ਸ਼ਹਿਣਾ, 29 ਜੂਨ (ਸੁਰੇਸ਼ ਗੋਗੀ)-ਪਿੰਡ ਭਗਤਪੁਰਾ ਮੌੜ ਦੀ ਫਿਰਨੀ ’ਤੇ ਗੰਦਾ ਪਾਣੀ ਖੜਨ ਨਾਲ ਕਿਸੇ ਪਾਸੇ ਵੀ ਲੰਘਣ ਲਈ ਰਸਤਾ ਨਹੀਂ ਰਿਹਾ। ਕਾਂਗਰਸੀ ਆਗੂ ਸੇਵਕ ਸਿੰਘ ਧਰਮਸੋਤ ਨੇ ਕਿਹਾ ਕਿ ਪਿੰਡ ਦੇ ਚਾਰ ਚੁਫੇਰੇ ਕਹਿਣ ਨੂੰ ਤਾਂ ਭਾਵੇਂ ਪੱਕੀ ਸੜਕ ਵਾਲੀ ਫਿਰਨੀ ਬਣੀ ਹੋਈ ਹੈ, ਪਰ ਗੰਦੇ ਪਾਣੀ ਦਾ ਨਿਕਾਸ ਢੁਕਵਾਂ ਨਾ ਹੋਣ ਕਾਰਨ ਗੰਦਾ ਪਾਣੀ ਰਸਤਿਆਂ ਵਿਚ ਖੜ ਰਿਹਾ ਹੈ। ਪਾਣੀ ਖੜਨ ਨਾਲ ਰਸਤੇ ਨੀਵੇਂ ਹੋ ਚੁੱਕੇ ਹਨ ਅਤੇ ਥਾਂ-ਥਾਂ ’ਤੇ ਡੂੰਘੇ ਖੱਡੇ ਵੀ ਬਣ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿ ਫਿਰਨੀ ਤੋਂ ੳੁੱਤੋਂ ਪੈਦਲ ਲੰਘਣਾ ਤਾਂ ਇਕ ਪਾਸੇ ਰਿਹਾ, ਕੋਈ ਵੀ ਵਹੀਕਲ ਲੰਘਾਉਣ ਤੋਂ ਡਰਾਈਵਰ ਇਸ ਲਈ ਸੰਕੋਚ ਕਰਦਾ ਹੈ ਕਿ ਚਿੱਕੜ ਤੇ ਗਾਰੇ ਵਿਚ ਕਿਤੇ ਉਸ ਦੀ ਗੱਡੀ ਨਾ ਫਸ ਜਾਵੇ। ਜਿਸ ਲਈ ਲੋਕਾਂ ਨੂੰ ਪਿੰਡ ਦੇ ਵਿਚਕਾਰ ਦੀ ਆਪਣੇ ਸਾਧਨ ਲੈ ਕੇ ਲੰਘਣਾ ਪੈਂਦਾ ਹੈ। ਸੇਵਕ ਸਿੰਘ ਧਰਮਸੋਤ ਨੇ ਇਹ ਵੀ ਕਿਹਾ ਕਿ ਪਿਛਲੇ ਸਮੇਂ ਤੋਂ ਭਾਵੇਂ ਪਿੰਡ ਵਿਚ ਲੱਖ ਵਿਕਾਸ ਕਾਰਜ ਹੋਏ ਹੋਣ, ਪਰ ਪਿੰਡ ਵਿਚ ਬਾਹਰੋਂ ਆਉਣ ਵਾਲੇ ਵਿਅਕਤੀ ’ਤੇ ਪਿੰਡ ਦੀ ਫਿਰਨੀ ਦੇਖ ਕੇ ਕੀ ਪ੍ਰਭਾਵ ਪੈਂਦਾ ਹੈ ਇਸ ਦਾ ਅੰਦਾਜ਼ਾ ਲੋਕ ਭਲੀਭਾਂਤੀ ਲਾਉਣਾ ਜਾਣਦੇ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਥਾਂ-ਥਾਂ ’ਤੇ ਗੰਦਾ ਪਾਣੀ ਖੜਨ ਨਾਲ ਮੱਛਰ ਤੇ ਮੱਖੀਆਂ ਫੈਲ ਰਹੀਆਂ ਹਨ ਅਤੇ ਲੋਕਾਂ ਦੇ ਬਿਮਾਰ ਹੋਣ ਦਾ ਖ਼ਦਸ਼ਾ ਹੈ।
