ਛਾਅ ਗਏ ਮੈਸੀ, ਲਗਾਤਾਰ 8 ਮੈਚਾਂ ’ਚ ਗੋਲ ਕਰਨ ਵਾਲੇ ਪਹਿਲੇ ਫੁੱਟਬਾਲਰ ਬਣੇ

ਨਿਊਯਾਰਕ, 4 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਫੀਫਾ ਵਿਸ਼ਵ ਕੱਪ 2026 ਦੇ ਰੋਮਾਂਚਕ ਮੁਕਾਬਲੇ ’ਚ ਮੌਜੂਦਾ ਚੈਂਪੀਅਨ ਅਰਜਨਟੀਨਾ ਨੇ ਕੇਪ ਵਰਡੇ ਨੂੰ ਵਾਧੂ ਸਮੇਂ ਤੱਕ ਖਿੱਚੇ ਗਏ ਮੈਚ ’ਚ 3-2 ਨਾਲ ਹਰਾ ਕੇ ਰਾਊਂਡ ਆਫ਼ 16 ’ਚ ਆਪਣੀ ਜਗ੍ਹਾ ਪੱਕੀ ਕਰ ਲਈ। ਪਹਿਲੀ ਵਾਰ ਵਿਸ਼ਵ ਕੱਪ ਖੇਡ ਰਹੀ ਕੇਪ ਵਰਡੇ ਨੇ ਸ਼ਾਨਦਾਰ ਖੇਡ ਦਿਖਾਈ ਪਰ ਅਰਜਨਟੀਨਾ ਦੇ ਤਜਰਬੇ ਤੇ ਆਖ਼ਰੀ ਪਲਾਂ ਦੀ ਮਜ਼ਬੂਤੀ ਅੱਗੇ ਟੀਮ ਹਾਰ ਗਈ। ਅਰਜਨਟੀਨਾ ਵੱਲੋਂ ਲਿਓਨਲ ਮੈਸੀ ਨੇ 29ਵੇਂ ਮਿੰਟ ’ਚ ਪਹਿਲਾ ਗੋਲ ਕੀਤਾ। ਇਹ ਮੈਸੀ ਦਾ ਵਿਸ਼ਵ ਕੱਪ ਕਰੀਅਰ ਦਾ 20ਵਾਂ ਗੋਲ ਸੀ ਤੇ ਉਹ ਲਗਾਤਾਰ 8 ਵਿਸ਼ਵ ਕੱਪ ਮੈਚਾਂ ’ਚ ਗੋਲ ਕਰਨ ਦਾ ਆਪਣਾ ਰਿਕਾਰਡ ਹੋਰ ਵਧਾ ਗਏ। ਕੇਪ ਵਰਡੇ ਨੇ ਹਾਰ ਨਹੀਂ ਮੰਨੀ ਤੇ ਦੂਜੇ ਅੱਧ ਵਿਚ ਡੇਰੋਇ ਡੁਆਰਟੇ ਨੇ ਗੋਲ ਕਰਕੇ ਸਕੋਰ 1-1 ਕਰ ਦਿੱਤਾ। ਇਸ ਤੋਂ ਬਾਅਦ ਮੈਚ ਵਾਧੂ ਸਮੇਂ ’ਚ ਗਿਆ। ਵਾਧੂ ਸਮੇਂ ਦੀ ਸ਼ੁਰੂਆਤ ’ਚ ਲਿਸਾਂਡਰੋ ਮਾਰਟੀਨੇਜ਼ ਨੇ ਮੈਸੀ ਦੇ ਕਾਰਨਰ ਤੋਂ ਬਣੇ ਮੌਕੇ ਨੂੰ ਗੋਲ ’ਚ ਬਦਲ ਕੇ ਅਰਜਨਟੀਨਾ ਨੂੰ 2-1 ਨਾਲ ਅੱਗੇ ਕਰ ਦਿੱਤਾ। ਪਰ ਕੇਪ ਵਰਡੇ ਨੇ ਫਿਰ ਜਵਾਬ ਦਿੱਤਾ। ਸਿਡਨੀ ਲੋਪਸ ਕਬਰਾਲ ਨੇ ਬਾਕਸ ਤੋਂ ਬਾਹਰੋਂ ਸ਼ਾਨਦਾਰ ਸ਼ਾਟ ਮਾਰ ਕੇ ਗੇਂਦ ਉੱਪਰਲੇ ਕੋਨੇ ’ਚ ਪਾ ਦਿੱਤੀ ਤੇ ਸਕੋਰ 2-2 ਕਰ ਦਿੱਤਾ। ਇਹ ਮੈਚ ਦਾ ਸਭ ਤੋਂ ਸੁੰਦਰ ਗੋਲ ਮੰਨਿਆ ਗਿਆ। ਅੰਤ ’ਚ ਅਰਜਨਟੀਨਾ ਨੂੰ ਜਿੱਤ ਕੇਪ ਵਰਡੇ ਦੇ ਇਕ ਆਤਮਘਾਤੀ ਗੋਲ ਨਾਲ ਮਿਲੀ। ਗੇਂਦ ਕ੍ਰਿਸਟੀਅਨ ਰੋਮੇਰੋ ਵੱਲੋਂ ਹੈਡ ਹੋਣੀ ਲੱਗ ਰਹੀ ਸੀ, ਪਰ ਕੇਪ ਵਰਡੇ ਦੇ ਡਿਫੈਂਡਰ ਤੋਂ ਟਕਰਾ ਕੇ ਜਾਲ ’ਚ ਚਲੀ ਗਈ ਤੇ ਅਰਜਨਟੀਨਾ ਨੇ 3-2 ਨਾਲ ਮੈਚ ਆਪਣੇ ਨਾਂਅ ਕਰ ਲਿਆ।
ਵੋਜ਼ਿਨ੍ਹਾ ਨੇ ਜਿੱਤਿਆ ਪ੍ਰਸੰਸਕਾਂ ਦਾ ਦਿਲ
ਕੇਪ ਵਰਡੇ ਦੇ 40 ਸਾਲਾ ਗੋਲਕੀਪਰ ਵੋਜਿਨ੍ਹਾ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ, ਕੁੱਲ 10 ਬਚਾਅ ਕੀਤੇ। ਇਨ੍ਹਾਂ ਵਿੱਚੋਂ ਪੰਜ ਮੈਸੀ ਦੇ ਯਤਨਾਂ ਵਿੱਚੋਂ ਸਨ। ਉਸਦੀ ਸ਼ਾਨਦਾਰ ਗੋਲਕੀਪਿੰਗ ਦੀ ਬਦੌਲਤ, ਕੇਪ ਵਰਡੇ ਨੇ ਆਪਣੇ ਵਿਸ਼ਵ ਕੱਪ ਡੈਬਿਊ ਵਿੱਚ, ਮੌਜੂਦਾ ਚੈਂਪੀਅਨ ਅਰਜਨਟੀਨਾ ਨੂੰ ਆਖਰੀ ਮਿੰਟਾਂ ਤੱਕ ਸਖ਼ਤ ਟੱਕਰ ਦਿੱਤੀ। ਵੋਜ਼ਿਨ੍ਹਾ ਨੇ ਵੀ ਕਮਾਲ ਦੀ ਖੇਡ ਦਿਖਾਈ। ਉਸ ਨੇ ਮੈਸੀ ਦੀਆਂ ਕਈ ਫ੍ਰੀ ਕਿਕਾਂ ਤੇ ਸ਼ਾਟ ਰੋਕ ਕੇ ਟੀਮ ਨੂੰ ਮੈਚ ’ਚ ਬਣਾਈ ਰੱਖਿਆ। ਦੂਜੇ ਪਾਸੇ ਅਰਜਨਟੀਨਾ ਦੇ ਗੋਲਕੀਪਰ ਐਮੀ ਮਾਰਟੀਨੇਜ਼ ਨੇ ਆਖ਼ਰੀ ਪਲਾਂ ’ਚ ਵੱਡੀ ਸੇਵ ਕਰਕੇ ਜਿੱਤ ਬਚਾਈ। ਕੇਪ ਵਰਡੇ ਦਾ ਵਿਸ਼ਵ ਕੱਪ ਸਫ਼ਰ ਭਾਵੇਂ ਖ਼ਤਮ ਹੋ ਗਿਆ, ਪਰ ਆਪਣੀ ਪਹਿਲੀ ਹੀ ਭਾਗੀਦਾਰੀ ’ਚ ਇਸ ਟੀਮ ਨੇ ਦੁਨੀਆ ਭਰ ਦੇ ਫੁੱਟਬਾਲ ਪ੍ਰੇਮੀਆਂ ਦਾ ਦਿਲ ਜਿੱਤ ਲਿਆ।
