ਦਿੱਲੀ ਯੂਨੀਵਰਸਿਟੀ ਦੇ ਕਾਲਜ ਖੁੱਲ੍ਹੇ, ਰੈਗਿੰਗ ਕਰਨ ’ਤੇ ਹੋਵੇਗੀ ਸਖ਼ਤ ਕਾਰਵਾਈ

ਨਵੀਂ ਦਿੱਲੀ, 28 ਜੁਲਾਈ (ਡਾ. ਬਲਵਿੰਦਰ ਸਿੰਘ ਸੋਢੀ)- ਦਿੱਲੀ ਯੂਨੀਵਰਸਿਟੀ ਦੇ ਕਾਲਜਾਂ ਵਿਚ ਅੱਜ (28 ਜੁਲਾਈ) ਤੋਂ ਨਵਾਂ ਸੈਸ਼ਨ ਸ਼ੁਰੂ ਹੋ ਗਿਆ ਹੈ। ਹਜ਼ਾਰਾਂ ਵਿਦਿਆਰਥੀ ਅੱਜ ਪਹਿਲੀ ਵਾਰ ਕਾਲਜ ਗਏ ਹਨ ਅਤੇ ਉਨ੍ਹਾਂ ਲਈ ਸਕੂਲਾਂ ਤੋਂ ਵੱਖਰਾ ਮਾਹੌਲ ਹੋਵੇਗਾ। ਨਵੇਂ ਵਿਦਿਆਰਥੀਆਂ ਦੀ ਰੈਗਿੰਗ ਰੋਕਣ ਲਈ ਦਿੱਲੀ ਯੂਨੀਵਰਸਿਟੀ ਨੇ ਅਤੇ ਕਾਲਜ ਪ੍ਰਸ਼ਾਸਨ ਨੇ ਸਖ਼ਤ ਸੁਰੱਖਿਆ ਕੀਤੀ ਹੈ ਅਤੇ ਜਾਗਰੂਕਤਾ ਵੀ ਫੈਲਾਈ ਹੈ ਤਾਂ ਕਿ ਪੁਰਾਣੇ ਵਿਦਿਆਰਥੀ ਨਵੇਂ ਵਿਦਿਆਰਥੀਆਂ ਦੀ ਰੈਗਿੰਗ ਨਾ ਕਰ ਸਕਣ। ਸਾਰੇ ਕਾਲਜਾਂ ਦੇ ਵਿਦਿਆਰਥੀਆਂ ਨੂੰ ਯੂ.ਜੀ.ਸੀ. ਵਲੋਂ ਜਾਰੀ ਦਿਸ਼ਾ-ਨਿਰਦੇਸ਼ ਦੀ ਹਰ ਹਾਲਤ ਵਿਚ ਪਾਲਣਾ ਕਰਨੀ ਹੋਵੇਗੀ। ਰੈਗਿੰਗ ਪ੍ਰਤੀ ਵਿਸ਼ੇਸ਼ ਨਿਗਰਾਨੀ ਦਲਾਂ ਦਾ ਗਠਨ ਕੀਤਾ ਗਿਆ ਹੈ, ਜੋ ਕਿ ਇਕ ਮਹੀਨੇ ਤੱਕ ਕੈਂਪਸ ਦੇ ਪ੍ਰਵੇਸ਼ ਦੁਆਰ, ਆਸਪਾਸ ਦੇ ਖੇਤਰਾਂ ਵਿਚ ਗਸ਼ਤ ਕਰੇਗਾ, ਜੇਕਰ ਉਸ ਨੂੰ ਕੋਈ ਵੀ ਸ਼ਿਕਾਇਤ ਮਿਲੀ ਤਾਂ ਉਹ ਉਸੇ ਸਮੇਂ ਕਾਰਵਾਈ ਕਰੇਗਾ ਅਤੇ ਦੋਸ਼ੀਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਮਾਹੌਲ ਨੂੰ ਸਾਕਾਰਾਤਮਿਕ ਬਣਾਉਣ ਲਈ ਕੈਂਪਸ ਵਿਚ ਸੈਲਫੀ ਕਾਰਨਰ ਬਣਾਏ ਗਏ। ਇਸ ਤੋਂ ਇਲਾਵਾ ਨੁੱਕੜ ਨਾਟਕ, ਪੋਸਟਰ ਮੇਕਿੰਗ, ਰੀਲ ਮੇਕਿੰਗ ਅਤੇ ਵਾਦ-ਵਿਵਾਦ ਜਿਹੇ ਪ੍ਰੋਗਰਾਮ ਵੀ ਕੀਤੇ ਜਾਣਗੇ।