ਹਾਕੀ ਵਿਸ਼ਵ ਕੱਪ-2026 ’ਚ 28 ਸਾਲਾਂ ਬਾਅਦ ਕੋਈ ਭਾਰਤੀ ਅੰਪਾਇਰ ਨਹੀਂ
ਜਲੰਧਰ, 6 ਅਗਸਤ (ਡਾ. ਜਤਿੰਦਰ ਸਾਬੀ)-ਤਿੰਨ ਦਹਾਕਿਆਂ ’ਚ ਪਹਿਲੀ ਵਾਰ ਨੀਂਦਰਲੈਂਡਜ਼ ਤੇ ਬੈਲਜੀਅਮ ’ਚ 15 ਅਗਸਤ ਤੋਂ ਸ਼ੁਰੂ ਹੋਣ ਵਾਲੇ ਵਿਸ਼ਵ ਕੱਪ ਲਈ ਕਿਸੇ ਵੀ ਭਾਰਤੀ ਅੰਪਾਇਰ ਦੀ ਚੋਣ ਨਹੀਂ ਕੀਤੀ ਗਈ।
ਜਲੰਧਰ, 6 ਅਗਸਤ (ਡਾ. ਜਤਿੰਦਰ ਸਾਬੀ)-ਤਿੰਨ ਦਹਾਕਿਆਂ ’ਚ ਪਹਿਲੀ ਵਾਰ ਨੀਂਦਰਲੈਂਡਜ਼ ਤੇ ਬੈਲਜੀਅਮ ’ਚ 15 ਅਗਸਤ ਤੋਂ ਸ਼ੁਰੂ ਹੋਣ ਵਾਲੇ ਵਿਸ਼ਵ ਕੱਪ ਲਈ ਕਿਸੇ ਵੀ ਭਾਰਤੀ ਅੰਪਾਇਰ ਦੀ ਚੋਣ ਨਹੀਂ ਕੀਤੀ ਗਈ। ਭਾਰਤੀ ਦਿੱਗਜਾਂ ਨੇ ਨਿਰਾਸ਼ਾ ਪ੍ਰਗਟ ਕੀਤੀ ਕਿਹਾ ਕਿ ਅੰਪਾਇਰਾਂ ਦੀ ਗਿਣਤੀ ਵਧਾਉਣ ਦੀ ਬਜਾਏ ਗੁਣਵੱਤਾ ’ਤੇ ਧਿਆਨ ਕੇਂਦਰਿਤ ਕੀਤਾ ਜਾਣਾ ਚਾਹੀਦਾ ਹੈ। ਨੀਦਰਲੈਂਡਜ਼ ਦੇ ਉਟਰੇਕਟ ’ਚ 1998 ਦੇ ਵਿਸ਼ਵ ਕੱਪ ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਕਿ ਟੂਰਨਾਮੈਂਟ ਦੇ ਅੰਪਾਇਰਾਂ ਜਾਂ ਤਕਨੀਕੀ ਅਧਿਕਾਰੀਆਂ ’ਚ ਕਿਸੇ ਵੀ ਭਾਰਤੀ ਨੂੰ ਸ਼ਾਮਲ ਨਹੀਂ ਕੀਤਾ ਗਿਆ ਹੈ, ਜਿਸ ’ਚ ਸੂਚੀ ’ਚ ਯੂਰਪੀਅਨ ਦੇਸ਼ਾਂ ਦਾ ਦਬਦਬਾ ਹੈ। ਸਾਬਕਾ ਐਫ.ਆਈ.ਐਚ. ਪ੍ਰਧਾਨ ਨਰਿੰਦਰ ਧਰੁਵ ਬੱਤਰਾ ਨੇ ਇਸ ਮਾਮਲੇ ’ਤੇ ਗੰਭੀਰ ਇਤਰਾਜ਼ ਜਤਾਉਂਦੇ ਹੋਏ ਐਫ.ਆਈ.