ਨਿਪਾਲ ਦੀ ਤਬਾਹੀ ’ਚ 33 ਬਰਤਾਨਵੀ ਲੋਕ ਲਾਪਤਾ — ਲਾਪਤਾ ਹੋਏ ਲੋਕਾਂ ’ਚ 13 ਸਾਲ ਦੀ ਬੱਚੀ ਤੋਂ ਲੈ ਕੇ 65 ਸਾਲ ਦੇ ਯਾਤਰੀ ਸ਼ਾਮਿਲ

ਅ

ਅਜੀਤ ਡੈਸਕ 28-08-2026

ਲੈਸਟਰ(ਇੰਗਲੈਂਡ), 27 ਅਗਸਤ (ਸੁਖਜਿੰਦਰ ਸਿੰਘ ਢੱਡੇ)-ਨਿਪਾਲ-ਤਿੱਬਤ ਸਰਹੱਦ ’ਤੇ ਆਏ ਵਿਨਾਸ਼ਕਾਰੀ ਹੜ੍ਹਾਂ ਮਗਰੋਂ 33 ਬਰਤਾਨਵੀ ਨਾਗਰਿਕ ਲਾਪਤਾ ਹਨ, ਜਿਨ੍ਹਾਂ ’ਚ 13 ਸਾਲ ਦੀ ਲੜਕੀ ਤੇ 14 ਸਾਲ ਦਾ ਲੜਕਾ ਵੀ ਸ਼ਾਮਲ ਹਨ। ਲਾਪਤਾ ਬਰਤਾਨਵੀਆਂ ਵਿੱਚੋਂ ਵੱਡੀ ਗਿਣਤੀ ਲੋਕ ਮਾਊਂਟ ਕੈਲਾਸ਼ ਦੀ ਧਾਰਮਿਕ ਯਾਤਰਾ ਲਈ ਵੱਖ-ਵੱਖ ਟੂਰ ਕੰਪਨੀਆਂ ਨਾਲ ਗਏ ਹੋਏ ਸਨ। ਅਲਪਾਈਨ ਈਕੋ ਟ੍ਰੈਕ ਮੁਤਾਬਕ ਉਸ ਦੇ 12 ਬਰਤਾਨਵੀ ਯਾਤਰੀਆਂ ਨਾਲ ਸੰਪਰਕ ਟੁੱਟਿਆ ਹੋਇਆ ਹੈ, ਜਿਨ੍ਹਾਂ ਦੀ ਉਮਰ 13 ਤੋਂ 65 ਸਾਲ ਵਿਚਕਾਰ ਹੈ ਅਤੇ ਇਨ੍ਹਾਂ ਨਾਲ ਗਏ ਚਾਰ ਨਿਪਾਲੀ ਗਾਈਡ ਵੀ ਲਾਪਤਾ ਹਨ; ਕੰਪਨੀ ਦਾ ਗਾਈਡਾਂ ਨਾਲ ਆਖਰੀ ਸੰਪਰਕ ਬੁੱਧਵਾਰ ਸਵੇਰੇ ਕਰੀਬ 8.40 ਵਜੇ ਹੋਇਆ ਸੀ, ਜਦੋਂ ਉਨ੍ਹਾਂ ਦੇ ਤਿੱਬਤ ਦੇ ਇਮੀਗ੍ਰੇਸ਼ਨ ਦਫ਼ਤਰ ਨੇੜੇ ਹੋਣ ਦੀ ਉਮੀਦ ਸੀ। ਟ੍ਰੈਕਰਜ਼ ਸੁਸਾਇਟੀ ਦੇ 9 ਬਰਤਾਨਵੀ ਯਾਤਰੀ ਵੀ ਲਾਪਤਾ ਹਨ, ਜਿਨ੍ਹਾਂ ਵਿਚ 14 ਤੋਂ 50 ਸਾਲ ਉਮਰ ਦੇ ਚਾਰ ਪੁਰਸ਼ ਤੇ 40 ਤੋਂ 53 ਸਾਲ ਉਮਰ ਦੀਆਂ ਪੰਜ ਔਰਤਾਂ ਸ਼ਾਮਲ ਹਨ ਅਤੇ ਹੜ੍ਹ ਵੇਲੇ ਇਹ ਜਥਾ ਚੀਨੀ ਇਮੀਗ੍ਰੇਸ਼ਨ ਕੋਲ ਦੱਸਿਆ ਗਿਆ ਸੀ। ਹਿਮਾਲਿਅਨ ਗਲੇਸ਼ੀਅਰ ਯੂਐੱਸ ਨੇ ਮਾਊਂਟ ਕੈਲਾਸ਼ ਜਾ ਰਹੇ 47 ਮਹਿਮਾਨਾਂ ਅਤੇ ਸਟਾਫ਼ ਦੇ ਜਥੇ ਨਾਲ ਸੰਪਰਕ ਟੁੱਟਣ ਦੀ ਜਾਣਕਾਰੀ ਦਿੱਤੀ ਹੈ, ਜਿਸ ਵਿੱਚ ਦੋ ਬਰਤਾਨਵੀ ਨਾਗਰਿਕ ਹਨ, ਜਦਕਿ ਕੈਲਾਸ਼ ਜਰਨੀਜ਼ ਦੇ 27 ਮੈਂਬਰੀ ਜਥੇ ਵਿੱਚ ਸ਼ਾਮਲ ਦੋ ਬਰਤਾਨਵੀ ਪੁਰਸ਼ਾਂ ਅਤੇ ਫਿਸ਼ਟੇਲ ਟੂਰਜ਼ ਨਾਲ ਸਬੰਧਤ ਇੱਕ ਹੋਰ ਬਰਤਾਨਵੀ ਨਾਗਰਿਕ ਦਾ ਵੀ ਕੋਈ ਪਤਾ ਨਹੀਂ ਲੱਗ ਰਿਹਾ; ਬਾਕੀ ਲਾਪਤਾ ਬਰਤਾਨਵੀਆਂ ਬਾਰੇ ਵਿਸਥਾਰਤ ਜਾਣਕਾਰੀ ਅਜੇ ਜਨਤਕ ਨਹੀਂ ਕੀਤੀ ਗਈ। ਪ੍ਰਭਾਵਿਤ ਖੇਤਰ ਵਿੱਚ ਪੁਲ ਅਤੇ ਸੜਕਾਂ ਟੁੱਟਣ, ਬਿਜਲੀ ਤੇ ਸੰਚਾਰ ਸੇਵਾਵਾਂ ਠੱਪ ਹੋਣ ਅਤੇ ਖਰਾਬ ਮੌਸਮ ਕਾਰਨ ਲਾਪਤਾ ਲੋਕਾਂ ਤੱਕ ਪਹੁੰਚਣ ਵਿੱਚ ਭਾਰੀ ਮੁਸ਼ਕਲ ਆ ਰਹੀ ਹੈ। ਬਰਤਾਨਵੀ ਵਿਦੇਸ਼ ਦਫ਼ਤਰ ਨੇ ਕਿਹਾ ਹੈ ਕਿ ਉਹ ਨੇਪਾਲੀ ਅਧਿਕਾਰੀਆਂ ਨਾਲ ਮਿਲ ਕੇ ਲਾਪਤਾ ਨਾਗਰਿਕਾਂ ਬਾਰੇ ਜਾਣਕਾਰੀ ਹਾਸਲ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਜਦਕਿ ਬਰਤਾਨੀਆ ਨੇ ਨੇਪਾਲ ਨੂੰ 50 ਲੱਖ ਪੌਂਡ ਦੀ ਮਦਦ ਦੇ ਨਾਲ ਖੋਜ ਅਤੇ ਬਚਾਅ ਕਾਰਜਾਂ ਵਿੱਚ ਸਹਾਇਤਾ ਦੀ ਪੇਸ਼ਕਸ਼ ਕੀਤੀ ਹੈ। ਨਿਪਾਲ ਪੁਲਿਸ ਮੁਤਾਬਕ ਹੜ੍ਹਾਂ ਕਾਰਨ ਮੌਤਾਂ ਦੀ ਗਿਣਤੀ 359 ਤੱਕ ਪਹੁੰਚ ਗਈ ਹੈ ਅਤੇ 1,300 ਤੋਂ ਵੱਧ ਲੋਕ ਲਾਪਤਾ ਹਨ, ਜਦਕਿ ਨਿਪਾਲ ਟੂਰਿਜ਼ਮ ਬੋਰਡ ਅਨੁਸਾਰ 644 ਸੈਲਾਨੀਆਂ ਨਾਲ ਸੰਪਰਕ ਨਹੀਂ ਹੋ ਰਿਹਾ।