ਫ਼ਿਰੋਜਪੁਰ/ਮਮਦੋਟ, 15 ਅਪ੍ਰੈਲ (ਗੁਰਿੰਦਰ ਸਿੰਘ, ਰਾਜਿੰਦਰ ਸਿੰਘ)-ਫਿਰੋਜ਼ਪੁਰ-ਫ਼ਾਜਿਲਕਾ ਮਾਰਗ ਤੇ ਖਾਈ ਫੇਮੇ ਕੀ ਰੇਲਵੇ ਪੁਲ ਤੋ ਅੱਗੇ ਸੰਤੁਲਨ ਵਿਗੜ ਜਾਣ ਕਾਰਨ ਸੀਮਿੰਟ ਨਾਲ ਭਰਿਆ ਘੋੜਾ-ਟਰਾਲਾ ਸੜਕ ਦੇ ਵਿਚਕਾਰ ਪਲਟ ਗਿਆ | ਜਿਸ ਕਾਰਨ ਸੜਕ ਦਾ ਬਹੁਤਾ ਹਿੱਸਾ ਜਾਮ ਹੋ ਗਿਆ ਅਤੇ ਸੜਕ ਦੇ ਦੋਵੇਂ ਪਾਸੇ ਵਾਹਨਾਂ ਦੀਆਂ ਲੰਮੀਆਂ ਕਤਾਰਾਂ ਲੱਗ ਗਈਆਂ | ਇਸ ਹਾਦਸੇ ਦਾ ਪਤਾ ਚੱਲਣ ਤੋਂ ਬਾਅਦ ਥਾਣਾ ਸਦਰ ਫ਼ਿਰੋਜਪੁਰ ਤੋਂ ਪੁਲਿਸ ਪਾਰਟੀ ਮੌਕੇ ਤੇ ਪਹੁੰਚੇ ਜਿਨ੍ਹਾਂ ਵਲੋਂ ਟਰੈਫ਼ਿਕ ਨੂੰ ਕੰਟਰੋਲ ਕਰਦਿਆਂ ਥੋੜੇ੍ਹ ਜਿਹੇ ਰਸਤੇ ਵਿਚੋਂ ਵਾਹਨਾਂ ਨੂੰ ਵਾਰੋ-ਵਾਰੀ ਲੰਘਾਇਆ ਜਾ ਰਿਹਾ ਸੀ | ਜਿਸ ਕਾਰਨ ਕਤਾਰਾਂ ਵਿਚ ਖੜ੍ਹੇ ਲੋਕਾਂ ਨੂੰ ਘੰਟਿਆਂਬੱਧੀ ਇੰਤਜ਼ਾਰ ਕਰਨਾ ਗਿਆ | ਉੱਧਰ ਘੋੜੇ-ਟਰਾਲੇ ਵਿਚ ਭਰੇ ਸੀਮਿੰਟ ਨੂੰ ਚੁੱਕਣ ਅਤੇ ਵੱਡੀਆਂ ਕਰੇਨਾਂ ਦੀ ਮਦਦ ਨਾਲ ਟਰਾਲੇ ਨੂੰ ਸਿੱਧਾ ਕਰਕੇ ਸੜਕ ਤੋਂ ਪਾਸੇ ਕਰਨ ਦੀ ਕਾਰਵਾਈ ਵੀ ਚੱਲ ਰਹੀ ਸੀ | ਇੱਥੇ ਜ਼ਿਕਰਯੋਗ ਹੈ ਕਿ ਇਸ ਇਕਹਿਰੇ ਮਾਰਗ 'ਤੇ ਹਰ ਰੋਜ਼ ਕਿਤੇ ਨਾ ਕਿਤੇ ਹਾਦਸਾ ਵਾਪਰ ਜਾਂਦਾ ਹੈ,ਜਿਸ ਕਾਰਨ ਕਈ ਕੀਮਤੀ ਜਾਨਾਂ ਮੌਤ ਦੇ ਮੂੰਹ ਜਾ ਪਈਆਂ ਹਨ | ਇਲਾਕੇ ਦੇ ਲੋਕਾਂ ਨੇ ਕੇਂਦਰ ਅਤੇ ਪੰਜਾਬ ਸਰਕਾਰ ਤੋ ਇਸ ਮਾਰਗ ਨੂੰ ਤੁਰੰਤ ਚੌੜਾ ਕਰਕੇ ਚਹੁੰਮਾਰਗੀ ਬਣਾਉਣ ਦੀ ਮੰਗ ਕੀਤੀ ਹੈ |
