ਲੰਡਨ, 3 ਫਰਵਰੀ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਯੂ.ਕੇ. ਦੀ ਸੰਸਦੀ ਜਾਂਚ ਰਿਪੋਰਟ ਦੇ ਅਨੁਸਾਰ ਭਾਰਤ ਨਾਲ 'ਇਤਿਹਾਸਕ' ਮੁਕਤ ਵਪਾਰ ਸਮਝੌਤਾ (ਐਫ.ਟੀ.ਏ.) ਅੰਤਰਰਾਸ਼ਟਰੀ ਵਪਾਰ ਤੇ ਨਿਯਮਾਂ-ਅਧਾਰਤ ਵਪਾਰ ਲਈ ਇਕ ਖਾਸ ਚੁਣੌਤੀਪੂਰਨ ਸਮੇਂ 'ਚ ਕਾਰੋਬਾਰਾਂ ਨੂੰ ਰਣਨੀਤਕ ਲਾਭ ਤੇ ਸਥਿਰਤਾ ਪ੍ਰਦਾਨ ਕਰਦਾ ਹੈ | ਹਾਊਸ ਆਫ ਲਾਰਡਸ ਇੰਟਰਨੈਸ਼ਨਲ ਐਗਰੀਮੈਂਟਸ ਕਮੇਟੀ ਨੇ ਪਿਛਲੇ ਜੁਲਾਈ 'ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਯੂ.ਕੇ. ਫੇਰੀ ਦੌਰਾਨ ਸਹਿਮਤੀ ਤੋਂ ਬਾਅਦ ਦੇ ਮਹੀਨਿਆਂ 'ਚ ਭਾਰਤ-ਯੂ.ਕੇ. ਆਰਥਿਕ ਤੇ ਵਪਾਰ ਸਮਝੌਤੇ (ਸੀ.ਈ.ਟੀ.ਏ.) ਦੀ ਆਪਣੀ ਸਮੀਖਿਆ ਸ਼ੁਰੂ ਕੀਤੀ ਸੀ | ਸੰਸਦ ਵਿੱਚ ਰੱਖੀਆਂ ਗਈਆਂ ਸਾਰੀਆਂ ਸੰਧੀਆਂ ਦੀ ਜਾਂਚ ਕਰਨ ਲਈ ਜਿaੰਮੇਵਾਰ ਕਰਾਸ-ਪਾਰਟੀ ਕਮੇਟੀ ਨੇ ਸੀ.ਈ.ਟੀ.ਏ. ਨੂੰ ਇਕ 'ਮਹੱਤਵਪੂਰਨ ਪ੍ਰਾਪਤੀ' ਵਜੋਂ ਸ਼ਲਾਘਾ ਕੀਤੀ ਹੈ | ਕਿਉਂਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਵਪਾਰ ਟੈਰਿਫਾਂ ਨਾਲ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਕਮੇਟੀ ਦੇ ਚੇਅਰਮੈਨ ਲਾਰਡ ਪੀਟਰ ਗੋਲਡਸਮਿਥ ਨੇ ਕਿਹਾ ਕਿ 'ਯੂ.ਕੇ. ਨੇ ਭੂ-ਰਾਜਨੀਤਿਕ ਗੜਬੜ ਦੇ ਸਮੇਂ ਇਕ ਮੁੱਖ ਰਣਨੀਤਕ ਭਾਈਵਾਲ ਨਾਲ ਇਕ ਇਤਿਹਾਸਕ ਸੌਦਾ ਕੀਤਾ ਹੈ | ਉਹਨਾਂ ਕਿਹਾ ਕਿ ਅਸੀਂ ਇਸ ਗੱਲ ਦਾ ਵੀ ਸਵਾਗਤ ਕਰਦੇ ਹਾਂ ਕਿ ਇਹ ਸਮਝੌਤਾ ਵਿਸ਼ਵ ਵਪਾਰ ਸੰਗਠਨ ਦੇ ਨਿਯਮਾਂ ਦੀ ਪਾਲਣਾ ਕਰਦਾ ਹੈ, ਕਿਉਂਕਿ ਨਿਯਮ-ਅਧਾਰਤ ਅੰਤਰਰਾਸ਼ਟਰੀ ਵਿਵਸਥਾ ਲਈ ਮੌਜੂਦਾ ਚੁਣੌਤੀਆਂ ਹਨ | ਇਹ ਇਕ ਮਹੱਤਵਪੂਰਨ ਪ੍ਰਾਪਤੀ ਹੈ ਤੇ ਸਰਕਾਰ ਨੂੰ ਇਹ ਯਕੀਨੀ ਬਣਾ ਕੇ ਇਸਦਾ ਲਾਭ ਉਠਾਉਣਾ ਚਾਹੀਦਾ ਹੈ ਕਿ ਕਾਰੋਬਾਰ ਇਸਨੂੰ ਅਭਿਆਸ 'ਚ ਵਰਤ ਸਕਦੇ ਹਨ | ਕਮੇਟੀ ਨੇ ਸਰਕਾਰ ਤੇ ਕਾਰੋਬਾਰਾਂ ਦੇ ਹਿੱਸੇਦਾਰਾਂ ਤੋਂ ਸਬੂਤਾਂ ਦੀ ਸਮੀਖਿਆ ਕਰਕੇ ਪਾਇਆ ਕਿ ਐਫ.ਟੀ.ਏ.ਯੂ.ਕੇ. ਦੇ ਕਾਰੋਬਾਰਾਂ ਲਈ ਮਦਦਗਾਰ ਹੋਵੇਗਾ ਕਿਉਂਕਿ ਉਹ ਆਪਣੀਆਂ ਸਪਲਾਈ ਚੇਨਾਂ ਨੂੰ ਵਿਭਿੰਨ ਬਣਾਉਣ ਅਤੇ ਖਤਰੇ ਤੋਂ ਮੁਕਤ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ | ਹਾਲਾਂਕਿ ਕਾਨੂੰਨੀ ਸੇਵਾਵਾਂ, ਨਿਵੇਸ਼ ਸੁਰੱਖਿਆ ਤੇ ਵਿੱਤੀ ਜਾਂ ਪੇਸ਼ੇਵਰ ਸੇਵਾਵਾਂ ਲਈ ਨਵੀਂ ਮਾਰਕੀਟ ਪਹੁੰਚ ਦੇ ਖੇਤਰਾਂ 'ਚ ਕੁਝ ਕਮੀਆਂ ਨੂੰ ਵੀ ਉਜਾਗਰ ਕੀਤਾ | ਇਸ ਰਿਪੋਰਟ 'ਤੇ ਹੁਣ ਅਗਲੇ ਮਹੀਨੇ ਦੇ ਸ਼ੁਰੂ 'ਚ ਉੱਚ ਸਦਨ ਦੁਆਰਾ ਬਹਿਸ ਕੀਤੀ ਜਾਵੇਗੀ | ਸੰਸਦੀ ਪ੍ਰਵਾਨਗੀ ਤੋਂ ਉਪਰੰਤ ਇਹ ਲਾਗੂ ਹੋ ਜਾਵੇਗਾ | ਇਕ ਵਾਰ ਸੀ.ਈ.ਟੀ.ਏ. ਲਾਗੂ ਹੋਣ ਤੋਂ ਬਾਅਦ, ਯੂ.ਕੇ. ਦੇ ਖਪਤਕਾਰ ਬਿਹਤਰ ਵਿਕਲਪ ਤੇ ਘੱਟ ਕੀਮਤਾਂ ਤੋਂ ਲਾਭ ਪ੍ਰਾਪਤ ਕਰਨ ਦੀ ਉਮੀਦ ਕਰਦੇ ਹਨ | ਭਾਰਤ-ਯੂ.ਕੇ. ਦੇ ਸਾਲਾਨਾ ਦੁਵੱਲੇ ਵਪਾਰ 'ਚ 25.5 ਅਰਬ ਪੌਂਡ ਦਾ ਵਾਧਾ ਹੋਣ ਦੀ ਉਮੀਦ ਹੈ | ਯੂ.ਕੇ. ਡਿਪਾਰਟਮੈਂਟ ਫਾਰ ਬਿਜ਼ਨਸ ਐਂਡ ਟ੍ਰੇਡ (ਡੀ.ਬੀ.ਟੀ.) ਦੁਆਰਾ 2025 ਵਿਚ ਲੌਗ ਕੀਤੇ ਗਏ 47.2 ਬਿਲੀਅਨ ਪੌਂਡ ਦਾ ਇਕ ਮਹੱਤਵਪੂਰਨ ਵਾਧਾ ਹੈ | ਬਿ੍ਟਿਸ਼ ਸੰਸਦ ਸਮਝੌਤੇ ਨੂੰ ਪ੍ਰਵਾਨਗੀ ਦੇਣ ਦੀ ਪ੍ਰਕਿਰਿਆ 'ਚ ਹੈ, ਸੰਸਦ ਮੈਂਬਰ ਤੇ ਸਾਥੀ ਆਉਣ ਵਾਲੇ ਮਹੀਨਿਆਂ 'ਚ ਲਾਗੂ ਕੀਤੇ ਜਾਣ ਤੋਂ ਪਹਿਲਾਂ ਐਫ.ਟੀ.ਏ. ਦੇ ਸਾਰੇ ਪਹਿਲੂਆਂ 'ਤੇ ਬਹਿਸ ਕਰਨ ਲਈ ਤਿਆਰ ਹਨ |
