ਰੂੜੇਕੇ ਕਲਾਂ, 25 ਫਰਵਰੀ (ਗੁਰਪ੍ਰੀਤ ਸਿੰਘ ਕਾਹਨੇਕੇ)-ਪਿੰਡ ਧੌਲਾ ਤੋਂ ਗੁਰਦੁਆਰਾ ਅੜੀਸਰ ਸਾਹਿਬ ਪਾਤਸ਼ਾਹੀ ਨੌਵੀਂ ਨੂੰ ਜਾਂਦੀ 18 ਫੁੱਟੀ ਸੜ੍ਹਕ 'ਤੇ ਇਕ ਪ੍ਰਾਈਵੇਟ ਸਕੂਲ ਦੀ ਬੱਸ ਰੁੱਖ ਨਾਲ ਟਕਰਾਉਣ ਕਰ ਕੇ ਹੋਏ ਸੜ੍ਹਕ ਹਾਦਸੇ 'ਚ ਬੱਸ ਡਰਾਈਵਰ ਤੇ ਸਕੂਲੀ ਵਿਦਿਆਰਥੀਆਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ | ਇਕੱਤਰ ਕੀਤੀ ਜਾਣਕਾਰੀ ਅਨੁਸਾਰ ਕਿ ਇਕ ਪ੍ਰਾਈਵੇਟ ਸਕੂਲ ਦੀ ਬੱਸ ਪਿੰਡ ਧੌਲਾ ਤੋਂ ਗੁਰਦੁਆਰਾ ਅੜੀਸਰ ਸਾਹਿਬ ਵੱਲ ਨੂੰ ਜਾ ਰਹੀ ਸੀ | ਰਸਤੇ ਵਿਚ ਬੱਸ ਰੁੱਖ ਨਾਲ ਟਕਰਾਉਣ ਕਰ ਕੇ ਸਕੂਲ ਬੱਸ ਦਾ ਡਰਾਈਵਰ ਤੇ ਵਿਦਿਆਰਥੀ ਜ਼ਖ਼ਮੀ ਹੋ ਗਏ, ਨੂੰ ਇਲਾਜ ਬਰਨਾਲਾ ਦੇ ਇਕ ਪ੍ਰਾਈਵੇਟ ਹਸਪਤਾਲ ਲਿਜਾਇਆ ਗਿਆ | ਸੰਪਰਕ ਕਰਨ 'ਤੇ ਸਕੂਲ ਬੱਸ ਦੇ ਠੇਕੇਦਾਰ ਨੇ ਦੱਸਿਆ ਕਿ ਸਵੇਰੇ ਧੁੰਦ ਜ਼ਿਆਦਾ ਹੋਣ ਕਰ ਕੇ ਸਕੂਲ ਬੱਸ ਡਰਾਈਵਰ ਮਾਰਗ 'ਤੇ ਅੱਗੇ ਆਏ ਇਕ ਰੁੱਖ ਦੇ ਟਾਹਣੇ ਨਾਲ ਬੱਸ ਟਕਰਾਉਣ ਤੋਂ ਬਚਾ ਰਿਹਾ ਸੀ | ਡਰਾਈਵਰ ਸਾਈਡ ਮਾਰਗ ਦੀ ਸਾਈਡ 'ਤੇ ਖੜ੍ਹੇ ਰੁੱਖ ਨਾਲ ਬੱਸ ਟਕਰਾਉਣ ਕਰ ਕੇ ਹਾਦਸਾ ਵਾਪਰ ਗਿਆ ਸੀ | ਇਲਾਜ ਲਈ ਬੱਸ ਡਰਾਈਵਰ ਨੂੰ ਡਾ: ਪ੍ਰਦੀਪ ਦੇ ਹਸਪਤਾਲ ਦਾਖਲ ਕਰਵਾਇਆ ਗਿਆ ਜਿੱਥੇ ਕਿ ਉਸ ਦੀ ਲੱਤ ਵਿਚ ਰਾਡ ਪਾ ਕੇ ਇਲਾਜ ਚੱਲ ਰਿਹਾ ਹੈ | ਵਿਦਿਆਰਥੀਆਂ ਦੇ ਵੀ ਮਾਮੂਲੀ ਸੱਟਾਂ ਲੱਗੀਆਂ ਸਨ ਜਿਨ੍ਹਾਂ ਨੂੰ ਵੀ ਪ੍ਰਾਈਵੇਟ ਹਸਪਤਾਲਾਂ ਤੋਂ ਮੁੱਢਲੀ ਸਹਾਇਤਾ ਦੇ ਕੇ ਘਰਾਂ ਨੂੰ ਭੇਜ ਦਿੱਤਾ ਗਿਆ ਹੈ | ਪੁਲਿਸ ਥਾਣਾ ਰੂੜੇਕੇ ਕਲਾਂ ਦੇ ਮੁੱਖ ਅਫ਼ਸਰ ਇੰਸਪੈਕਟਰ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਸਕੂਲ ਬੱਸ ਦਾ ਡਰਾਈਵਰ ਅਮਨਦੀਪ ਸਿੰਘ ਜੈਕੀ ਵਾਸੀ ਬਦਰਾ ਪ੍ਰਦੀਪ ਹਸਪਤਾਲ ਬਰਨਾਲਾ ਵਿਖੇ ਜੇਰੇ ਇਲਾਜ ਹੈ | ਜਿਸ ਦੇ ਬਿਆਨ ਅਨੁਸਾਰ ਅਤੇ ਪੜਤਾਲ ਉਪਰੰਤ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ |
