ਵਧੀਆ ਲੇਖ
ਦਵਿੰਦਰ ਕੌਰ ਖੁਸ਼ ਧਾਲੀਵਾਲ ਦੁਆਰਾ ਲਿਖਿਆ ਲੇਖ 'ਮਾਨਸਿਕ ਤਣਾਅ ਹੇਠ ਕੰਮ ਕਰਨ ਲਈ ਮਜਬੂਰ ਹਨ ਅਧਿਆਪਕ' ਬਹੁਤ ਵਧੀਆ ਲੱਗਾ | ਲੇਖਿਕਾ ਨੇ ਬਹੁਤ ਵਿਸਥਾਰ ਨਾਲ ਅਧਿਆਪਕ ਤੋਂ ਕਰਵਾਏ ਜਾ ਰਹੇ ਗੈਰ- ਵਿੱਦਿਅਕ ਕੰਮਾਂ ਦਾ ਜ਼ਿਕਰ ਕੀਤਾ ਹੈ | ਇਹ ਗੱਲ ਬਿਲਕੁਲ ਸੋਲਾਂ ਆਨੇ ਸਹੀ ਹੈ | ਅਧਿਆਪਕ ਦਾ ਕੇਂਦਰ ਬਿੰਦੂ ਉਸ ਦੇ ਵਿਦਿਆਰਥੀ ਹੁੰਦੇ ਹਨ, ਜਿਨ੍ਹਾਂ ਨੂੰ ਸਿੱਖਿਆ ਦੇ ਕੇ ਉਸ ਨੇ ਸਮਾਜ ਦੇ ਜ਼ਿੰਮੇਵਾਰ ਨਾਗਰਿਕ ਬਣਾਉਣਾ ਹੁੰਦਾ ਹੈ | ਅਧਿਆਪਕ ਸਿਰ ਵਿਦਿਆਰਥੀਆਂ ਦਾ ਭਵਿੱਖ ਸੰਵਾਰਨ ਦੀ ਬਹੁਤ ਵੱਡੀ ਜ਼ਿੰਮੇਵਾਰੀ ਹੁੰਦੀ ਹੈ | ਅਧਿਆਪਕ ਕੀ ਕਰੇ? ਕਿੱਧਰ- ਕਿੱਧਰ ਹੋਵੇ? ਉਹ ਅੱਧੀ-2 ਰਾਤ ਤੱਕ ਡਾਟੇ ਭਰਨ ਲਈ ਮਜਬੂਰ ਹੈ | ਉਹ ਵਿਦਿਆਰਥੀਆਂ ਨੂੰ ਉਹ ਸਮਾਂ ਨਹੀ ਦੇ ਪਾਉਂਦਾ, ਜੋ ਉਹ ਦੇਣਾ ਚਾਹੁੰਦਾ ਹੈ, ਜਾਂ ਉਸ ਨੂੰ ਦੇਣਾ ਚਾਹੀਦਾ ਹੈ | ਅਸਲ ਰੂਪ ਵਿਚ ਸਿੱਖਿਆ ਕ੍ਰਾਂਤੀ ਉਦੋਂ ਹੀ ਆਵੇਗੀ, ਜਦੋਂ ਅਧਿਆਪਕ ਆਪਣਾ ਪੂਰਾ ਸਮਾਂ ਜਮਾਤਾਂ ਵਿਚ ਪੜ੍ਹਾਉਣ ਨੂੰ ਦੇਵੇਗਾ | ਸਰਕਾਰ ਨੂੰ ਚਾਹੀਦਾ ਹੈ ਕਿ ਗੈਰ-ਵਿੱਦਿਅਕ ਕੰਮ ਕਰਵਾਉਣ ਲਈ ਪੜ੍ਹੇ-ਲਿਖੇ ਲੋਕਾਂ ਨੂੰ ਰੁਜ਼ਗਾਰ ਦੇਵੇ, ਜਿਹੜੇ ਬੇਰੁਜ਼ਗਾਰ ਹਨ | ਉਨ੍ਹਾਂ ਨੂੰ ਕੰਮ ਮਿਲੇਗਾ, ਅਧਿਆਪਕਾਂ ਨੂੰ ਪੜ੍ਹਾਉਣ ਨਾਲ ਸੁੱਖ ਦਾ ਸਾਹ ਆਵੇਗਾ | ਵਿਦਿਆਰਥੀਆਂ ਨੂੰ ਅਧਿਆਪਕ ਮਿਲਣਗੇ, ਜਿਹੜੇ ਸਿਰਫ ਤੇ ਸਿਰਫ਼ ਉਨ੍ਹਾਂ ਲਈ ਨਿਯੁਕਤ ਕੀਤੇ ਗਏ ਹਨ |
