ਅਲਾਟੀ ਨੂੰ 20 ਲੱਖ ਦੀ ਅਦਾਇਗੀ ਕਰਨ ਦੇ ਆਦੇਸ਼
ਅਜੀਤ ਡੈਸਕ
08-04-2026
ਜਲੰਧਰ, 7 ਅਪ੍ਰੈਲ (ਸ਼ਿਵ)-ਖਪਤਕਾਰ ਕਮਿਸ਼ਨ ਨੇ ਬੀਬੀ ਭਾਨੀ ਕੰਪਲੈਕਸ 'ਚ ਸਹੂਲਤਾਂ ਵਾਲਾ ਫਲੈਟ ਨਾ ਦੇਣ ਦੇ ਮਾਮਲੇ ਵਿਚ ਅਲਾਟੀ ਦੇ ਹੱਕ 'ਚ ਫ਼ੈਸਲਾ ਦਿੱਤਾ ਹੈ ਤੇ ਟਰੱਸਟ ਨੂੰ ਅਲਾਟੀ ਲਈ 20 ਲੱਖ ਦੀ ਅਦਾਇਗੀ ਕਰਨ ਦੇ ਆਦੇਸ਼ ਦਿੱਤੇ ਹਨ | ਜਲੰਧਰ ਨਿਵਾਸੀ ਅਸ਼ੋਕ ਕੁਮਾਰ ਨੂੰ 2010 ਵਿਚ ਫਲੈਟ ਅਲਾਟ ਹੋਇਆ ਸੀ | ਟਰੱਸਟ ਨੇ ਅਲਾਟੀ ਨੂੰ 2012 'ਚ ਇਸ ਦਾ ਕਬਜ਼ਾ ਦੇਣਾ ਸੀ | ਇਸ ਲਈ ਉਸ ਨੇ ਟਰੱਸਟ ਨੂੰ ਬਣਦੀ 8.25 ਲੱਖ ਦੀ ਅਦਾਇਗੀ ਕਰ ਦਿੱਤੀ ਸੀ ਪਰ ਟਰੱਸਟ ਨੇ ਅਲਾਟੀ ਨੂੰ ਕਬਜ਼ਾ ਨਹੀਂ ਦਿੱਤਾ ਅਤੇ ਨਾ ਹੀ ਫਲੈਟ ਵਿਚ ਕਿਸੇ ਤਰ੍ਹਾਂ ਦੀ ਕੋਈ ਸਹੂਲਤਾਂ ਮੌਜੂਦ ਸੀ | ਅਲਾਟੀ ਅਸ਼ੋਕ ਕੁਮਾਰ ਨੇ ਇਸ ਮਾਮਲੇ ਵਿਚ ਖਪਤਕਾਰ ਕਮਿਸ਼ਨ 'ਚ ਕੇਸ ਕਰ ਦਿੱਤਾ ਸੀ | ਹੁਣ ਅਲਾਟੀ ਦੇ ਹੱਕ ਵਿਚ ਖਪਤਕਾਰ ਕਮਿਸ਼ਨ ਨੇ ਫ਼ੈਸਲਾ ਦਿੱਤਾ ਹੈ ਜਿਸ 'ਚ ਸਾਰੀ ਰਕਮ 9 ਫੀਸਦੀ ਵਿਆਜ, 20 ਹਜ਼ਾਰ ਰੁਪਏ ਮੁਆਵਜ਼ਾ ਤੇ 10 ਹਜ਼ਾਰ ਰੁਪਏ ਕਾਨੂੰਨੀ ਖ਼ਰਚੇ ਸਮੇਤ ਵਾਪਸ ਕਰਨ ਲਈ ਕਿਹਾ ਹੈ | ਇਹ ਰਕਮ ਕਰੀਬ 20 ਲੱਖ ਬਣਦੀ ਹੈ | ਟਰੱਸਟ ਬੀਬੀ ਭਾਨੀ ਕੰਪਲੈਕਸ ਸਮੇਤ ਕਈ ਕਾਲੋਨੀਆਂ ਦੇ ਕੇਸ ਹਾਰ ਚੁੱਕਾ ਹੈ ਜਿਸ ਦੀ 75 ਕਰੋੜ ਤੋਂ ਜ਼ਿਆਦਾ ਦੀ ਅਦਾਇਗੀ ਅਲਾਟੀਆਂ ਨੂੰ ਕਰਨੀ ਹੈ |
