ਨਵੀਂ ਦਿੱਲੀ, 2 ਜੂਨ (ਡਾ. ਬਲਵਿੰਦਰ ਸਿੰਘ ਸੋਢੀ)-ਨੈਸ਼ਨਲ ਅਕਾਲੀ ਦਲ ਦੇ ਰਾਸ਼ਟਰੀ ਪ੍ਰਧਾਨ ਪਰਮਜੀਤ ਸਿੰਘ ਪੰਮਾ ਨੇ ਸੰਗਠਨ ਨੂੰ ਹੋਰ ਮਜ਼ਬੂਤ ਕਰਨ ਲਈ ਜਨਹਿੱਤ ਦੇ ਕੰਮਾਂ ਨੂੰ ਪ੍ਰਭਾਵੀ ਬਣਾਉਣ ਦੇ ਉਦੇਸ਼ ਨਾਲ ਪਾਰਟੀ ਦੀ ਲੀਗਲ ਵਿੰਗ ਦਾ ਗਠਨ ਕੀਤਾ ਹੈ | ਇਸ ਮੌਕੇ ਐਡਵੋਕੇਟ ਆਸ਼ੂ ਤੇਵਰੀਆ, ਐਡਵੋਕੇਟ ਸੁਜਾਤਾ ਸੰਧੂ, ਐਡਵੋਕੇਟ ਅਰਪਿਤ ਸ਼ਰਮਾ ਅਤੇ ਐਡਵੋਕੇਟ ਸੰਦੀਪ ਪਰਵਾਰ ਨੂੰ ਨੈਸ਼ਨਲ ਅਕਾਲੀ ਦਲ ਦਾ ਲੀਗਲ ਸਲਾਹਕਾਰ ਨਿਯੁਕਤ ਕੀਤਾ ਹੈ | ਇਨ੍ਹਾਂ ਨੂੰ ਅਕਾਲੀ ਦਲ ਵਲੋਂ ਸਨਮਾਨਿਤ ਕੀਤਾ ਗਿਆ | ਇਸ ਮੌਕੇ ਸ. ਪੰਮਾ ਨੇ ਬੋਲਦਿਆਂ ਕਿਹਾ ਕਿ ਅੱਜ ਦੇ ਸਮੇਂ ਔਰਤਾਂ ਨਾਲ ਛੇੜਖਾਨੀ, ਸਾਇਬਰ ਅਪਰਾਧ, ਆਨਲਾਈਨ ਫਰਾਡ, ਸਕੂਲਾਂ ਤੇ ਹਸਪਤਾਲਾਂ ਦੀ ਮਨਮਾਨੀ, ਉਪਭੋਗਤਾ ਅਧਿਕਾਰਾਂ ਦਾ ਹਨਨ, ਸੰਪਤੀ ਵਿਵਾਦ, ਮਜਦੂਰਾਂ ਦਾ ਸ਼ੋਸ਼ਣ, ਆਨਲਾਈਨ ਗੇਮਾਂ ਅਤੇ ਸੱਟੇਬਾਜ਼ੀ ਦੇ ਮਾਧਿਅਮ ਨਾਲ ਬੱਚਿਆਂ ਤੇ ਨੌਜਵਾਨਾਂ ਦੇ ਭਵਿੱਖ ਨਾਲ ਖਿਲਵਾੜ ਆਦਿ ਅਨੇਕਾਂ ਮਾਮਲੇ ਸਾਹਮਣੇ ਆ ਰਹੇ ਹਨ, ਜਿਸ ਪ੍ਰਤੀ ਕਾਨੂੰਨੀ ਪ੍ਰਕਿਰਿਆ ਦੀ ਜਟਿਲਤਾ ਦੇ ਕਾਰਨ ਨਿਆਂ ਲਈ ਲੰਬਾ ਸਮਾਂ ਭਟਕਣਾ ਪੈਂਦਾ ਹੈ | ਇਹ ਟੀਮ ਇਸ ਮਾਮਲੇ ਪ੍ਰਤੀ ਮਦਦ ਕਰੇਗੀ ਅਤੇ ਨਾਲ ਸਲਾਹ ਵੀ ਦੇਵੇਗੀ | ਇਸ ਮੌਕੇ ਐਡਵੋਕੇਟ ਆਸ਼ੂ ਤੇਵਰੀਆ ਨੇ ਕਿਹਾ ਕਿ ਇਹ ਟੀਮ ਨੈਸ਼ਨਲ ਅਕਾਲੀ ਦਲ ਦੀ ਵਿਚਾਰਧਾਰਾ ਅਤੇ ਜਨ ਸੇਵਾ ਦੇ ਸੰਕਲਪ ਨਾਲ ਕੰਮ ਕਰੇਗੀ ਤਾਂ ਕਿ ਲੋਕਾਂ ਨੂੰ ਨਿਆਂ ਮਿਲ ਸਕੇ | ਇਸ ਮੌਕੇ ਅਕਾਲੀ ਦਲ ਦੇ ਸੋਸ਼ਲ ਮੀਡੀਆ ਦੀ ਰਾਸ਼ਟਰੀ ਪ੍ਰਧਾਨ ਰਸ਼ਮੀਤ ਕੌਰ ਬਿੰਦਰਾ, ਪ੍ਰਧਾਨ ਰਿਦਮ ਢੱਡਾ, ਵਰਿੰਦਰ ਆਰੀਆ ਅਤੇ ਹੋਰ ਸ਼ਖ਼ਸੀਅਤਾਂ ਸ਼ਾਮਿਲ ਸਨ |