ਮੈਸੀ ਗੋਲਡਨ ਬੂਟ ਦੀ ਦੌੜ ’ਚ ਅੱੱਗੇ
ਮੈਸੀ ਨੇ ਹੁਣ ਟੂਰਨਾਮੈਂਟ ’ਚ 7 ਗੋਲ ਕੀਤੇ ਹਨ ਤੇ ਗੋਲਡਨ ਬੂਟ ਦੀ ਦੌੜ ਵਿਚ ਫਰਾਂਸ ਦੇ ਕਾਇਲੀਅਨ ਐਮਬਾਪੇ (6) ਤੋਂ ਇਕ ਗੋਲ ਅੱਗੇ ਹੈ। ਉਸਨੇ ਵਿਸ਼ਵ ਕੱਪ ਇਤਿਹਾਸ ’ਚ ਸਭ ਤੋਂ ਵੱਧ ਗੋਲ ਕਰਨ ਦਾ ਆਪਣਾ ਰਿਕਾਰਡ ਹੋਰ ਮਜ਼ਬੂਤ ਕਰ ਲਿਆ ਹੈ।

ਮੈਸੀ ਵਲੋਂ ਬਣਾਏ ਗਏ ਰਿਕਾਰਡ
-ਫੀਫਾ ਵਿਸ਼ਵ ਕੱਪ ’ਚ ਸਭ ਤੋਂ ਵੱਧ ਗੋਲ - 20 ਗੋਲ
-ਵਿਸ਼ਵ ਕੱਪ ਇਤਿਹਾਸ ’ਚ ਲਗਾਤਾਰ 8 ਮੈਚਾਂ ’ਚ ਗੋਲ
-ਵਿਸ਼ਵ ਕੱਪ ’ਚ ਸਭ ਤੋਂ ਵੱਧ ਗੋਲ ਤੇ ਅਸਿਸਟ - 12
-2 ਵਿਸ਼ਵ ਕੱਪ ਐਡੀਸ਼ਨਾਂ (2022 ਤੇ 2026) ’ਚ ਕੀਤੇ 7 ਤੋਂ ਵੱਧ ਗੋਲ
-ਵਿਸ਼ਵ ਕੱਪ ’ਚ ਕਪਤਾਨ ਦੇ ਤੌਰ ’ਤੇ ਸਭ ਤੋਂ ਵੱਧ ਗੋਲ (19 ਗੋਲ)
-ਵਿਸ਼ਵ ਕੱਪ ’ਚ ਸਭ ਤੋਂ ਵੱਧ ਮੈਚ ਖੇਡੇ- 30 ਮੈਚ

ਮੈਸੀ ਨੇ 56 ਸਾਲ ਪੁਰਾਣਾ ਰਿਕਾਰਡ ਤੋੜਿਆ
39 ਸਾਲਾ ਮੈਸੀ ਦਾ ਕੇਪ ਵਰਡੇ ਖ਼ਿਲਾਫ਼ ਕੀਤਾ ਗਿਆ ਗੋਲ ਫੀਫਾ ਵਿਸ਼ਵ ਕੱਪ ਦੇ ਨਾਕਆਊਟ ਮੈਚਾਂ ’ਚ ਉਸਦਾ 12ਵਾਂ ਗੋਲ ਤੇ ਅਸਿਸਟ ਸੀ, ਜਿਸਨੇ ਪੇਲੇ ਤੇ ਕਾਇਲੀਅਨ ਐਮਬਾਪੇ ਦੇ 11-11 ਯੋਗਦਾਨਾਂ ਦੇ ਰਿਕਾਰਡ ਨੂੰ ਪਛਾੜ ਦਿੱਤਾ। ਮੈਸੀ ਪਹਿਲਾਂ ਹੀ ਟੂਰਨਾਮੈਂਟ ਦੇ ਨਾਕਆਊਟ ਮੈਚਾਂ ’ਚ 6 ਗੋਲ ਅਤੇ 6 ਅਸਿਸਟ ਕਰ ਚੁੱਕਾ ਹੈ। ਜਦੋਂ ਕਿ ਪੇਲੇ ਨੇ 1958, 1962 ਤੇ 1970 ’ਚ ਆਪਣੇ ਦੇਸ਼ ਦੀ ਨੁਮਾਇੰਦਗੀ ਕਰਦੇ ਹੋਏ ਬ੍ਰਾਜ਼ੀਲ ਲਈ 11 ਗੋਲ (ਅੱਠ ਗੋਲ ਅਤੇ ਤਿੰਨ ਅਸਿਸਟ) ਕੀਤੇ ਸਨ, ਐਮਬਾਪੇ ਟੂਰਨਾਮੈਂਟ ਦੇ ਨਾਕਆਊਟ ਪੜਾਵਾਂ ’ਚ 9 ਗੋਲ ਅਤੇ 2 ਅਸਿਸਟ ਨਾਲ ਦੂਜੇ ਸਥਾਨ ’ਤੇ ਹੈ।
