ਰਾਮਾਂ ਮੰਡੀ, 23 ਮਈ (ਤਰਸੇਮ ਸਿੰਗਲਾ)-ਪਿਛਲੇ ਦਿਨੀਂ ਨਾਮਜ਼ਦਗੀ ਪੱਤਰ ਦਾਖ਼ਲ ਕਰਨ ਸਮੇਂ ਅਤੇ ਪੱਤਰਾਂ ਦੀ ਪੜਤਾਲ ਦੌਰਾਨ ਰਾਮਾਂ ਮੰਡੀ ਵਿਖੇ ਪੁਲਿਸ ਵਲੋਂ ਲੋਕਾਂ ਅਤੇ ਉਮੀਦਵਾਰਾਂ ਨਾਲ ਕੀਤੀ ਗਈ ਧੱਕੇਸ਼ਾਹੀ ਨੂੰ ਦੇਖਦਿਆਂ ਮੰਡੀ ਵਿਚ ਲੋਕਾਂ ਵਿਚ ਡਰ ਵਾਲਾ ਮਾਹੌਲ ਬਣਿਆ ਹੋਇਆ ਹੈ | ਜਿਸ ਦੇ ਕਥਿਤ ਸਬੂਤ ਵਜੋਂ ਭਾਵੇਂ ਨਗਰ ਕੌਂਸਲ ਚੋਣਾਂ ਵਿਚ ਸਿਰਫ਼ ਤਿੰਨ ਦਿਨ ਬਾਕੀ ਰਹਿ ਗਏ ਹਨ, ਪਰ ਚੋਣ ਪ੍ਰਚਾਰ ਬਹੁਤ ਢਿੱਲੇ ਚੱਲ ਰਹੇ ਹਨ | ਇਸ ਤੋਂ ਇਲਾਵਾ ਵੀ ਸ਼ਹਿਰ ਦਾ ਕੋਈ ਵੀ ਵਿਅਕਤੀ ਆਪਣੇ ਘਰਾਂ 'ਤੇ ਪਾਰਟੀਆਂ ਦਾ ਝੰਡਾ, ਸਟੀਕਰ ਜਾਂ ਬਿੱਲਾ ਲਾਉਣ ਤੋਂ ਵੀ ਕਿਨਾਰਾ ਹੀ ਕਰਦਾ ਹੈ | ਲੋਕਾਂ ਦਾ ਕਹਿਣਾ ਹੈ ਕਿ ਪਿਛਲੇ ਦਿਨਾਂ ਦੀ ਪੁਲਿਸ ਧੱਕੇਸ਼ਾਹੀ ਦਾ ਅਸਰ ਵੋਟਾਂ ਦੀ ਪੋਲਿੰਗ 'ਤੇ ਵੀ ਪੈ ਸਕਦਾ ਹੈ | ਕਿਉਂਕਿ ਨਾਮਜ਼ਦਗੀ ਪੱਤਰਾਂ ਵਾਲੇ ਦਿਨ ਪਾਰਟੀਆਂ ਦੇ ਲੀਡਰ ਵੀ ਪੁਲਿਸ ਧੱਕੇਸ਼ਾਹੀ ਨੂੰ ਰੋਕਣ ਵਿਚ ਅਸਫ਼ਲ ਹੀ ਰਹੇ ਹਨ |