-ਰਾਜ ਕੌਰ ਕਮਾਲਪੁਰ,
ਪਟਿਆਲਾ |
ਸੰਘਰਸ਼ ਸਮੇਂ ਹੋਸ਼ ਜ਼ਰੂਰੀ
ਸੰਘਰਸ਼ ਕਰਦੇ ਸਮੇਂ ਆਪਣੇ ਜੋਸ਼ ਤੇ ਹੋਸ਼ ਨੂੰ ਕਾਬੂ 'ਚ ਰੱਖੋ | ਜੇਕਰ ਤੁਸੀਂ ਇਨ੍ਹਾਂ 'ਤੇ ਕਾਬੂ ਨਹੀਂ ਰੱਖਦੇ ਤਾ ਚੰਗੇ ਨਤੀਜੇ ਦੀ ਆਸ ਨਹੀਂ ਰੱਖੀ ਜਾ ਸਕਦੀ | ਸੰਘਰਸ਼ ਦੀ ਜਿੱਤ ਦੇ ਇਹ ਦੋ ਵੱਡੇ ਨੁਕਤੇ ਹਨ | ਇਸ ਲਈ ਸੰਘਰਸ਼ ਕਾਰਜਾਂ ਦੀ ਸ਼ੁਰੂਆਤ ਕਰਨ ਸਮੇਂ ਇਨ੍ਹਾਂ ਨੁਕਤਿਆਂ ਨੂੰ ਧਿਆਨ 'ਚ ਰੱਖ ਕੇ ਅੱਗੇ ਵਧੋ | ਹਾਂ, ਇਹ ਵੀ ਜ਼ਰੂਰੀ ਹੈ ਕਿ ਸੰਘਰਸ਼ 'ਚ ਜੋਸ਼ ਦਾ ਹੋਣਾ ਤੇ ਹੋਸ਼ 'ਚ ਰਹਿਣਾ ਲਾਜ਼ਮੀ ਹੈ | ਤੁਹਾਡੀ ਜ਼ਰਾ ਜਿੰਨੀ ਦੀ ਕੁਤਾਹੀ ਤੁਹਾਡੇ ਸੰਘਰਸ਼ ਨੂੰ ਫੇਲ੍ਹ ਕਰ ਸਕਦੀ ਹੈ ਤੇ ਤੁਹਾਡੀਆਂ ਆਸਾਂ 'ਤੇ ਪਾਣੀ ਫੇਰ ਸਕਦੀ ਹੈ | ਅਗਰ ਤੁਸੀਂ ਇਨ੍ਹਾਂ ਨੁਕਤਿਆਂ 'ਤੇ ਕਾਬੂ ਨਹੀਂ ਰੱਖਦੇ ਤਾਂ ਤੁਹਾਡੇ ਵਲੋਂ ਲਏ ਫ਼ੈਸਲਿਆਂ ਦੇ ਗਲਤ ਨਤੀਜੇ ਨਿਕਲ ਸਕਦੇ ਹਨ | ਇਕ ਚੰਗੇ ਲੀਡਰ ਦੀ ਵੀ ਇਹੋ ਨਿਸ਼ਾਨੀ ਹੁੰਦੀ ਗਈ ਕਿ ਜੋਸ਼ ਤੇ ਹੋਸ਼ 'ਚ ਰਹਿੰਦਿਆਂ ਆਪਣੇ ਸੰਘਰਸ਼ ਕਾਰਜਾਂ ਨੂੰ ਅੱਗੇ ਵਧਾ ਕੇ ਜਿੱਤ ਹਾਸਿਲ ਕਰੇ |
-ਲੈਕਚਰਾਰ ਅਜੀਤ ਖੰਨਾ
ਫ਼ਲਾਂ ਦਾ ਰਾਜਾ ਅੰਬ
ਅੰਬ ਭਾਰਤ ਵਿਚ ਸਭ ਵੱਧ ਪੈਦਾ ਹੋਣ ਵਾਲਾ ਫਲ ਹੈ | ਅੰਬ ਦਾ ਰੁੱਖ ਧਰਤੀ ਦਾ ਸ਼ਿੰਗਾਰ ਹੈ ਅਤੇ ਅੰਬ ਨੂੰ ਫ਼ਲਾਂ ਦਾ ਰਾਜਾ ਕਿਹਾ ਜਾਂਦਾ ਹੈ | ਅੰਬ ਸਭ ਦਾ ਮਨ ਪਸੰਦ ਫਲ ਹੈ | ਇਸ ਰੁੱਤ 'ਚ ਇਹ ਫਲ ਆਮ ਲੋਕਾਂ ਦੀ ਖੁਰਾਕ ਦਾ ਹਿੱਸਾ ਬਣਦਾ ਹੈ | ਗਹਿਣਿਆਂ ਦੀ ਤਰ੍ਹਾਂ ਟਾਹਣੀਆਂ 'ਤੇ ਲਟਕੇ ਅੰਬ ਬਾਕਮਾਲ ਦਾ ਦਿ੍ਸ਼ ਬਣਾਉਂਦੇ ਹਨ | ਹਰੇ ਤੋਂ ਪੀਲੇ ਹੋ ਕੇ ਆਪਣੇ ਆਪ ਹੀ ਆਪਣੇ ਚਾਹੁਣ ਵਾਲੇ ਦੀ ਝੋਲੀ 'ਚ ਆ ਡਿੱਗਦੇ ਹਨ | ਫਲ ਸਾਡੇ ਨਾਲ ਹਮਦਰਦੀ ਰੱਖਦਿਆਂ ਹੋਇਆਂ ਕਈ ਕਿਸਮ ਸਰੀਰਕ ਰੋਗਾਂ ਦਾ ਇਲਾਜ ਕਰਦੇ ਹਨ | ਮੌਸਮੀ ਫਲਾਂ ਦੇ ਕਦਰਵਾਨ ਬਣੋ ਅਤੇ ਇਹ ਤੁਹਾਨੂੰ ਸਿਹਤ ਪੱਖੋਂ ਤੰਦਰੁਸਤ ਬਣਾਉਂਦੇ ਹਨ | ਸਿਹਤ ਲਈ ਮੌਸਮੀ ਫਲਾਂ ਦਾ ਫਾਇਦਾ ਉਠਾਉਣ 'ਚ ਹੀ ਫਾਇਦਾ ਹੈ | ਅੰਬ ਕਈ ਕਿਸਮ ਦੇ ਪੇਟ ਰੋਗਾਂ ਨੂੰ ਠੀਕ ਕਰਦਾ ਹੈ | ਇਹ ਰੁੱਖ ਫਲ ਦੇਣ ਦੇ ਨਾਲ-ਨਾਲ ਛਾਂ ਵੀ ਦਿੰਦਾ ਹੈ | ਕਾਦਰ ਦੀ ਕੁਦਰਤ ਦੀ ਮਹੱਤਤਾ ਨੂੰ ਸਮਝਦਿਆਂ ਅੰਬ ਦੇ ਰੁੱਖ ਵਧੇਰੇ ਲਾਓ | ਇਹ ਰੁੱਖ ਫਲ ਦੇਣ ਦੇ ਨਾਲ ਹਰਿਆਲੀ ਦੇ ਵਾਤਾਵਰਨ 'ਚ ਖੁਸ਼ਹਾਲੀ ਵੰਡਦਾ ਹੈ | ਇਸ ਰੁੱਤ 'ਚ ਵਧੇਰੇ ਰੁੱਖ ਲਾਉਂਦੇ ਰਹੋ | ਫੋਟੋਆਂ ਖਿਚਾਉਣ ਦੀ ਥਾਂ ਉਨ੍ਹਾਂ ਦੀ ਸਾਂਭ-ਸੰਭਾਲ ਕਰੋ |ਬਾਕੀ ਰੁੱਖ ਲਾਉਣ ਦੇ ਨਾਲ-ਨਾਲ ਅੰਬਾਂ ਦੇ ਬੂਟਿਆਂ ਦੇ ਧਰਤੀ 'ਤੇ ਅੰਬਾਰ ਲਾ ਦਿਓ |
