ਅਮਰੀਕਾ ’ਚ ਈ.ਐਲ.ਡੀ. ਧੋਖਾਧੜੀ ਰੋਕਣ ਲਈ ‘ਗੋਸਟਟਰਕ ਐਕਟ’ ਪੇਸ਼, ਵਿਦੇਸ਼ਾਂ ਤੋਂ ਰਿਕਾਰਡਾਂ ਨਾਲ ਛੇੜਛਾੜ ’ਤੇ ਸਖ਼ਤੀ ਦੀ ਤਿਆਰੀ
ਅਜੀਤ ਡੈਸਕ
04-07-2026
ਸੰਸਦ ਮੈਂਬਰਾਂ ਦਾ ਦੋਸ਼ ਹੈ ਕਿ ਕੁਝ ਟਰੱਕਿੰਗ ਕੰਪਨੀਆਂ ਵਿਦੇਸ਼ੀ ਡਿਸਪੈਚਰਾਂ ਰਾਹੀਂ ਡਰਾਈਵਰਾਂ ਦੇ ਈ.ਐਲ.ਡੀ. ਰਿਕਾਰਡਾਂ ਵਿੱਚ ਤਬਦੀਲੀਆਂ ਕਰਵਾਉਂਦੀਆਂ ਹਨ। ਦੋਸ਼ਾਂ ਅਨੁਸਾਰ ਕਈ ਮਾਮਲਿਆਂ ਵਿੱਚ ਡਰਾਈਵਰਾਂ ਦੇ ਅਸਲ ਕੰਮ ਦੇ ਘੰਟੇ ਘੱਟ ਦਿਖਾਏ ਜਾਂਦੇ ਹਨ ਜਾਂ ਰਿਕਾਰਡ ਇਸ ਤਰ੍ਹਾਂ ਬਦਲੇ ਜਾਂਦੇ ਹਨ ਕਿ ਡਰਾਈਵਰ ਕਾਨੂੰਨੀ ਹੱਦ ਤੋਂ ਵੱਧ ਸਮਾਂ ਟਰੱਕ ਚਲਾ ਸਕਣ। ਇਸ ਨਾਲ ਡਰਾਈਵਰਾਂ ਤੋਂ ਵੱਧ ਕੰਮ ਲਿਆ ਜਾਂਦਾ ਹੈ, ਕਈ ਵਾਰ ਉਨ੍ਹਾਂ ਨੂੰ ਘੱਟ ਤਨਖ਼ਾਹ ਮਿਲਦੀ ਹੈ ਅਤੇ ਥਕਾਵਟ ਕਾਰਨ ਹਾਦਸਿਆਂ ਦਾ ਖ਼ਤਰਾ ਵੀ ਵਧ ਜਾਂਦਾ ਹੈ। ਐਫ਼.ਐਮ.ਐਸ.ਸੀ.ਏ. ਦੇ ਨਿਯਮਾਂ ਅਨੁਸਾਰ ਹਰ ਵਪਾਰਕ ਟਰੱਕ ਵਿੱਚ ਈ.ਐਲ.ਡੀ. ਲਗਾਉਣਾ ਲਾਜ਼ਮੀ ਹੈ। ਇਹ ਡਿਵਾਈਸ ਡਰਾਈਵਰ ਦੇ ਡਰਾਈਵਿੰਗ ਅਤੇ ਡਿਊਟੀ ਦੇ ਘੰਟਿਆਂ ਦਾ ਆਟੋਮੈਟਿਕ ਰਿਕਾਰਡ ਰੱਖਦੀ ਹੈ ਤਾਂ ਜੋ ਹਾਰਜ਼ ਆਫ ਸਰਵਿਸ ਨਿਯਮਾਂ ਦੀ ਪਾਲਣਾ ਹੋ ਸਕੇ ਅਤੇ ਥੱਕੇ ਹੋਏ ਡਰਾਈਵਰਾਂ ਕਾਰਨ ਹਾਦਸੇ ਘੱਟ ਹੋਣ। ਪਰ ਹਾਲੀਆ ਰਿਪੋਰਟਾਂ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਕੁਝ ਲੋਕ ਇਸ ਸਿਸਟਮ ਨਾਲ ਵੀ ਧੋਖਾਧੜੀ ਕਰ ਰਹੇ ਹਨ। ਇਸ ਬਿੱਲ ਨੂੰ ਅਮਰੀਕਨ ਟਰੱਕਿੰਗ ਐਸੋਸੀਏਸ਼ਨ (ਏ.ਟੀ.ਏ.), ਓਨਰ-ਓਪਰੇਟਰ ਇੰਡੀਪੈਂਡੈਂਟ ਡਰਾਈਵਰਜ਼ ਐਸੋਸੀਏਸ਼ਨ, ਟਰੱਕਲੋਡ ਕੈਰੀਅਰਜ਼ ਐਸੋਸੀਏਸ਼ਨ ਅਤੇ ਨੈਸ਼ਨਲ ਮੋਟਰ ਫ੍ਰੇਟ ਟ੍ਰੈਫਿਕ ਐਸੋਸੀਏਸ਼ਨ ਸਮੇਤ ਕਈ ਟਰੱਕਿੰਗ ਸੰਸਥਾਵਾਂ ਦਾ ਸਮਰਥਨ ਮਿਲਿਆ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਈ.ਐਲ.ਡੀ. ਰਿਕਾਰਡਾਂ ਨਾਲ ਛੇੜਛਾੜ ਸੜਕ ਸੁਰੱਖਿਆ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ ਅਤੇ ਇਮਾਨਦਾਰੀ ਨਾਲ ਕੰਮ ਕਰਨ ਵਾਲੀਆਂ ਕੰਪਨੀਆਂ ਲਈ ਵੀ ਨੁਕਸਾਨਦਾਇਕ ਹੈ।
