ਲੌਂਗੋਵਾਲ, 27 ਮਈ, (ਵਿਨੋਦ, ਖੰਨਾ) - ਸੰਤ ਲੌਂਗੋਵਾਲ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ (ਸਲਾਈਟ) ਲੌਂਗੋਵਾਲ ਦੇ ਮਕੈਨੀਕਲ ਇੰਜੀਨੀਅਰਿੰਗ ਵਿਭਾਗ ਵਿਖੇ ਮਕੈਨੀਕਲ ਇੰਜੀਨੀਅਰਿੰਗ ਵਿੱਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੇ ਉਪਯੋਗ ਭਵਿੱਖ ਦੇ ਸਾਧਨ ਵਿਸ਼ੇ 'ਤੇ ਪੰਜ ਦਿਨਾਂ ਫੈਕਲਟੀ ਵਿਕਾਸ ਪ੍ਰੋਗਰਾਮ ਕਰਵਾਇਆ ਗਿਆ | ਇਸ ਪ੍ਰੋਗਰਾਮ ਦਾ ਉਦੇਸ਼ ਅਕਾਦਮਿਕ, ਖੋਜਕਰਤਾ, ਉਦਯੋਗ ਪੇਸ਼ਾਵਰਾਂ ਅਤੇ ਵਿਦਿਆਰਥੀਆਂ ਨੂੰ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਅਤੇ ਮਕੈਨੀਕਲ ਇੰਜੀਨੀਅਰਿੰਗ ਵਿੱਚ ਇਸ ਦੇ ਉਦਯੋਗਾਂ ਦੇ ਖੇਤਰ ਵਿੱਚ ਉੱਭਰ ਰਹੇ ਗਿਆਨ ਅਤੇ ਪੈ੍ਰਕਟੀਕਲ ਅਨੁਭਵ ਪ੍ਰਦਾਨ ਕਰਨਾ ਸੀ | ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ 80 ਤੋਂ ਵੱਧ ਭਾਗੀਦਾਰਾਂ ਨੇ ਇਸ ਪ੍ਰੋਗਰਾਮ ਵਿਚ ਹਿੱਸਾ ਲਿਆ | ਇਹ ਪ੍ਰੋਗਰਾਮ ਉੱਨਤ ਏ.ਆਈ. ਟੂਲਸ, ਸਮਾਰਟ ਨਿਰਮਾਣ, ਆਟੋਮੇਸ਼ਨ, ਡੇਟਾ-ਸੰਚਾਲਿਤ ਇੰਜੀਨੀਅਰਿੰਗ ਹੱਲ, ਮਸ਼ੀਨ ਲਰਨਿੰਗ ਐਪਲੀਕੇਸ਼ਨਾਂ, ਉਦਯੋਗਾਂ ਵਿੱਚ ਡਿਜੀਟਲ ਪਰਿਵਰਤਨ, ਅਤੇ ਭਵਿੱਖ ਦੇ ਤਕਨੀਕੀ ਰੁਝਾਨਾਂ 'ਤੇ ਕੇਂਦਰਿਤ ਰਿਹਾ | ਇਸ ਪ੍ਰੋਗਰਾਮ ਦੇ ਅੰਤਿਮ ਸੈਸ਼ਨ ਦੀ ਪ੍ਰਧਾਨਗੀ ਪ੍ਰੋ. ਸ਼ੰਕਰ ਸਿੰਘ, ਵਿਭਾਗ ਮੁਖੀ (ਮਕੈਨੀਕਲ ਅਤੇ ਸਿਵਲ) ਨੇ ਕੀਤੀ | ਐੱਫ.ਡੀ.ਪੀ. ਦਾ ਤਾਲਮੇਲ ਡਾ. ਰਾਕੇਸ਼ ਕੁਮਾਰ, ਐਸੋਸੀਏਟ ਪ੍ਰੋਫੈਸਰ, ਮਕੈਨੀਕਲ ਇੰਜੀਨੀਅਰਿੰਗ ਵਿਭਾਗ, ਡਾ. ਮਨੋਜ ਗੋਇਲ, ਐਸੋਸੀਏਟ ਪ੍ਰੋਫੈਸਰ, ਅਤੇ ਡਾ. ਯੋਗੇਸ਼ ਵਰਮਾ, ਸਹਾਇਕ ਪ੍ਰੋਫੈਸਰ ਵੱਲੋਂ ਕੀਤਾ ਗਿਆ | ਇਸ ਪ੍ਰੋਗਰਾਮ ਦੇ ਸਮਾਪਤੀ ਸੈਸ਼ਨ ਨੂੰ ਸੰਬੋਧਨ ਕਰਦਿਆਂ ਮੁੱਖ ਮਹਿਮਾਨ ਨਿਰਦੇਸ਼ਕ ਪ੍ਰੋ. ਮਨੀਕਾਂਤ ਪਾਸਵਾਨ ਨੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਤਕਨੀਕੀ ਤਰੱਕੀ ਦਾ ਇੱਕ ਵੱਡਾ ਚਾਲਕ ਬਣ ਗਿਆ ਹੈ ਅਤੇ ਮਕੈਨੀਕਲ ਇੰਜੀਨੀਅਰਿੰਗ ਸਮੇਤ ਲਗਭਗ ਹਰ ਖੇਤਰ ਨੂੰ ਬਦਲ ਰਿਹਾ ਹੈ | ਪ੍ਰੋ. ਸ਼ੰਕਰ ਸਿੰਘ ਅਤੇ ਕੋਆਰਡੀਨੇਟਰ ਡਾ. ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਇਸ ਸਮਾਗਮ ਦੌਰਾਨ ਉੱਘੇ ਮਾਹਿਰਾਂ ਦੁਆਰਾ ਤੇਰਾਂ ਸੈਸ਼ਨ ਕਰਵਾਏ ਗਏ | ਇਨ੍ਹਾਂ ਮਾਹਿਰਾਂ ਵਿੱਚ ਆਈ.ਆਈ.ਟੀ. ਅਤੇ ਐਨ.ਆਈ.ਟੀ. ਦੇ ਪ੍ਰੋਫੈਸਰ, ਸੀਮੇਂਸ, ਟਾਟਾ ਕੰਸਲਟੈਂਸੀ ਸਰਵਿਸਿਜ਼, ਐਨ.ਟੀ.ਪੀ.ਸੀ. ਲਿਮਟਿਡ, ਅਤੇ ਏ.ਐਨ.ਜ਼ੈਡ. ਬੈਂਕ (ਸਿੰਗਾਪੁਰ) ਵਰਗੀਆਂ ਵਿਸ਼ਵਵਿਆਪੀ ਸੰਸਥਾਵਾਂ ਦੇ ਸੀਨੀਅਰ ਪੇਸ਼ੇਵਰ ਅਤੇ ਸਲਾਈਟ ਫੈਕਲਟੀ ਡਾ. ਅਮਰ ਪ੍ਰਤਾਪ ਸਿੰਘ (ਈ.ਸੀ.ਈ.) ਅਤੇ ਡਾ. ਅਮਰਨਾਥ ਡੇਬਲਾ (ਸੀ.ਐਸ.ਈ.) ਸ਼ਾਮਲ ਸਨ |