ਇਤਿਹਾਸ, ਤਕਨਾਲੋਜੀ ਅਤੇ ਨਵੇਂ ਸੁਪਨਿਆਂ ਦਾ ਵਿਸ਼ਵ ਕੱਪ
ਜਲੰਧਰ, 4 ਜੁਲਾਈ (ਡਾ. ਜਤਿੰਦਰ ਸਾਬੀ)-ਫੀਫਾ ਵਿਸ਼ਵ ਕੱਪ 2026 ਸਿਰਫ਼ ਇਕ ਫੁੱਟਬਾਲ ਟੂਰਨਾਮੈਂਟ ਨਹੀਂ, ਸਗੋਂ ਬਦਲਦੇ ਵਿਸ਼ਵ ਦੀ ਤਸਵੀਰ ਹੈ। ਇਸ ਵਾਰ ਮੈਦਾਨ ’ਚ ਸਿਰਫ਼ ਗੋਲ ਨਹੀਂ ਹੋ ਰਹੇ, ਸਗੋਂ ਨਵੇਂ ਰਿਕਾਰਡ ਬਣ ਰਹੇ ਹਨ, ਵਿਗਿਆਨ ਖੇਡ ਦਾ ਹਿੱਸਾ ਬਣ ਰਿਹਾ ਹੈ ਤੇ ਛੋਟੇ ਦੇਸ਼ ਦੁਨੀਆ ਦੀਆਂ ਵੱਡੀਆਂ ਤਾਕਤਾਂ ਨੂੰ ਚੁਣੌਤੀ ਦੇ ਰਹੇ ਹਨ। ਛੋਟੇ ਦੇਸ਼ਾਂ ਦਾ ਵੱਡਾ ਦਮ ਦੇਖਣ ਨੂੰ ਮਿਲਿਆ ਹੈ। ਕਈ ਛੋਟੇ ਤੇ ਉਭਰਦੇ ਫੁੱਟਬਾਲ ਦੇਸ਼ਾਂ ਜਿਵੇਂ ਕਿ ਕੇਪ ਵਰਡੇ ਨੇ ਰਵਾਇਤੀ ਤਾਕਤਾਂ (ਜਿਵੇਂ ਅਰਜਨਟੀਨਾ) ਨੂੰ ਸਖ਼ਤ ਟੱਕਰ ਦੇ ਕੇ ਸਾਬਤ ਕੀਤਾ ਕਿ ਹੁਣ ਵਿਸ਼ਵ ਫੁੱਟਬਾਲ ਦਾ ਨਕਸ਼ਾ ਬਦਲ ਰਿਹਾ ਹੈ। ਇਸ ਵਿਸ਼ਵ ਕੱਪ ’ਚ ਅਫ਼ਰੀਕੀ ਟੀਮਾਂ ਨੇ ਆਪਣੀ ਗਤੀ, ਤਾਕਤ ਤੇ ਨਿਡਰ ਫੁੱਟਬਾਲ ਨਾਲ ਦੁਨੀਆ ਨੂੰ ਪ੍ਰਭਾਵਿਤ ਕੀਤਾ। ਉਹ ਹੁਣ ਸਿਰਫ਼ ਹਿੱਸਾ ਲੈਣ ਨਹੀਂ, ਸਗੋਂ ਖਿਤਾਬ ਜਿੱਤਣ ਦੀ ਸੋਚ ਨਾਲ ਮੈਦਾਨ ’ਚ ਉਤਰ ਰਹੀਆਂ ਹਨ। ਵੀ.ਏ.ਆਰ ਦੇ ਰਾਹੀਂ ਲਏ ਗਏ ਕਈ ਅਹਿਮ ਫ਼ੈਸਲਿਆਂ ਨੇ ਫਿਰ ਸਵਾਲ ਖਡ਼੍ਹੇ ਕੀਤੇ ਕਿ ਕੀ ਤਕਨਾਲੋਜੀ ਹਮੇਸ਼ਾ ਵਿਵਾਦ ਖ਼ਤਮ ਕਰ ਸਕਦੀ ਹੈ ਜਾਂ ਨਵੇਂ ਵਿਵਾਦ ਵੀ ਜਨਮ ਲੈਂਦੇ ਰਹਿਣਗੇ।