ਫਿਰੋਜ਼ਪੁਰ, 27 ਅਪ੍ਰੈਲ (ਰਾਕੇਸ਼ ਚਾਵਲਾ)-ਬੀਤੇ ਦਿਨ ਰੇਲਗੱਡੀ ਸੰਖਿਆ 04652 ਅੰਮਿ੍ਤਸਰ-ਜੈਨਗਰ ਕਲੋਨ ਸਪੈਸ਼ਲ ਵਿਚ ਡਿਊਟੀ ਦੌਰਾਨ ਅੰਮਿ੍ਤਸਰ ਦੀਆਂ ਟੀ.ਟੀ.ਆਈ. ਸੁਆਣੀ ਪੂਜਾ ਸ਼ਰਮਾ ਅਤੇ ਸੁਆਣੀ ਸ਼ਸ਼ੀ ਬਾਲਾ ਵਲੋਂ ਇਕ ਸ਼ਲਾਘਾਯੋਗ ਕਾਰਜ ਕੀਤਾ ਗਿਆ | ਟਿਕਟ ਚੈਕਿੰਗ ਦੇ ਦੌਰਾਨ ਉਨ੍ਹਾਂ ਨੇ ਸਲੀਪਰ ਕੋਚ ਵਿਚ ਲਗਭਗ 12 ਸਾਲ ਦੇ ਇਕ ਇਕੱਲੇ ਲੜਕੇ ਨੂੰ ਯਾਤਰਾ ਕਰਦੇ ਹੋਏ ਪਾਇਆ | ਜਿਸ ਨਾਲ ਦੋਵਾਂ ਟਿਕਟ ਚੈਕਿੰਗ ਸਟਾਫ਼ ਨੂੰ ਸ਼ੱਕ ਹੋਇਆ | ਲੜਕੇ ਤੋਂ ਉਸ ਦੇ ਮਾਪਿਆਂ ਬਾਰੇ ਪੁੱਛਗਿੱਛ ਕੀਤੀ ਗਈ ਪਰ ਉਹ ਕੋਈ ਤਸੱਲੀਬਖ਼ਸ਼ ਜਾਣਕਾਰੀ ਨਹੀਂ ਦੇ ਸਕਿਆ | ਸਥਿਤੀ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਦੋਵਾਂ ਟਿਕਟ ਚੈਕਿੰਗ ਸਟਾਫ਼ ਵਲੋਂ ਤੁਰੰਤ ਵਪਾਰਕ ਕੰਟਰੋਲ ਕਮਰਸ਼ੀਅਲ ਕੰਟਰੋਲ, ਫਿਰੋਜ਼ਪੁਰ ਨੂੰ ਸੂਚਿਤ ਕੀਤਾ ਗਿਆ | ਉਚਿੱਤ ਤਾਲਮੇਲ ਤੋਂ ਬਾਅਦ ਬਾਲਕ ਨੂੰ ਸੁਰੱਖਿਅਤ ਰੂਪ ਵਿਚ ਉਸ ਦੇ ਮਾਪਿਆਂ ਤੱਕ ਪਹੁੰਚਾਉਣ ਲਈ ਅੰਬਾਲਾ ਕੈਂਟ ਸਟੇਸ਼ਨ 'ਤੇ ਮਹਿਲਾ ਆਰ.ਪੀ.ਐੱਫ. ਸਟਾਫ਼ ਦੇ ਹਵਾਲੇ ਕੀਤਾ ਗਿਆ | ਇਸ ਉਪਰੰਤ ਅੱਜ ਬਾਲਕ ਨੂੰ ਸੁਰੱਖਿਅਤ ਰੂਪ ਵਿਚ ਉਸ ਦੇ ਮਾਪਿਆਂ ਨੂੰ ਸੌਂਪ ਦਿੱਤਾ ਗਿਆ ਹੈ | ਸੀਨੀਅਰ ਮੰਡਲ ਵਪਾਰਕ ਪ੍ਰਬੰਧਕ ਬਸੰਤ ਕੁਮਾਰ ਨੇ ਦੱਸਿਆ ਕਿ ਟਿਕਟ ਚੈਕਿੰਗ ਸਟਾਫ਼ ਨੇ ਆਪਣੀ ਡਿਊਟੀ ਨਿਭਾਉਂਦੇ ਹੋਏ ਬਹੁਤ ਹੀ ਮੁਸਤੈਦੀ ਅਤੇ ਜ਼ਿੰਮੇਵਾਰੀ ਦਾ ਸਬੂਤ ਦਿੱਤਾ ਹੈ | ਜੋ ਰੇਲਵੇ ਦੇ ਅਕਸ ਨੂੰ ਮਾਣਮੱਤਾ ਬਣਾਉਂਦਾ ਹੈ ਨਾਲ ਹੀ, ਇਹ ਸਮੂਹ ਰੇਲ ਕਰਮਚਾਰੀਆਂ ਲਈ ਇਕ ਮਿਸਾਲੀ ਉਦਾਹਰਨ ਵੀ ਪੇਸ਼ ਕਰਦਾ ਹੈ |
