਆਸੀ ਨੇਤਾਵਾਂ ਵਲੋਂ 'ਹੋਰਡਿੰਗਾਂ' ਰਾਹੀਂ ਇੱਕ 'ਖ਼ਾਸ ਸੁਨੇਹਾ' ਦੇਣ ਦਾ ਯਤਨ <br/>

ਸਿਆਸੀ ਆਗੂਆਂ ਵਲੋਂ ਮੁੱਖ ਮਾਰਗਾਂ ਤੇ ਚੌਂਕਾਂ ਅੰਦਰ ਲਗਾਏ ' ਹੋਰਡਿੰਗਾਂ' ਦੀ ਤਸਵੀਰ | ਤਸਵੀਰ: ਮਨਜਿੰਦਰ ਸਿੰਘ ਸਰੌਦ <br/> 09-04-2026

ਮਲੇਰਕੋਟਲਾ, 8 ਅਪ੍ਰੈਲ (ਮਨਜਿੰਦਰ ਸਿੰਘ ਸਰੌਦ) - ਜ਼ਿਲ੍ਹਾ ਮਲੇਰਕੋਟਲਾ ਦੇ ਅੰਦਰ ਵੱਖ-ਵੱਖ ਸਿਆਸੀ ਜਮਾਤਾਂ ਨਾਲ ਸੰਬੰਧਿਤ ਪ੍ਰਮੁੱਖ ਆਗੂਆਂ ਵੱਲੋਂ ਆਪਣੀ 'ਵੱਖਰੀ ਹੋਂਦ' ਦਾ ਪ੍ਰਗਟਾਵਾ ਕਰਨ ਦੇ ਲਈ ਆਪੋ-ਆਪਣੇ ਹਲਕਿਆਂ ਅੰਦਰ ਹੋਰਡਿੰਗ ਲਗਾਉਣ ਦਾ ਰੁਝਾਨ ਮੌਜੂਦਾ ਸਮੇਂ ਚਰਮ ਸੀਮਾ 'ਤੇ ਪਹੁੰਚ ਚੁੱਕਿਆ ਹੈ | ਜੇਕਰ ਜ਼ਿਲੇ੍ਹ ਦੇ ਵਿਧਾਨ ਸਭਾ ਹਲਕਾ ਅਮਰਗੜ੍ਹ ਦੀ ਗੱਲ ਕਰੀਏ ਤਾਂ ਸੱਤਾਧਾਰੀ ਧਿਰ ਨੂੰ ਪਾਸੇ ਰੱਖ ਕੇ ਇੱਥੇ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਮੁੱਖ ਆਗੂ ਵਜੋਂ ਵਿਚਰ ਰਹੇ ਨੌਜਵਾਨ ਜਸਵੀਰ ਸਿੰਘ ਜੱਸੀ ਮੰਨਵੀ ਨੇ ਪਾਰਟੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਨਾਲ ਆਪਣੇ ਆਦਮਕੱਦ ਹੋਰਡਿੰਗ ਲਗਾ ਕੇ ਹਲਕਾ ਵਾਸੀਆਂ ਨੂੰ ਇੱਕ 'ਖ਼ਾਸ ਸੁਨੇਹਾ' ਦੇਣ ਦਾ ਯਤਨ ਕੀਤਾ ਹੈ | ਕਾਂਗਰਸ ਪਾਰਟੀ ਵੱਲੋਂ ਸਾਬਕਾ ਵਿਧਾਇਕ ਜਸਬੀਰ ਸਿੰਘ ਜੱਸੀ ਖੰਗੂੜਾ ਤੇ ਬੀਬੀ ਅਮਨਦੀਪ ਕੌਰ ਖੰਗੂੜਾ ਤੋਂ ਇਲਾਵਾ ਪਿਛਲੇ ਡੇਢ ਦਹਾਕੇ ਤੋਂ ਹਲਕਾ ਅਮਰਗੜ੍ਹ ਦੀਆਂ ਰਾਜਨੀਤਕ ਸਫ਼ਾਂ ਵਿੱਚ ਵਿਚਰ ਰਹੇ ਕਾਂਗਰਸ ਪਾਰਟੀ ਦੇ ਸੀਨੀਅਰ ਨੌਜਵਾਨ ਆਗੂ ਗੁਰਜੋਤ ਸਿੰਘ ਢੀਂਡਸਾ ਵੱਲੋਂ ਪਾਰਟੀ ਦੀ ਚੋਟੀ ਦੀ ਲੀਡਰਸ਼ਿਪ ਦੇ ਨਾਲ ਆਦਮਕੱਦ ਹੋਰਡਿੰਗਾਂ ਰਾਹੀਂ ਆਪਣੀ ਵੱਖਰੀ ਪਛਾਣ ਦਾ ਪ੍ਰਗਟਾਵਾ ਕਰਨ ਵਾਲੇ ਯਤਨ ਨਜ਼ਰੀ ਪੈਂਦੇ ਹਨ | ਇਸ ਤੋਂ ਇਲਾਵਾ ਬੀਤੇ ਸਮੇਂ ਹਲਕਾ ਅਮਰਗੜ੍ਹ ਤੋਂ ਕਾਂਗਰਸ ਦੇ ਸੀਨੀਅਰ ਆਗੂ ਸਮਿੱਤ ਸਿੰਘ ਮਾਨ ਨੇ ਵੀ ਹੋਰਡਿੰਗਾਂ ਰਾਹੀਂ ਆਪਣਾ ਸੁਨੇਹਾ ਹਲਕੇ ਦੇ ਲੋਕਾਂ ਤੱਕ ਪਹੁੰਚਾਉਣ ਦਾ ਯਤਨ ਕੀਤਾ ਹੈ | ਬੀਤੇ ਦਿਨੀਂ ਸ਼੍ਰੋਮਣੀ ਅਕਾਲੀ ਦਲ ਵਾਰਿਸ ਪੰਜਾਬ ਦੇ 'ਚ ਸ਼ਾਮਿਲ ਹੋਏ ਚੜ੍ਹਦੀ ਉਮਰ ਦੇ ਨੌਜਵਾਨ ਆਗੂ ਸਰਪੰਚ ਗੁਰਸ਼ਰਨ ਸਿੰਘ ਸਰਨਾ ਚੱਠਾ ਦੇ ਵੱਡ-ਆਕਾਰੀ ਹੋਰਡਿੰਗ ਵੀ ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ | ਜ਼ਿਲ੍ਹਾ ਮਲੇਰਕੋਟਲਾ ਦੇ ਇਨ੍ਹਾਂ ਪ੍ਰਮੁੱਖ ਆਗੂਆਂ ਤੋਂ ਇਲਾਵਾ ਕਈ ਅਜਿਹੇ ਦੂਸਰੀ ਕਤਾਰ ਦੇ ਆਗੂ ਵੀ ਮੌਜੂਦ ਹਨ ਜਿਨ੍ਹਾਂ ਵੱਲੋਂ ਆਪਣੇ ਹੋਰਡਿੰਗ ਮੁੱਖ ਮਾਰਗਾਂ, ਚੌਂਕਾਂ, ਚੌਰਾਹਿਆਂ ਦੇ ਵਿੱਚ ਲਗਾ ਕੇ ਆਪਣੀ ਪਛਾਣ ਦਰਸਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ | ਜ਼ਿਲ੍ਹੇ ਦੇ ਮੁੱਖ ਮਾਰਗਾਂ ਤੋਂ ਇਲਾਵਾ ਮੇਨ ਚੌਂਕਾਂ ਅੰਦਰ ਸਿਆਸੀ ਆਗੂਆਂ ਦੇ ਹੋਰਡਿੰਗਾਂ ਦੀ ਭਰਮਾਰ ਅਕਸਰ ਵੇਖੀ ਜਾ ਸਕਦੀ ਹੈ | ਸਿਆਸੀ ਮਾਹਿਰਾਂ ਅਨੁਸਾਰ ਇਨ੍ਹਾਂ ਸਾਰੇ ਆਗੂਆਂ ਵੱਲੋਂ ਆਪੋ-ਆਪਣੇ ਹਲਕੇ ਦੇ ਲੋਕਾਂ ਤੱਕ ਇੱਕ 'ਖ਼ਾਸ ਸੁਨੇਹਾ' ਦੇਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਕਿ ਹਲਕੇ ਅੰਦਰ ਪ੍ਰਮੁੱਖ ਕੌਣ ਹੈ | ਭਾਵੇਂ ਪ੍ਰਮੁੱਖ ਹੋਣ ਦਾ ਫੈਸਲਾ ਤਾਂ ਪਾਰਟੀ ਹਾਈਕਮਾਂਡ ਨੇ ਆਉਂਦੇ ਦਿਨਾਂ ਨੂੰ ਕਰਨਾ ਹੈ ਪਰ ਕੁੱਲ ਮਿਲਾ ਕੇ ਹੋਰਡਿੰਗਾਂ ਰਾਹੀਂ ਇਨ੍ਹਾਂ ਸਿਆਸੀ ਆਗੂਆਂ ਵੱਲੋਂ ਆਪਣੀ ਹੋਂਦ ਦਾ ਕੀਤਾ ਜਾ ਰਿਹਾ ਪ੍ਰਗਟਾਵਾ ਆਮ ਲੋਕਾਂ ਦੇ ਅੰਦਰ ਇੱਕ 'ਖ਼ਾਸ ਚਰਚਾ' ਦਾ ਵਿਸ਼ਾ ਬਣ ਚੁੱਕਿਆ ਹੈ | ਦੂਜੇ ਪਾਸੇ ਸਤਵੀਰ ਸਿੰਘ ਸੀਰਾ ਬਨਭੌਰਾ ਵਰਗੇ ਕੁਝ ਦਿਗਜ਼ ਆਗੂ ਅਜਿਹੇ ਵੀ ਹਨ ਜਿਨ੍ਹਾਂ ਨੇ ਬਿਨਾਂ ਹੋਰਡਿੰਗ ਤੋਂ ਆਪਣੀ ਕਿਸ਼ਤੀ 'ਸਿਆਸੀ ਸਮੁੰਦਰ' ਦੇ ਵਿੱਚ ਠੇਲ੍ਹੀ ਹੋਈ ਹੈ | ਕਈ ਵਾਰ ਤਾਂ ਇਨ੍ਹਾਂ ਸਿਆਸੀ ਨੇਤਾਵਾਂ ਵੱਲੋਂ ਲਗਾਏ ਜਾ ਰਹੇ ਹੋਰਡਿੰਗਾਂ ਨੂੰ ਵੇਖ ਕੇ ਇੰਝ ਪ੍ਰਤੀਤ ਹੁੰਦਾ ਹੈ ਜਿਵੇਂ ਵਿਧਾਨ ਸਭਾ ਦੀ ਚੋਣ ਹੋ ਰਹੀ ਹੋਵੇ | ਕੁੱਲ ਮਿਲਾ ਕੇ ਜ਼ਿਲ੍ਹਾ ਮਲੇਰਕੋਟਲਾ ਦਾ 'ਸਿਆਸੀ ਰਣਖੇਤਰ' 'ਤੱਤਾ' ਜ਼ਰੂਰ ਹੋਣ ਲੱਗਿਆ ਹੈ |

ਜ਼ਿਲ੍ਹਾ ਮਲੇਰਕੋਟਲਾ ਦੇ ਪ੍ਰਮੁੱਖ ਸਿਆਸੀ ਨੇਤਾਵਾਂ ਵਲੋਂ 'ਹੋਰਡਿੰਗਾਂ' ਰਾਹੀਂ ਇੱਕ 'ਖ਼ਾਸ ਸੁਨੇਹਾ' ਦੇਣ ਦਾ ਯਤਨ <br/>

ਸੰਬੰਧਿਤ ਖ਼ਬਰਾਂ