-ਸਨੇਹਇੰਦਰ ਮੀਲੂ ਫਰੌਰ
ਜਿੱਤ ਦਾ ਪ੍ਰਤੀਕ ਕਾਰਗਿਲ ਵਿਜੈ ਦਿਵਸ
ਰਗਿਲ ਵਿਜੇ ਦਿਵਸ ਹਰ ਸਾਲ 26 ਜੁਲਾਈ ਨੂੰ ਭਾਰਤ ਵਿਚ ਬਹੁਤ ਸਤਿਕਾਰ ਨਾਲ ਮਨਾਇਆ ਜਾਂਦਾ ਹੈ | ਇਹ ਦਿਨ ਦੇਸ਼ ਦੇ ਬਹਾਦਰ ਸੈਨਿਕਾਂ ਦੀ ਕੁਰਬਾਨੀ ਅਤੇ ਜਿੱਤ ਦਾ ਪ੍ਰਤੀਕ ਹੈ | ਸਾਲ 1999 ਵਿਚ ਕਾਰਗਿਲ ਖੇਤਰ ਵਿਚ ਭਾਰਤ ਅਤੇ ਪਾਕਿਸਤਾਨ ਦੀਆਂ ਫ਼ੌਜਾਂ ਵਿਚਕਾਰ ਜੰਗ ਹੋਈ ਸੀ | ਇਹ ਜੰਗ ਲਗਭਗ 60 ਦਿਨ ਤੱਕ ਬਹੁਤ ਉੱਚੀਆਂ ਪਹਾੜੀਆਂ 'ਤੇ ਲੜੀ ਗਈ | ਪਾਕਿਸਤਾਨੀ ਫ਼ੌਜ ਨੇ ਲੁਕ ਕੇ ਭਾਰਤ ਦੀਆਂ ਚੌਕੀਆਂ 'ਤੇ ਕਬਜ਼ਾ ਕਰ ਲਿਆ ਸੀ | ਭਾਰਤੀ ਫ਼ੌਜ ਨੇ 'ਆਪ੍ਰੇਸ਼ਨ ਵਿਜੈ' ਚਲਾ ਕੇ ਦੁਸ਼ਮਣ ਨੂੰ ਮੂੰਹ ਤੋੜ ਜਵਾਬ ਦਿੱਤਾ | 26 ਜੁਲਾਈ, 1999 ਨੂੰ ਭਾਰਤ ਨੇ ਆਪਣੀਆਂ ਸਾਰੀਆਂ ਚੌਕੀਆਂ ਵਾਪਸ ਖੋਹ ਲਈਆਂ ਅਤੇ ਜੰਗ ਵਿਚ ਸ਼ਾਨਦਾਰ ਜਿੱਤ ਪ੍ਰਾਪਤ ਕੀਤੀ | ਇਸ ਲੜਾਈ ਵਿਚ ਭਾਰਤ ਦੇ ਕਈ ਸੂਰਬੀਰ ਸ਼ਹੀਦ ਹੋ ਗਏ | ਇਸ ਦਿਨ ਦਿੱਲੀ ਵਿਚ 'ਅਮਰ ਜਵਾਨ ਜੋਤੀ' ਅਤੇ ਦੇਸ਼ ਭਰ ਦੇ ਯੁੱਧ ਸਮਾਰਕਾਂ ਉੱਤੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਦਿੱਤੀ ਜਾਂਦੀ ਹੈ |
-ਪਵਨ ਗੁਪਤਾ ਮੰਡੀ ਅਹਿਮਦਗੜ੍ਹ
