ਬਰਤਾਨੀਆ ’ਚ ਤਕਨੀਕੀ ਖਰਾਬੀ ਕਾਰਨ 300 ਤੋਂ ਵੱਧ ਉਡਾਣਾਂ ਰੱਦ

ਅ

ਅਜੀਤ ਡੈਸਕ 09-09-2026

ਲੰਡਨ, 8 ਸਤੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਬਰਤਾਨੀਆ ਦੇ ਏਅਰ ਟ੍ਰੈਫਿਕ ਕੰਟਰੋਲ ਸਿਸਟਮ ਵਿਚ ਆਈ ਵੱਡੀ ਤਕਨੀਕੀ ਖ਼ਰਾਬੀ ਕਾਰਨ ਹਵਾਈ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ ਹੈ। ਦੇਸ਼ ਦੇ ਕਈ ਪ੍ਰਮੁੱਖ ਹਵਾਈ ਅੱਡਿਆਂ ’ਤੇ ਸੈਂਕੜੇ ਉਡਾਣਾਂ ਰੱਦ ਜਾਂ ਦੇਰੀ ਦਾ ਸ਼ਿਕਾਰ ਹੋਈਆਂ, ਜਿਸ ਕਾਰਨ ਹਜ਼ਾਰਾਂ ਯਾਤਰੀਆਂ ਨੂੰ ਭਾਰੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ।ਫਲਾਈਟ ਟ੍ਰੈਕਿੰਗ ਸੇਵਾ ਫਲਾਈਟ ਰਾਡਾਰ ਦੇ ਅੰਕੜਿਆਂ ਮੁਤਾਬਕ ਪਹਿਲਾਂ ਹੀ ਕਰੀਬ 300 ਉਡਾਣਾਂ ਰੱਦ ਹੋ ਚੁੱਕੀਆਂ ਸਨ। ਇਨ੍ਹਾਂ ਵਿਚ ਬ੍ਰਿਟਿਸ਼ ਏਅਰਵੇਜ਼ ਦੀਆਂ 96, ਇਜ਼ੀ ਜੈੱਟ ਦੀਆਂ 92, ਕੇ.ਐੱਲ.ਐਮ. ਦੀਆਂ 20, ਲੁਫਥਾਨਸਾ ਦੀਆਂ 12 ਅਤੇ ਸਵਿਸ ਏਅਰ ਦੀਆਂ 11 ਉਡਾਣਾਂ ਸ਼ਾਮਿਲ ਹਨ।ਇਸ ਤੋਂ ਇਲਾਵਾ ਰਾਇਨਏਅਰ ਨੇ 50 ਤੋਂ ਵੱਧ ਨਿਰਧਾਰਤ ਉਡਾਣਾਂ ਰੱਦ ਕਰਨ ਦਾ ਐਲਾਨ ਕੀਤਾ, ਜਿਸ ਨਾਲ ਇਕੱਲੇ ਰਾਇਨਏਅਰ ਦੇ ਹੀ 65,000 ਤੋਂ ਵੱਧ ਯਾਤਰੀ ਪ੍ਰਭਾਵਿਤ ਹੋਣ ਦੀ ਗੱਲ ਕਹੀ ਗਈ। ਇਸ ਤਰ੍ਹਾਂ ਰੱਦ ਹੋਈਆਂ ਉਡਾਣਾਂ ਦੀ ਕੁੱਲ ਗਿਣਤੀ 300 ਤੋਂ ਪਾਰ ਪਹੁੰਚ ਗਈ।ਲੰਡਨ ਦੇ ਹੀਥਰੋ ਏਅਰਪੋਰਟ ’ਤੇ 100 ਉਡਾਣਾਂ ਰੱਦ ਅਤੇ 367 ਉਡਾਣਾਂ ਦੇਰੀ ਨਾਲ ਚੱਲਣ ਦੀ ਜਾਣਕਾਰੀ ਸਾਹਮਣੇ ਆਈ, ਜਦਕਿ ਗੈਟਵਿਕ ਏਅਰਪੋਰਟ ’ਤੇ ਕਰੀਬ 250 ਉਡਾਣਾਂ ਦੇਰੀ ਨਾਲ ਚੱਲੀਆਂ। ਸਟੈਨਸਟੈਡ ਸਮੇਤ ਹੋਰ ਹਵਾਈ ਅੱਡਿਆਂ ’ਤੇ ਵੀ ਯਾਤਰੀਆਂ ਦੇ ਜਹਾਜ਼ਾਂ ਅੰਦਰ ਅਤੇ ਟਰਮੀਨਲਾਂ ’ਤੇ ਲੰਬੇ ਸਮੇਂ ਤੱਕ ਫਸੇ ਰਹਿਣ ਦੀਆਂ ਰਿਪੋਰਟਾਂ ਮਿਲੀਆਂ।ਬਰਤਾਨੀਆ ਦੀ ਰਾਸ਼ਟਰੀ ਹਵਾਬਾਜ਼ੀ ਟ੍ਰੈਫ਼ਿਕ ਸਰਵਿਸ ਨੇ ਕਿਹਾ ਕਿ ਸਮੱਸਿਆ ਦੀ ਪਛਾਣ ਉਸਦੇ ਫਲਾਈਟ ਪ੍ਰੋਸੈਸਿੰਗ ਸਿਸਟਮ ਵਿਚ ਹੋਈ ਹੈ। ਇੰਜੀਨੀਅਰ ਤਕਨੀਕੀ ਖਰਾਬੀ ਨੂੰ ਦੂਰ ਕਰਕੇ ਆਮ ਸੇਵਾਵਾਂ ਬਹਾਲ ਕਰਨ ਲਈ ਕੰਮ ਕਰ ਰਹੇ ਹਨ।ਰਾਸ਼ਟਰੀ ਹਵਾਬਾਜ਼ੀ ਟ੍ਰੈਫ਼ਿਕ ਸਰਵਿਸ ਨੇ ਯਾਤਰੀਆਂ ਤੋਂ ਮੁਆਫ਼ੀ ਮੰਗਦਿਆਂ ਕਿਹਾ ਕਿ ਹਵਾਈ ਖੇਤਰ ਖੁੱਲ੍ਹਾ ਹੈ ਅਤੇ ਉਡਾਣਾਂ ਚੱਲ ਰਹੀਆਂ ਹਨ, ਪਰ ਸਥਿਤੀ ਪੂਰੀ ਤਰ੍ਹਾਂ ਆਮ ਹੋਣ ਵਿੱਚ ਸਮਾਂ ਲੱਗ ਸਕਦਾ ਹੈ।