ਮੁੱਦਕੀ, 29 ਜੁਲਾਈ (ਭਾਰਤ ਭੂਸ਼ਨ ਅਗਰਵਾਲ)-ਸਥਾਨਕ ਕਸਬੇ ਦੇ ਮੁੱਦਕੀ ਤੋਂ ਫ਼ਰੀਦਕੋਟ ਰੋਡ ’ਤੇ ਸਥਿਤ ਗੁਰਦੁਆਰਾ ਬਾਬਾ ਬਿਧੀ ਚੰਦ ਨਜ਼ਦੀਕ ਸੜਕ ਦੇ ਕਿਨਾਰੇ ’ਤੇ ਖੜ੍ਹੀ ਖ਼ਤਰਨਾਕ ਟਾਹਲੀ ਕਿਸੇ ਵੇਲੇ ਵੀ ਜਾਨੀ-ਮਾਲੀ ਨੁਕਸਾਨ ਦਾ ਕਾਰਨ ਬਣ ਸਕਦੀ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਭਾਰਤੀ ਕਿਸਾਨ ਯੂਨੀਅਨ ਕ੍ਰਾਂਤੀਕਾਰੀ ਇਕਾਈ ਮੁੱਦਕੀ ਦੇ ਪ੍ਰਧਾਨ ਚਰਨਜੀਤ ਸਿੰਘ ਚੈਨਾ ਰੋਸਾ ਨੇ ਦੱਸਿਆ ਕਿ ਉਕਤ ਟਾਹਲੀ ਦੇ ਜੜ੍ਹ ਤੋਂ ਉੱਖੜਨ ਅਤੇ ਜੜ੍ਹ ਨੂੰ ਘੁਣ ਲੱਗਾ ਹੋਣ ਕਰਕੇ ਟਾਹਲੀ ਕਿਸੇ ਵੇਲੇ ਵੀ ਡਿਗ ਸਕਦੀ ਹੈ, ਜਿਸ ਨਾਲ ਜਾਨੀ ਅਤੇ ਮਾਲੀ ਨੁਕਸਾਨ ਹੋ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਇਸੇ ਸੜਕ ’ਤੇ ਹੀ ਖੜ੍ਹੇ ਲੰਮੇ ਅਤੇ ਵੱਡੇ-ਵੱਡੇ ਸਫ਼ੈਦੇ ਜਿਨ੍ਹਾਂ ਦਾ ਟਾਹਣਾ ਕਦੇ ਵੀ ਹਨੇਰੀ ਕਾਰਨ ਡਿਗ ਕੇ ਕਿਸੇ ਦਾ ਜਾਨੀ ਅਤੇ ਮਾਲੀ ਨੁਕਸਾਨ ਪਹੁੰਚਾ ਸਕਦਾ ਹੈ। ਚਰਨਜੀਤ ਸਿੰਘ ਚੈਨਾ ਰੋਸਾ ਨੇ ਮਹਿਕਮੇ ਦੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਉਕਤ ਘੁਣ ਖਾਦੀ ਟਾਹਲੀ ਨੂੰ ਪੁਟਵਾਇਆ ਜਾਵੇ ਅਤੇ ਵੱਡੇ ਸਫ਼ੈਦਿਆਂ ਦਾ ਕੋਈ ਢੁਕਵਾਂ ਹੱਲ ਕੀਤਾ ਜਾਵੇ।
