ਨਵੀਂ ਦਿੱਲੀ, 28 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਵਿਚ ਪੈ ਰਹੀ ਅੰਤਾਂ ਦੀ ਗਰਮੀ ਕਾਰਨ ਜਨ-ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਿਹਾ ਹੈ ਅਤੇ ਬਾਜ਼ਾਰਾਂ ਵਿਚ ਵੀ ਰੌਣਕ ਹੀ ਨਹੀਂ ਹੈ | ਹਮੇਸ਼ਾ ਹੀ ਲੱਖਾਂ ਲੋਕਾਂ ਦੀ ਭੀੜ ਨਾਲ ਗੁਲਜ਼ਾਰ ਹੋਇਆ ਦਿੱਲੀ ਦਾ ਸਭ ਤੋਂ ਵੱਡਾ ਸਦਰ ਬਾਜ਼ਾਰ ਵੀ ਇਨ੍ਹਾਂ ਦਿਨਾਂ ਵਿਚ ਸੁੰਨਾ ਹੋ ਗਿਆ ਹੈ ਅਤੇ ਗਾਹਕ ਗਰਮੀ ਜ਼ਿਆਦਾ ਹੋਣ 'ਤੇ ਇੱਥੇ ਨਹੀਂ ਆ ਰਹੇ, ਜਿਸ ਦਾ ਅਸਰ ਇਸ ਬਾਜ਼ਾਰ ਦੇ ਦੁਕਾਨਦਾਰਾਂ 'ਤੇ ਪੈ ਰਿਹਾ ਹੈ | ਦੁਕਾਨਦਾਰਾਂ ਨੂੰ ਹੁਣ ਰੋਜ਼ੀ-ਰੋਟੀ ਦੇ ਲਾਲੇ ਪਏ ਹੋਏ ਹਨ | ਸਦਰ ਬਾਜ਼ਾਰ ਦੇ ਦੁਕਾਨਦਾਰਾਂ ਦਾ ਕਹਿਣਾ ਹੈ ਕਿ ਬਾਜ਼ਾਰ ਵਿਚ ਇਕਾ-ਦੁੱਕਾ ਗਾਹਕ ਵੀ ਆ ਰਹੇ ਹਨ ਜੋ ਕਿ ਹੁਣ ਦੁਕਾਨਦਾਰਾਂ ਲਈ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ ਕਿਉਂਕਿ ਵਿਕਰੀ ਨਾ ਹੋਣ ਕਰਕੇ ਆਮਦਨ ਦਾ ਸਾਧਨ ਹੀ ਖਤਮ ਹੁੰਦਾ ਜਾ ਰਿਹਾ ਹੈ | ਵਰਨਣਯੋਗ ਹੈ ਕਿ ਦਿੱਲੀ ਦੇ ਸਦਰ ਬਾਜ਼ਾਰ ਤੋਂ ਇਲਾਵਾ ਹੋਰਨਾਂ ਬਾਜ਼ਾਰਾਂ ਵਿਚ ਹੀ ਬਹੁਤ ਮੰਦਾ ਹਾਲ ਹੋ ਗਿਆ ਹੈ | ਕਈ ਦੁਕਾਨਦਾਰ ਸਵੇਰੇ ਤੋਂ ਲੈ ਕੇ ਸ਼ਾਮੀ ਤੱਕ ਖਾਲੀ ਹੀ ਬੈਠੇ ਰਹਿੰਦੇ ਹਨ | ਦਿੱਲੀ ਦੇ ਚਾਂਦਨੀ ਚੌਕ, ਸਰੋਜਨੀ ਨਗਰ, ਗਰੀਨ ਪਾਰਕ, ਤਿਲਕ ਨਗਰ ਆਦਿ ਬਾਜ਼ਾਰਾਂ ਦਾ ਵੀ ਬੁਰਾ ਹਾਲ ਹੈ |
