ਧਨੌਲਾ, 25 ਮਈ (ਜਤਿੰਦਰ ਸਿੰਘ ਧਨੌਲਾ)-ਚੋਣ ਪ੍ਰਚਾਰ ਬੰਦ ਹੋਣ ਦੇ ਤੁਰੰਤ ਬਾਅਦ ਇਲਾਕਾ ਭਰ ਅੰਦਰ ਸ਼ਾਂਤੀ ਪਸਰ ਗਈ | ਪੋਲਿੰਗ ਬੂਥ ਢੁਕਵੀਂ ਥਾਂ 'ਤੇ ਲਾਉਣ ਲਈ ਜਗ੍ਹਾ ਰੋਕਣ ਲਈ ਜੱਦੋ ਜਹਿਦ ਚੱਲਦੀ ਦੇਖੀ ਗਈ | ਪ੍ਰਸ਼ਾਸਨਿਕ ਅਧਿਕਾਰੀਆਂ ਵਲੋਂ ਬੜੀ ਫੁਰਤੀ ਨਾਲ ਪੋਲਿੰਗ ਅਮਲੇ ਸਮੇਤ ਪੋਲਿੰਗ ਬੂਥਾਂ 'ਤੇ ਪੁੱਜ ਕੇ ਤਿਆਰੀਆਂ ਆਰੰਭ ਦਿੱਤੀਆਂ ਗਈਆਂ | ਅਚੰਭੇ ਦੀ ਗੱਲ ਇਹ ਹੈ ਕਿ ਬਹੁਤੇ ਲੋਕ ਤਪਦੀ ਧੁੱਪ ਨੂੰ ਦੇਖ ਕੇ ਬਾਹਰ ਨਿਕਲਣਾ ਮੁਸ਼ਕਲ ਸਮਝਦੇ ਸਨ | ਪ੍ਰੰਤੂ ਧੁੱਪ ਦੀ ਪ੍ਰਵਾਹ ਕੀਤੇ ਬਗੈਰ ਇਦਾਂ ਭੱਜ ਨੱਠ ਕਰਦੇ ਦੇਖੇ ਗਏ ਜਿਵੇਂ ਪੋਹ-ਮਾਘ ਦੇ ਦਿਨਾਂ ਵਿਚ ਲੋਕ ਟਹਿਲਦੇ ਹੋਣ | ਪੁਲਿਸ ਪ੍ਰਸ਼ਾਸਨ ਵਲੋਂ ਇਕ ਦਿਨ ਪਹਿਲਾਂ ਫਲੈਗ ਮਾਰਚ ਵੀ ਕੱਢਿਆ ਗਿਆ | ਇਲੈੱਕਸ਼ਨ ਕਮਿਸ਼ਨ ਦੀ ਸਖ਼ਤੀ ਕਾਰਨ ਕੋਈ ਸ਼ੋਰ ਸ਼ਰਾਬਾ ਸੁਣਨ ਨੂੰ ਨਹੀਂ ਮਿਲਿਆ ਅਤੇ ਨਾ ਹੀ ਕੋਈ ਝੁੰਡ ਬਣਾ ਕੇ ਕਿਸੇ ਦੇ ਘਰ ਜਾਂਦਾ ਦੇਖਿਆ ਗਿਆ | ਬਲਕਿ ਫਟਾਫਟ ਵੋਟ ਪਰਚੀਆਂ ਕੱਟ ਕੇ ਘਰ-ਘਰ ਪਹੁੰਚਾਉਂਦੇ ਸਮਰਥਕ ਮਿਹਨਤ ਕਰਦੇ ਜ਼ਰੂਰ ਦੇਖੇ ਗਏ |