ਐਚ. ਦੀ ਚੋਣ ਪ੍ਰਕਿਰਿਆ ’ਤੇ ਸਵਾਲ ਉਠਾਏ ਹਨ। ਵਿਸ਼ਵ ਕੱਪ ’ਚ ਅੰਪਾਇਰਿੰਗ ਕਰਨ ਵਾਲੇ ਭਾਰਤੀ ਅੰਪਾਇਰਾਂ ’ਚ ਆਰਵੀ ਰਘੂ ਪ੍ਰਸਾਦ (2010, 2014, 2018, 2023), ਸਤਿੰਦਰ ਸ਼ਰਮਾ (2002, 2006, 2010), ਤਰਲੋਕ ਸਿੰਘ ਭੁੱਲਰ (1994), ਅਤੇ ਅਮਰਜੀਤ ਸਿੰਘ ਬਾਵਾ (1990) ਸ਼ਾਮਲ ਹਨ। ਮਈ 2025 ’ਚ ਹਾਕੀ ਇੰਡੀਆ ਦੀ ਵੈੱਬਸਾਈਟ ’ਤੇ ਅੱਪਡੇਟ ਕੀਤੀ ਗਈ ਸੂਚੀ ਦੇ ਅਨੁਸਾਰ, ਅੰਪਾਇਰਾਂ ਦੀਆਂ ਚਾਰ ਸ਼੍ਰੇਣੀਆਂ ਹਨ - ‘ਕੋਰ ਲੀਡਿੰਗ ਪੈਨਲ’, ‘ਲੀਡਿੰਗ ਪੈਨਲ’, ‘ਹਾਈ ਪੋਟੈਂਸ਼ੀਅਲ’, ਅਤੇ ‘ਨੈਸ਼ਨਲ ਅੰਪਾਇਰ’ - ਜਿਸ ’ਚ ਪੁਰਸ਼ਾਂ ਦੇ ਵਰਗ ਵਿਚ 100 ਤੋਂ ਵੱਧ ਅਤੇ ਮਹਿਲਾਵਾਂ ਦੇ ਵਰਗ ਵਿੱਚ 70 ਤੋਂ ਵੱਧ ਨਾਮ ਸ਼ਾਮਲ ਹਨ। ਪੁਰਸ਼ਾਂ ਦੇ ਵਰਗ ਵਿਚ ਐਫ਼. ਆਈ. ਐਚ. ਪੈਨਲ ’ਚ ਛੇ ਅੰਪਾਇਰ ਹਨ, ਹਾਲਾਂਕਿ ਰਘੂਪ੍ਰਸਾਦ ਪਿਛਲੇ ਸਾਲ ਸੇਵਾਮੁਕਤ ਹੋ ਗਏ ਸਨ। ਇਸ ਦੌਰਾਨ, ਮਹਿਲਾਵਾਂ ਦੇ ਵਰਗ ’ਚ ਚਾਰ ਐਫ਼.ਆਈ.ਐਚ.-ਪੈਨਲ ਅੰਪਾਇਰ ਹਨ। ਤਕਨੀਕੀ ਅਧਿਕਾਰੀਆਂ ’ਚ, ਮਹਿਲਾਵਾਂ ਦੇ ਵਰਗ ਵਿਚ ਇਨ੍ਹਾਂ ਚਾਰ ਸ਼੍ਰੇਣੀਆਂ ’ਚ 50 ਤੋਂ ਵੱਧ ਨਾਮ ਹਨ, ਫਿਰ ਵੀ ਸਿਰਫ਼ 2 - ਰੋਹਿਣੀ ਬੋਪੰਨਾ ਤੇ ਸੋਨੀਆ ਬਾਠਲਾ - ਐਫ਼.ਆਈ.ਐਚ. ਪੈਨਲ ਵਿਚ ਹਨ। ਪੁਰਸ਼ਾਂ ਦੇ ਵਰਗ ’ਚ, ਲਗਭਗ 70 ਨਾਮ ਹਨ, ਪਰ ਐਫ਼.ਆਈ.ਐਚ. ਪੈਨਲ ’ਚ ਸਿਰਫ਼ ਚਾਰ ਅਧਿਕਾਰੀ ਹਨ।
