ਦਾਗ਼ੀ ਕਿਰਦਾਰ ਵਾਲੇ ਉਮੀਦਵਾਰਾਂ ਨੂੰ ਵੋਟਰ ਕਰਾਰੀ ਹਾਰ ਦੇਣਗੇ- ਐਡਵੋਕੇਟ ਦਲਿਓ <br/>

ਬੁਢਲਾਡਾ, 23 ਮਈ (ਸੁਨੀਲ ਮਨਚੰਦਾ)- ਸਥਾਨਕ ਨਗਰ ਸੁਧਾਰ ਸਭਾ ਨੇ ਇੱਥੇ ਨਗਰ ਕੌਂਸਲ ਚੋਣਾਂ ਸੰਬੰਧੀ ਵੋਟਰਾਂ ਨੂੰ ਅਪੀਲ ਕੀਤੀ ਹੈ ਕਿ ਹਲਕੇ ਦੇ ਵਿਧਾਇਕ ਸਮੇਤ ਪੁਰਾਣੇ ਕੌਂਸਲਰ ਜੋ ਦੁਬਾਰਾ ਫਿਰ ਉਮੀਦਵਾਰ ਹਨ, ਨੂੰ ਸਵਾਲ ਕਰ ਕੇ ਪੁੱਛਿਆ ਜਾਵੇ ਕਿ ਉਨ੍ਹਾਂ ਨੇ ਸ਼ਹਿਰ ਲਈ ਕੀ ਕੀਤਾ ਹੈ ? ਸਭਾ ਦੀ ਆਗੂ ਟੀਮ ਨੇ ਸਥਾਨਕ ਸ਼ਹਿਰ ਦੀਆਂ ਮਾਰਕੀਟਾਂ 'ਚ ਅਪੀਲ ਦੇ ਪੈਂਫ਼ਲੈਟ ਵੀ ਵੰਡੇ | ਨਗਰ ਸੁਧਾਰ ਸਭਾ ਦੇ ਸੀਨੀਅਰ ਆਗੂ ਐਡਵੋਕੇਟ ਸਵਰਨਜੀਤ ਸਿੰਘ ਦਲਿਓ, ਪ੍ਰੇਮ ਸਿੰਘ ਦੋਦੜਾ ਅਤੇ ਸਤਪਾਲ ਸਿੰਘ ਕਟੌਦੀਆ ਨੇ ਕਿਹਾ ਕਿ ਅਪੀਲ 'ਚ ਸ਼ਹਿਰ ਦੇ ਕੁੱਝ ਬੁਨਿਆਦੀ ਮੁੱਦੇ ਉਭਾਰੇ ਗਏ ਹਨ, ਜਿਨ੍ਹਾਂ ਨੂੰ ਪੂਰੇ 5 ਸਾਲ ਕਿਸੇ ਵੀ ਐਮ.ਸੀ. ਪ੍ਰਧਾਨ ਅਤੇ ਹਲਕਾ ਵਿਧਾਇਕ ਨੇ ਹੱਲ ਕਰਨ ਦਾ ਕੋਈ ਯਤਨ ਨਹੀਂ ਕੀਤਾ | ਉਨ੍ਹਾਂ ਆਖਿਆ ਕਿ ਸ਼ਹਿਰ ਦੀ ਸਥਿਤੀ ਜਿਉਂ ਦੀ ਤਿਉਂ ਬਣੀ ਹੋਈ ਹੈ | ਸ਼ਹਿਰ 'ਚ ਥਾਂ-ਥਾਂ 'ਤੇ ਕੂੜੇ ਦੇ ਢੇਰ ਲੱਗੇ ਹੋਏ ਹਨ | ਸੀਵਰੇਜ ਦਾ ਗੰਦਾ ਪਾਣੀ ਓਵਰਫ਼ਲੋ ਹੋ ਕੇ ਸੜਕਾਂ ਤੇ ਗਲੀਆਂ 'ਚ ਆਉਣਾ ਆਮ ਜਿਹੀ ਗੱਲ ਬਣ ਗਈ ਹੈ | ਵੋਟਰਾਂ ਨੂੰ ਅਪੀਲ ਕੀਤੀ ਕਿ ਉਹ ਚੋਣਾਂ 'ਚ ਚੰਗੇ ਅਕਸ ਵਾਲੇ ਉਮੀਦਵਾਰਾਂ ਨੂੰ ਹੀ ਕੌਂਸਲਰ ਚੁਣਿਆ ਜਾਵੇ | ਦਾਅਵਾ ਕੀਤਾ ਕਿ ਵੋਟਰ ਭਿ੍ਸ਼ਟ, ਦਾਗ਼ੀ ਪੁਰਾਣੇ ਕੌਂਸਲਰ ਜੋ ਦੁਬਾਰਾ ਫਿਰ ਉਮੀਦਵਾਰ ਹਨ, ਨੂੰ ਕਰਾਰੀ ਹਾਰ ਦੇਣਗੇ |