ਭਾਰਤ ਫੀਫਾ ਮਹਿਲਾ ਵਿਕਾਸ ਪ੍ਰੋਗਰਾਮ ਲਈ ਚੁਣੇ ਗਏ 12 ਦੇਸ਼ਾਂ 'ਚ ਸ਼ਾਮਿਲ

ਨਵੀਂ ਦਿੱਲੀ, 22 ਅਪ੍ਰੈਲ (ਪੀ. ਟੀ. ਆਈ.)-ਭਾਰਤ ਨੂੰ ਵਿਸ਼ਵ ਫੁੱਟਬਾਲ ਪ੍ਰਬੰਧਕ ਸੰਸਥਾ (ਫੀਫਾ) ਵਲੋਂ ਆਪਣੇ ਮਹਿਲਾ ਵਿਕਾਸ ਪ੍ਰੋਗਰਾਮ ਲਈ ਚੁਣੇ ਗਏ 12 ਦੇਸ਼ਾਂ 'ਚ ਸ਼ਾਮਿਲ ਕੀਤਾ ਗਿਆ | ਇਸ ਸੂਚੀ 'ਚ ਜਰਮਨੀ, ਨੀਦਰਲੈਂਡ, ਸਵੀਡਨ, ਸਕਾਟਲੈਂਡ, ਕੈਨੇਡਾ, ਮੈਕਸੀਕੋ, ਫਿਨਲੈਂਡ, ਘਾਨਾ, ਜਾਰਡਨ, ਲਿਥੁਆਨੀਆ ਅਤੇ ਪੈਰਾਗੁਏ ਵੀ ਸ਼ਾਮਿਲ ਹਨ | ਆਲ ਇੰਡੀਆ ਫੁੱਟਬਾਲ ਫੈਡਰੇਸ਼ਨ (ਏ.ਆਈ.ਐਫ.ਐਫ.) ਵਲੋਂ ਦਿੱਤੀ ਗਈ ਵਪਾਰਕ ਰਣਨੀਤੀ ਅਤੇ ਭਵਿੱਖ ਦੀਆਂ ਯੋਜਨਾਵਾਂ ਦੀ ਵਿਸਥਾਰਿਤ ਪੇਸ਼ਕਾਰੀ ਤੋਂ ਬਾਅਦਹ ਫੀਫਾ ਵਲੋਂ ਭਾਰਤ ਨੂੰ ਸ਼ਾਮਿਲ ਕੀਤਾ ਗਿਆ ਹੈ | ਏ.ਆਈ.ਐਫ.ਐਫ. ਨੇ ਕਿਹਾ ਕਿ ਇਹ ਪ੍ਰੋਗਰਾਮ ਮਈ ਤੋਂ ਅਕਤੂਬਰ 2026 ਤੱਕ ਆਨਲਾਈਨ ਕਰਵਾਇਆ ਜਾਵੇਗਾ | ਇਹ ਕੋਰਸ ਖ਼ੁਦ ਫੀਫਾ ਵਲੋਂ ਦੇਸ਼ ਭਰ 'ਚ ਮਹਿਲਾ ਫੁੱਟਬਾਲ 'ਚ ਵੱਖ-ਵੱਖ ਹਿੱਸੇਦਾਰਾਂ ਲਈ ਤਿਆਰ ਕੀਤਾ ਜਾਵੇਗਾ | ਏ.ਆਈ.ਐਫ.ਐਫ. ਦੇ ਡਿਪਟੀ ਸੈਕਟਰੀ ਜਨਰਲ ਐਮ. ਸੱਤਿਆਨਾਰਾਇਣ ਨੇ ਕਿਹਾ ਕਿ ਇਹ ਸਾਡੇ ਲਈ ਦੇਸ਼ 'ਚ ਮਹਿਲਾ ਫੁੱਟਬਾਲ ਦੇ ਵਪਾਰਕ ਪਹਿਲੂ ਨੂੰ ਵਧਾਉਣ ਦਾ ਸਹੀ ਸਮਾਂ ਹੈ ਅਤੇ ਸਾਡੀਆਂ ਤਿੰਨ ਮਹਿਲਾ ਟੀਮਾਂ (ਸੀਨੀਅਰ, ਅੰਡਰ-20, ਅਤੇ ਅੰਡਰ-17) ਦਾ ਏ.ਐਫ.ਸੀ. ਏਸ਼ੀਅਨ ਕੱਪਾਂ ਲਈ ਉਨ੍ਹਾਂ ਦੇ ਸੰਬੰਧਿਤ ਉਮਰ ਵਰਗਾਂ 'ਚ ਕੁਆਲੀਫਾਈ ਕਰਨਾ ਸਾਡੀ ਸਮਰੱਥਾ ਨੂੰ ਦਰਸਾਉਂਦਾ ਹੈ |