ਮਸੀਤਾਂ - ਰਾਣੀਆਂ ਰੋਡ ਤੋਂ ਚੌਟਾਲਾ ਰੋਡ ਲਿੰਕ ਸੜਕ ਦੋ ਮਹੀਨਿਆਂ ਤੋਂ ਅੱਧਵਾਟੇ, ਨਿਰਮਾਣ ਕਾਰਜ ਠੱਪ

ਅ

ਅਜੀਤ ਡੈਸਕ 17-05-2026

ਡੱਬਵਾਲੀ, 16 ਮਈ (ਇਕਬਾਲ ਸਿੰਘ ਸ਼ਾਂਤ)-ਪਿੰਡ ਮਸੀਤਾਂ ਵਿਖੇ ਡੱਬਵਾਲੀ-ਰਾਣੀਆਂ ਰੋਡ ਤੋਂ ਚੌਟਾਲਾ ਰੋਡ ਨੂੰ ਜੋੜਨ ਵਾਲੀ ਲਿੰਕ ਰੋਡ ਦਾ ਨਿਰਮਾਣ ਕਾਰਜ ਪਿਛਲੇ ਦੋ ਮਹੀਨੇ ਤੋਂ ਠੱਪ ਪਿਆ ਹੈ | ਲੋਕ ਨਿਰਮਾਣ ਵਿਭਾਗ (ਬੀਐਂਡਆਰ) ਅਤੇ ਠੇਕੇਦਾਰ ਦੀ ਕਥਿਤ ਲਾਪਰਵਾਹੀ ਪਿੰਡ ਮਸੀਤਾਂ ਦੇ ਹਜ਼ਾਰਾਂ ਲੋਕਾਂ ਦੀ ਜ਼ਿੰਦਗੀ 'ਤੇ ਭਾਰੀ ਪੈ ਰਹੀ ਹੈ | ਇੱਥੋਂ ਦੇ ਕਿਸਾਨ ਆਗੂ ਐੱਸ.ਪੀ. ਸਿੰਘ ਨੇ ਵਿਭਾਗ ਦੇ ਇੰਜੀਨੀਅਰ-ਇਨ-ਚੀਫ਼ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਲਿਖਤੀ ਸ਼ਿਕਾਇਤ ਭੇਜੀ ਹੈ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਅਧੂਰੇ ਸੜਕ ਨਿਰਮਾਣ ਕਾਰਨ ਪਿੰਡ ਦੀ ਰੋਜ਼ਾਨਾ ਜ਼ਿੰਦਗੀ ਅਤੇ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਹੀ ਹੈ | ਖ਼ਾਸ ਕਰਕੇ ਪਿੰਡ ਵਾਸੀਆਂ, ਸਕੂਲੀ ਵਿਦਿਆਰਥੀਆਂ ਤੇ ਰਾਹਗੀਰਾਂ ਨੂੰ ਭਾਰੀ ਪ੍ਰੇਸ਼ਾਨੀ ਝੱਲਣੀ ਪੈ ਰਹੀ ਹੈ |ਦੱਸਿਆ ਜਾਂਦਾ ਹੈ ਕਿ ਇਹ ਕਾਰਜ ਕਿਸੇ 'ਖ਼ਾਸੇ' ਸਿਆਸੀ ਰਸੂਖਦਾਰ ਦੀ ਕਥਿਤ ਕੰਪਨੀ ਕੋਲ ਹੈ | ਹਾਲਾਂਕਿ ਵਿਭਾਗ ਵੱਲੋਂ ਅਧੂਰੇ ਸੜਕ ਦੇ ਕਾਰਜ ਨੂੰ ਮੁੜ ਸ਼ੁਰੂ ਕਰਵਾਉਣ ਲਈ ਕਈ ਪੱਤਰ ਕੱਢੇ ਜਾ ਚੁੱਕੇ ਹਨ, ਪਰ ਠੇਕੇਦਾਰ ਨੇ ਟਾਲ-ਮਟੋਲ ਵਾਲਾ ਰਵੱਈਆ ਅਖ਼ਤਿਆਰ ਕੀਤਾ ਹੋਇਆ ਹੈ | ਜ਼ਿਕਰਯੋਗ ਹੈ ਕਿ ਪਿੰਡ ਮਸੀਤਾਂ ਦੀ ਫਿਰਨੀ 'ਤੇ ਬਰਸਾਤ ਦਾ ਪਾਣੀ ਜਮ੍ਹਾ ਹੋਣ ਕਾਰਨ ਕਰੀਬ 12 