ਨਵੀਂ ਦਿੱਲੀ, 26 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਵਿਚ ਅੰਤਾਂ ਦੀ ਗਰਮੀ, ਤਪਸ਼ ਤੇ ਤੇਜ਼ ਧੁੱਪ ਦੇ ਕਾਰਨ ਲੋਕਾਂ ਦੀ ਹਾਲਤ ਖ਼ਰਾਬ ਹੁੰਦੀ ਜਾ ਰਹੀ ਹੈ | ਸੜਕਾਂ ਇੰਨੀਆਂ ਗਰਮ ਹਨ ਕਿ ਜੁੱਤੀ ਪਾਉਣ ਦੇ ਨਾਲ ਹੀ ਪੈਰਾਂ ਨੂੰ ਗਰਮਾਇਸ਼ ਮਹਿਸੂਸ ਹੁੰਦੀ ਹੈ, ਜੋ ਲੋਕ ਆਪਣੇ ਘਰਾਂ ਤੋਂ ਬਾਹਰ ਨਿਕਲ ਰਹੇ ਹਨ, ਉਨ੍ਹਾਂ ਨੂੰ ਕਿਸੇ ਨਾ ਕਿਸੇ ਮਜਬੂਰੀ ਕਾਰਨ ਬਾਹਰ ਆਉਣਾ ਪੈ ਰਿਹਾ ਹੈ | ਲੋਕਾਂ ਦਾ ਕਹਿਣਾ ਹੈ ਕਿ ਨਾ ਉਨ੍ਹਾਂ ਨੂੰ ਦਿਨ ਦੇ ਸਮੇਂ ਚੈਨ ਹੈ ਅਤੇ ਰਾਤਾਂ ਵੀ ਇੰਨੀਆਂ ਗਰਮ ਹਨ ਕਿ ਨੀਂਦ ਵੀ ਨਹੀਂ ਆ ਰਹੀ | ਦਿੱਲੀ ਦੇ ਜ਼ਿਆਦਾਤਰ ਇਲਾਕਿਆਂ ਵਿਚ ਤਾਪਮਾਨ 44 ਤੋਂ 45 ਡਿਗਰੀ ਸੈਲਸੀਅਸ ਤੋਂ ਪਾਰ ਪੁੱਜ ਗਿਆ ਹੈ | ਮੌਸਮ ਵਿਗਿਆਨ ਵਿਭਾਗ ਅਨੁਸਾਰ 27 ਮਈ ਲਈ ਭੀਸ਼ਮ ਗਰਮੀ ਅਤੇ ਲੂ ਦਾ ਯੈਲੋ ਅਲਰਟ ਜਾਰੀ ਕੀਤਾ ਗਿਆ ਹੈ | ਅੰਤਾਂ ਦੀ ਗਰਮੀ ਅਤੇ ਹੀਟਵੇਵ ਵਿਚ ਦਿੱਲੀ ਸਰਕਾਰ ਦਾ ਕਹਿਣਾ ਹੈ ਕਿ ਰਾਜਧਾਨੀ ਵਿਚ ਵੱਡੇ ਪੱਧਰ 'ਤੇ ਗਰਮੀ ਤੋਂ ਰਾਹਤ ਮੁਹਿੰਮ ਚਲਾਈ ਜਾ ਰਹੀ ਹੈ ਅਤੇ ਸਾਰੇ 13 ਜ਼ਿਲਿ੍ਹਆਂ ਵਿਚ ਮੋਬਾਈਲ ਹੀਟ ਰਿਲੀਫ਼ ਯੂਨਿਟਸ ਅਤੇ ਕੂਲਿੰਗ ਜ਼ੋਨ ਸ਼ੁਰੂ ਕੀਤੇ ਹਨ | ਇਹ ਮੁਹਿੰਮ ਵਿਸ਼ੇਸ਼ ਰੂਪ ਵਿਚ ਮਜ਼ਦੂਰਾਂ, ਰਿਕਸ਼ਾ ਚਾਲਕਾਂ, ਖੁੱਲ੍ਹੇ ਵਿਚ ਕੰਮ ਕਰਨ ਵਾਲੇ ਲੋਕਾਂ ਨੂੰ ਧਿਆਨ ਵਿਚ ਰੱਖ ਕੇ ਚਲਾਈ ਜਾ ਰਹੀ ਹੈ |
