ਲੰਡਨ, 19 ਅਪ੍ਰੈਲ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-26 ਅਪ੍ਰੈਲ ਨੂੰ ਲੰਡਨ 'ਚ ਹੋਣ ਜਾ ਰਹੀ ਮੈਰਾਥਨ ਵਿਚ ਗੜ੍ਹਸ਼ੰਕਰ ਦੇ ਪਿੰਡ ਥਾਣਾ ਦੇ ਜੰਮਪਲ 80 ਸਾਲਾ ਬਲਦੇਵ ਸਿੰਘ ਬੈਂਸ ਪਹਿਲੀ ਵਾਰ ਹਿੱਸਾ ਲੈ ਰਹੇ ਹਨ | ਬੈਂਸ ਨੇ ਕਿਹਾ ਕਿ ਉਹਨਾਂ ਦੇ ਪ੍ਰੇਰਣਾ ਸਰੋਤ ਬਾਬਾ ਫੌਜਾ ਸਿੰਘ ਹਨ, ਤੇ ਉਹਨਾਂ ਦੇ ਕੋਚ ਹਰਮੰਦਰ ਸਿੰਘ ਹੀ ਬੈਂਸ ਨੂੰ ਅਭਿਆਸ ਕਰਵਾ ਰਹੇ ਹਨ | 'ਅਜੀਤ' ਨਾਲ ਗੱਲ ਕਰਦਿਆਂ ਬਲਦੇਵ ਸਿੰਘ ਨੇ ਕਿਹਾ ਕਿ ਉਹ ਬਾਬਾ ਫੌਜਾ ਸਿੰਘ ਦੀ ਯਾਦ ਵਿਚ ਬਣ ਰਹੇ ਰੈਡਬਿ੍ਜ਼ ਵਿਚ ਫੌਜਾ ਸਿੰਘ ਕਲੱਬ ਹਾਊਸ ਲਈ ਫੰਡ ਇਕੱਠਾ ਕਰ ਰਹੇ ਹਨ | ਇਸ ਮੈਰਾਥਨ ਵਿਚ ਉਹਨਾਂ ਨਾਲ 10 ਹੋਰ ਸਾਥੀ ਵੀ ਹਨ | ਬਲਦੇਵ ਸਿੰਘ ਬੈਂਸ ਅਤੇ ਬਾਬਾ ਫੌਜਾ ਸਿੰਘ ਲੰਡਨ ਵਿਚ ਇੱਕੋ ਸ਼ਹਿਰ ਵਿੱਚ ਰਹਿੰਦੇ ਸਨ ਤੇ ਦੋਵੇਂ ਇੱਕ ਦੂਜੇ ਨੂੰ ਜਾਣਦੇ ਸਨ | ਬੈਂਸ ਨੇ ਕਿਹਾ ਕਿ ਫੌਜਾ ਸਿੰਘ ਨੇ 89 ਸਾਲ ਦੀ ਉਮਰ ਵਿਚ ਪਹਿਲੀ ਮੈਰਾਥਨ ਦੌੜੀ ਸੀ, ਉਹਨਾਂ ਨੇ ਹੀ ਮੈਨੂੰ ਤੁਰਨਾ ਤੇ ਖੁਰਾਕ ਬਦਲਣ ਦਾ ਸੁਝਾਅ ਦਿੱਤਾ ਸੀ | ਉਸ ਸਮੇਂ ਮੈਂ ਕਈ ਤਰ੍ਹਾਂ ਦੀਆਂ ਸਿਹਤ ਸਮੱਸਿਆਵਾਂ ਨਾਲ ਜੂਝ ਰਿਹਾ ਸੀ | ਜਦ ਕਿ ਮੈਂ ਹੁਣ ਪੂਰੀ ਤਰ੍ਹਾਂ ਤਿਆਰ ਹਾਂ ਸਾਡਾ ਕੋਚ ਹਰਮੰਦਰ ਸਿੰਘ ਵੀ ਲੰਡਨ ਮੈਰਾਥਨ ਵਿਚ ਹਿੱਸਾ ਲੈ ਰਹੇ ਹਨ |