ਸੌ ਮੀਟਰ ਹਿੱਸੇ ਵਿੱਚ 80 ਐੱਮਐੱਮ ਦੀਆਂ ਇੰਟਰਲਾਕਿੰਗ ਟਾਈਲਾਂ ਲਗਾਈਆਂ ਜਾਣਗੀਆਂ |ਸ਼ਿਕਾਇਤਕਰਤਾ ਅਨੁਸਾਰ ਠੇਕੇਦਾਰ ਨੇ ਗੁਰਦੁਆਰਾ ਸਾਹਿਬ ਤੋਂ ਲੈ ਕੇ ਅੱਧੀ ਫਿਰਨੀ ਤੱਕ ਕਰੀਬ ਡੇਢ ਕਿਲੋਮੀਟਰ ਹਿੱਸੇ 'ਤੇ ਸਿਰਫ਼ ਪੱਥਰ ਪਾ ਕੇ ਕੰਮ ਬੰਦ ਕਰ ਦਿੱਤਾ ਹੈ | ਪਿੰਡ ਦੀ ਫਿਰਨੀ 'ਤੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ, ਪ੍ਰਾਇਮਰੀ ਸਕੂਲ ਅਤੇ ਪਸ਼ੂ ਹਸਪਤਾਲ ਸਥਿਤ ਹਨ | ਜਿਨ੍ਹਾਂ ਕਰਕੇ ਇੱਥੇ ਦਿਨ ਭਰ ਸਕੂਲੀ ਬੱਚਿਆਂ ਅਤੇ ਪਿੰਡ ਵਾਸੀਆਂ ਦੀ ਭਾਰੀ ਆਵਾਜਾਈ ਰਹਿੰਦੀ ਹੈ | ਸੜਕ ਅੱਧਵਾਟੇ ਪਏ ਹੋਣ ਕਰਕੇ ਦਿਨ ਭਰ ਮਿੱਟੀ-ਧੂਲ ਉੱਡਦੀ ਰਹਿੰਦੀ ਹੈ, ਲੋਕਾਂ ਦਾ ਸਾਹ ਲੈਣਾ ਵੀ ਦੁੱਭਰ ਹੋ ਗਿਆ ਹੈ |ਪਿੰਡ ਵਾਸੀਆਂ ਮੁਤਾਬਕ ਸੜਕ 'ਤੇ ਬਿਖਰੇ ਨੁਕੀਲੇ ਪੱਥਰ ਵਾਹਨਾਂ ਦੇ ਟਾਇਰਾਂ ਹੇਠੋਂ ਉਛਲ ਕੇ ਰਾਹਗੀਰਾਂ ਦੇ ਵੱਜ ਰਹੇ ਹਨ | ਇੱਥੇ ਹਰ ਵੇਲੇ ਕੋਈ ਗੰਭੀਰ ਹਾਦਸਾ ਹੋਣ ਦਾ ਡਰ ਬਣਿਆ ਰਹਿੰਦਾ ਹੈ | ਪਿੰਡ ਵਾਸੀਆਂ ਨੇ ਪ੍ਰਸ਼ਾਸਨ ਤੋਂ ਲਾਪਰਵਾਹ ਠੇਕੇਦਾਰ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਨ ਅਤੇ ਸੜਕ ਦਾ ਕੰਮ ਛੇਤੀ ਮੁਕੰਮਕਲ ਕਰਵਾਉਣ ਦੀ ਮੰਗ ਕੀਤੀ ਹੈ |
ਠੇਕੇਦਾਰ ਛੇਤੀ ਕੰਮ ਸ਼ੁਰੂ ਕਰਨ ਬਾਰੇ ਆਖ ਰਿਹਾ : ਐੱਸਡੀਓ
-ਲੋਕ ਨਿਰਮਾਣ ਵਿਭਾਗ (ਬੀਐਂਡਆਰ) ਡੱਬਵਾਲੀ ਦੇ ਐੱਸਡੀਓ ਪਰਮਜੀਤ ਸਿੰਘ ਭੁੱਲਰ ਨੇ ਦੱਸਿਆ ਕਿ ਨਿਰਮਾਣ ਕਾਰਜ ਸ਼ੁਰੂ ਕਰਨ ਨੂੰ ਲੈ ਕੇ ਠੇਕੇਦਾਰ ਨੂੰ ਕਈ ਵਾਰ ਪੱਤਰ ਲਿਖੇ ਜਾ ਚੁੱਕੇ ਹਨ | ਉਹ ਹਰ ਵਾਰ ਦੋ-ਤਿੰਨ ਦਿਨਾਂ ਵਿੱਚ ਕੰਮ ਦੁਬਾਰਾ ਚਾਲੂ ਕਰਨ ਦੀ ਗੱਲ ਆਖ ਰਿਹਾ ਹੈ |