ਭਾਰਤੀ ਕ੍ਰਿਕਟ ਟੀਮ 'ਚ ਚੁਣੇ ਗਏ ਗੁਰਨੂਰ ਬਰਾੜ ਦਾ ਸੰਬੰਧ ਸ੍ਰੀ ਮੁਕਤਸਰ ਸਾਹਿਬ ਨਾਲ <br/>

ਲੰਬੀ, 20 ਮਈ (ਮੇਵਾ ਸਿੰਘ)-ਭਾਰਤੀ ਕਿ੍ਕਟ ਕੰਟਰੋਲ ਬੋਰਡ (ਬੀ. ਸੀ. ਸੀ. ਆਈ.) ਵਲੋਂ ਅਫ਼ਗਾਨਿਸਤਾਨ ਵਿਰੁੱਧ 6 ਜੂਨ ਤੋਂ ਸ਼ੁਰੂ ਹੋਣ ਵਾਲੇ ਟੈਸਟ ਤੇ 3 ਮੈਚਾਂ ਦੀ ਇਕ ਦਿਨਾ ਲੜੀ ਲਈ ਐਲਾਨੀ ਗਈ ਟੀਮ 'ਚ ਸ੍ਰੀ ਮੁਕਤਸਰ ਸਾਹਿਬ ਦੇ ਪਿੰਡ ਖਿਉਵਾਲੀ ਦੇ ਵਸਨੀਕ ਗੁਰਨੂਰ ਬਰਾੜ ਨੂੰ ਵੀ ਤੇਜ਼ ਗੇਂਦਬਾਜ਼ ਵਜੋਂ ਮੌਕਾ ਦਿੱਤਾ ਗਿਆ ਹੈ | ਹੋਰ ਜਾਣਕਾਰੀ ਦਿੰਦਿਆਂ ਇਥੋਂ ਦੇ ਨਿਵਾਸੀ ਸ਼ਮੀ ਬਰਾੜ ਨੇ ਕਿਹਾ ਕਿ ਇਹ ਗੁਰਨੂਰ ਦੇ ਮਾਪਿਆਂ ਤੇ ਸਮੂਹ ਨਗਰ ਨਿਵਾਸੀਆਂ ਲਈ ਬੜੀ ਹੀ ਖ਼ੁਸ਼ੀ ਤੇ ਮਾਣ ਵਾਲੀ ਗੱਲ ਹੈ | ਉਨ੍ਹਾਂ ਦੱਸਿਆ ਕਿ ਖਿਡਾਰੀ ਦੇ ਪਿਤਾ ਸੁਖਵੀਰ ਬਰਾੜ ਜੋ ਕਿ ਪੰਜਾਬ ਪੁਲਿਸ ਵਿਚ ਸੇਵਾਵਾਂ ਨਿਭਾ ਰਹੇ ਹਨ, ਇਸ ਸਮੇਂ ਮੁਹਾਲੀ 'ਚ ਰਹਿ ਰਹੇ ਹਨ | ਗੁਰਨੂਰ ਬਰਾੜ ਦੇ ਦਾਦਾ ਅਮਰਜੀਤ ਸਿੰਘ ਬਰਾੜ ਤੇ ਸਮੂਹ ਪਰਿਵਾਰ ਜੋ ਕਿ ਪਿੰਡ ਖਿਉਵਾਲੀ ਵਿਚ ਰਹਿ ਰਹੇ ਹਨ, ਨੂੰ ਨਗਰ ਤੇ ਇਲਾਕਾ ਨਿਵਾਸੀਆਂ ਵਲੋਂ ਵਧਾਈਆਂ ਦਿੱਤੀਆਂ ਜਾ ਰਹੀਆਂ ਹਨ | ਉਨ੍ਹਾਂ ਦੱਸਿਆ ਕਿ 6 ਫੁੱਟ 5 ਇੰਚ ਦੇ ਨੌਜਵਾਨ ਗੁਰਨੂਰ ਬਰਾੜ ਸੰਨ 2022 ਵਿਚ ਸਭ ਤੋਂ ਛੋਟੀ ਉਮਰ ਦੇ ਖਿਡਾਰੀ ਵਜੋਂ ਆਈ.ਪੀ.ਐੱਲ. 'ਚ ਪੰਜਾਬ ਦੀ ਟੀਮ 'ਚ ਵੀ ਖੇਡ ਚੁੱਕਾ ਹੈ | ਇਸ ਸਮੇਂ ਉਹ ਆਈ.ਪੀ.ਐੱਲ. ਵਿਚ ਗੁਜਰਾਤ ਟਾਈਟਨਸ ਵਲੋਂ ਖੇਡ ਰਿਹਾ ਹੈ | ਇਸ ਮੌਕੇ ਜਸਪਾਲ ਸਿੰਘ ਡੀ.ਐੱਸ.ਪੀ. ਮਲੋਟ ਨੇ ਵੀ ਗੁਰਨੂਰ ਦੇ ਪਰਿਵਾਰ ਨੂੰ ਵਧਾਈਆਂ ਦਿੱਤੀਆਂ |