ਟਰਾਂਸਪੋਰਟ ਵਿਭਾਗ ਦਾ ਸਰਵਰ ਵਾਰ-ਵਾਰ ਬੰਦ ਹੋਣ ਕਰਕੇ ਪੇ੍ਰਸ਼ਾਨ ਰਹੇ ਲੋਕ
ਅਜੀਤ ਡੈਸਕ
21-05-2026
ਜਲੰਧਰ, 20 ਮਈ (ਸ਼ਿਵ)- ਆਰ.ਟੀ.ਓ. ਦਫ਼ਤਰ ਵਿਚ ਅੱਜ ਟਰਾਂਸਪੋਰਟ ਵਿਭਾਗ ਦੇ ਸਰਵਰ ਦੇ ਬਾਰ-ਬਾਰ ਬੰਦ ਹੋਣ ਨਾਲ ਲੋਕਾਂ ਨੂੰ ਕਾਫੀ ਪੇ੍ਰਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ ਤੇ ਲੋਕ ਕਾਫੀ ਸਮੇਂ ਤੱਕ ਆਪਣੇ ਕੰਮ ਕਰਵਾਉਣ ਲਈ ਦਫ਼ਤਰ ਵਿਚ ਖੜੇ ਰਹੇ | ਅੱਜ ਕਈ ਲੋਕ ਆਰ.ਸੀ. ਤੋਂ ਇਲਾਵਾ ਡਰਾਈਵਿੰਗ ਲਾਇਸੈਂਸ ਦੇ ਕੰਮ ਕਰਵਾਉਣ ਲਈ ਆਏ ਹੋਏ ਸਨ ਪਰ ਜਦੋਂ ਸਾਈਟ ਕਾਫੀ ਸਮੇਂ ਤੱਕ ਬਾਰ-ਬਾਰ ਬੰਦ ਹੁੰਦੀ ਰਹੀ ਤਾਂ ਕਈ ਲੋਕ ਨੂੰ ਬਿਨਾਂ ਕੰਮ ਕਰਵਾਏ ਵਾਪਸ ਜਾਣਾ ਪਿਆ | ਦੱਸਿਆ ਜਾਂਦਾ ਹੈ ਕਿ ਸਾਈਟ ਦੇ ਬਾਰ-ਬਾਰ ਬੰਦ ਹੋਣ ਦੀ ਸਮੱਸਿਆ ਪਿਛਲੇ ਤਿੰਨ ਦਿਨ ਤੋਂ ਆ ਰਹੀ ਸੀ ਜਿੱਥੇ ਕੰਮਾਂ ਲਈ 300 ਤੋਂ ਜ਼ਿਆਦਾ ਫਾਈਲਾਂ ਦਾ ਕੰਮ ਹੁੰਦਾ ਰਿਹਾ ਸੀ ਪਰ ਸਾਈਟ ਦੀ ਗਤੀ ਕਾਫੀ ਹੌਲੀ ਹੋਣ ਕਰ ਕੇ ਕਾਫੀ ਘੱਟ ਗਿਣਤੀ ਵਿਚ ਫਾਈਲਾਂ ਨਿਪਟਾਈਆਂ ਗਈਆਂ | ਸਾਈਟ ਦੇ ਬਾਰ-ਬਾਰ ਬੰਦ ਹੋਣ ਤੋਂ ਲੋਕ ਕਾਫੀ ਪੇ੍ਰਸ਼ਾਨ ਦਿਖੇ ਤੇ ਉਨ੍ਹਾਂ ਦਾ ਕਹਿਣਾ ਸੀ ਕਿ ਵਿਭਾਗ ਨੂੰ ਆਪਣੇ ਸਰਵਰ 'ਚ ਸੁਧਾਰ ਕਰਨਾ ਚਾਹੀਦਾ ਹੈ | ਕਈ ਲੋਕਾਂ ਦਾ ਕਹਿਣਾ ਸੀ ਕਿ ਵਿਭਾਗ ਦੀ ਸਾਈਟ ਲਈ ਇੰਟਰਨੈੱਟ ਦੀ ਗਤੀ ਕਾਫੀ ਹੌਲੀ ਹੋ ਗਈ ਹੈ ਤੇ ਉਨ੍ਹਾਂ ਨੂੰ ਕਿਸੇ ਚੰਗੀ ਕੰਪਨੀ ਦਾ ਇੰਟਰਨੈੱਟ ਲਗਾਉਣਾ ਚਾਹੀਦਾ ਹੈ ਤਾਂ ਜੋ ਲੋਕਾਂ ਦੇ ਕੰਮ ਦੇ ਜਲਦੀ ਤੋਂ ਜਲਦੀ ਹੋ ਸਕਣ |
