ਮਾਛੀਵਾੜਾ ਸਾਹਿਬ, 25 ਅਪ੍ਰੈਲ (ਮਨੋਜ ਕੁਮਾਰ, ਰਾਜਦੀਪ ਸਿੰਘ ਅਲਬੇਲਾ)-ਪੁਲਿਸ ਸਟੇਸ਼ਨ ਮਾਛੀਵਾੜਾ ਅਧੀਨ ਪੈਂਦੇ ਪਿੰਡ ਬਹਿਲੋਲਪੁਰ ਵਿਚ ਸ਼ਨੀਵਾਰ ਦੀ ਸਵੇਰ ਉਸ ਸਮੇਂ ਵੱਡੀ ਆਫ਼ਤ ਦਿਖਾਈ ਦਿੱਤੀ ਜਦੋਂ ਪਿੰਡ ਵਿਚ ਦੇਖਦੇ ਹੀ ਦੇਖਦੇ ਧੰੂਏਾ ਨੇ ਖ਼ੌਫ਼ਨਾਕ ਮਾਹੌਲ ਪੈਦਾ ਕਰ ਦਿੱਤਾ | ਪਿੰਡ ਵਿਚ ਸਾਲਾਂ ਤੋਂ ਕਰਿਆਨੇ ਦੀ ਦੁਕਾਨ ਕਰਦੇ ਸੂਰਤ ਸਿੰਘ ਪੁੱਤਰ ਲਾਭ ਸਿੰਘ ਦੀ ਉਮਰ ਭਰ ਦੀ ਮਿਹਨਤ ਪਲਾਂ ਵਿਚ ਅੱਗ ਦੀ ਭੇਂਟ ਚੜ ਗਈ | ਸਵੇਰੇ ਕਰੀਬ 6.30 ਦੀ ਤੜਕਸਾਰ ਵਾਪਰੀ ਇਸ ਘਟਨਾ ਵਿੱਚ ਦੁਕਾਨ ਅੰਦਰ ਪਿਆ ਸਾਰਾ ਸਮਾਨ ਤਾਂ ਸੜ ਕੇ ਸਵਾਹ ਹੋ ਗਿਆ ਅਤੇ ਨਾਲ ਹੀ ਉਸ ਦੀ ਰਿਹਾਇਸ਼ ਜੋ ਕਿ ਦੁਕਾਨ ਦੇ ਨਾਲ ਬਣੀ ਸੀ ਨੂੰ ਵੀ ਕਾਫੀ ਵੱਡਾ ਨੁਕਸਾਨ ਹੋਇਆ ਤੇ ਇਸ ਘਟਨਾ ਵਿਚ ਕਰੀਬ ਡੇਢ ਕਰੋੜ ਦਾ ਭਾਰੀ ਨੁਕਸਾਨ ਕਰ ਦਿੱਤਾ | ਦੁਕਾਨਦਾਰ ਸੂਰਤ ਸਿੰਘ ਅਨੁਸਾਰ ਸਵੇਰੇ ਜਦੋਂ ਉਸ ਨੇ ਆਪਣੀ ਦੁਕਾਨ ਖੋਲੀ ਤਾਂ ਦੁਕਾਨ ਦੇ ਪਿੱਛੇ ਧੂੰਆਂ ਦਿਖਾਈ ਦਿੱਤਾ ਤੇ ਦੇਖਦੇ ਹੀ ਦੇਖਦੇ ਅੱਗ ਦੀਆਂ ਤੇਜ਼ ਲਪਟਾਂ ਨੇ ਸਾਰਾ ਕੁੱਝ ਸਵਾਹ ਕਰ ਦਿੱਤਾ | ਹਾਲਾਂਕਿ ਪਿੰਡ ਵਾਸੀਆਂ ਦੀ ਮਦਦ ਨੇ ਦੁਕਾਨ ਵਿਚ ਪਏ ਗੈਸ ਸਿਲੰਡਰਾਂ ਨੂੰ ਕੱਢ ਲਿਆ ਨਹੀਂ ਤਾਂ ਇਹ ਮੰਜਰ ਹੋਰ ਭਿਆਨਕ ਹੋ ਸਕਦਾ ਸੀ | ਫਿਲਹਾਲ ਖ਼ੁਸ਼ਕਿਸਮਤੀ ਇਹ ਰਹੀ ਕਿ ਕਿਸੇ ਵੀ ਕਿਸਮ ਦੇ ਜਾਨੀ ਨੁਕਸਾਨ ਤੋਂ ਬਚਾਅ ਰਿਹਾ | ਅੱਗ ਲੱਗਣ ਦਾ ਕਾਰਨ ਫਿਲਹਾਲ ਬਿਜਲੀ ਦੇ ਕਿਸੇ ਸ਼ਾਟ ਸਰਕਟ ਨੂੰ ਦੱਸਿਆ ਜਾ ਰਿਹਾ ਹੈ ਤੇ ਇਹ ਮਹਿਜ਼ ਇੱਕ ਦੁਕਾਨ ਨਹੀਂ ਬਲਕਿ ਆਪਣੇ ਆਪ ਵਿੱਚ ਵਡਾ ਸੁਪਰ ਸਟੋਰ ਸੀ |
