ਨਵੀਂ ਦਿੱਲੀ, 26 ਜੂਨ (ਡਾ. ਸੋਢੀ)-ਦਿੱਲੀ ਦੇ ਜੰਤਰ-ਮੰਤਰ ’ਤੇ ਕਾਕਰੋਚ ਜਨਤਾ ਪਾਰਟੀ (ਸੀ.ਜੇ.ਪੀ.) ਦਾ ਵਿਰੋਧ 7ਵੇਂ ਦਿਨ ਵੀ ਜਾਰੀ ਹੈ। ਸੀ.ਜੇ.ਪੀ. ਦੇ ਸੰਸਥਾਪਕ ਅਭਿਜੀਤ ਦੀਪਕੇ ਪਾਰਟੀ ਦੇ ਸਮਰਥਕਾਂ ਦੇ ਨਾਂਲ ਪੂਰੇ ਜੋਸ਼ ਵਿਚ ਡਟੇ ਹੋਏ ਹਨ। ਮੰਚ ’ਤੇ ਸਪੀਚਾਂ ਦਾ ਸਿਲਸਿਲਾ ਜਾਰੀ ਹੈ। ਜੰਤਰ-ਮੰਤਰ ਦੇ ਸਾਰੇ ਪਾਸੇ ਪੁਲਿਸ ਹੀ ਪੁਲਿਸ ਨਜ਼ਰ ਆ ਰਹੀ ਹੈ। ਸੀ.ਜੇ.ਪੀ. ਤੇ ਬੀ.ਜੇ.ਪੀ. ਦੇ ਸਮਰਥਕਾਂ ਦੀਆਂ ਛੋਟੀਆਂ-ਮੋਟੀਆਂ ਆਪਸੀ ਝੜਪਾਂ ਤੇ ਬਹਿਸਬਾਜ਼ੀ ਦੀਆਂ ਖਬਰਾਂ ਵੀ ਸਾਹਮਣੇ ਆ ਰਹੀਆਂ ਹਨ, ਜਿਸ ਦੇ ਬਾਰੇ ਅਭਿਜੀਤ ਦੀਪਕੇ ਵਾਰ-ਵਾਰ ਪੁਲਿਸ ਨੂੰ ਜਾਣਕਾਰੀ ਵੀ ਦੇ ਰਿਹਾ ਹੈ। ਇਸ ਪ੍ਰਦਰਸ਼ਨ ਵਿਚ ਕੇਂਦਰੀ ਸਿੱਖਿਆ ਮੰਤਰੀ ਧਰਮੇਂਦਰ ਪ੍ਰਧਾਨ ਦੇ ਅਸਤੀਫ਼ੇ ਦੀ ਮੰਗ ਹੋ ਰਹੀ ਹੈ। ਇਸ ਪ੍ਰਦਰਸ਼ਨ ਦੇ ਵਿਚ ਦੂਸਰੇ ਰਾਜਾਂ ਤੋਂ ਵੀ ਲੋਕ ਆ ਕੇ ਇਨ੍ਹਾਂ ਨੂੰ ਆਪਣਾ ਸਮਰਥਨ ਦੇ ਰਹੇ ਹਨ। ਜੰਤਰ-ਮੰਤਰ ’ਤੇ ਸਮਾਜ ਸੇਵੀ ਸੰਸਥਾਵਾਂ ਲੰਗਰ ਪਾਣੀ ਦੀ ਸੇਵਾ ਲਗਾਤਾਰ ਕਰ ਰਹੀਆਂ ਹਨ। ਇਸ ਤੋਂ ਇਲਾਵਾ ਫਲ ਅਤੇ ਹੋਰ ਚੀਜ਼ਾਂ ਵੀ ਖਾਣ ਵਾਲੀਆਂ ਦਿੱਤੀਆਂ ਜਾ ਰਹੀਆਂ ਹਨ। ਇਸੇ ਹੀ ਥਾਂ ’ਤੇ ਡਿਸਪੈਂਸਰੀ ਵੀ ਚਾਲੂ ਕਰ ਦਿੱਤੀ ਗਈ ਹੈ, ਜਿੱਥੇ ਕਿ ਡਾਕਟਰ ਚੈਕਅੱਪ ਕਰ ਰਹੇ ਹਨ। ਸਮਾਜ ਸੇਵਾ ਵਿਚ ਲੜਕੀਆਂ ਵੀ ਪਿੱਛੇ ਨਹੀਂ ਹਨ। ਰੋਜ਼ਾਨਾ ਜੰਤਰ-ਮੰਤਰ ’ਤੇ ਆਮ ਲੋਕ ਵੀ ਆ ਰਹੇ ਹਨ ਅਤੇ ਉਹ ਦਵਾਈਆਂ ਤੇ ਹੋਰ ਜ਼ਰੂਰਤ ਦੀਆਂ ਚੀਜ਼ਾਂ ਦੇ ਕੇ ਜਾ ਰਹੇ ਹਨ।
