ਪਿੰਡ ਦਾ ਨਿਕਾਸੀ ਪਾਣੀ ਛੱਪੜ ’ਚ ਵਧਣ ਕਾਰਨ ਸੜਕ ਟੁੱਟਣ ਕਿਨਾਰੇ

ਫੱਤੂਢੀਂਗਾ, 24 ਜੂਨ (ਬਲਜੀਤ ਸਿੰਘ)-ਬਲਾਕ ਫੱਤੂਢੀਂਗਾ ਅਧੀਨ ਪੈਂਦੇ ਪਿੰਡ ਮਿਆਣੀ ਬੋਲਾ ਦਾ ਗੰਦਾ ਪਾਣੀ ਪਿੰਡ ਦੇ ਕੋਲੋਂ ਲੰਘਦੇ ਕਾਲਣੇ ਵਿਚ ਛੱਪੜ ਦੇ ਰੂਪ ਵਿਚ ਪਾਇਆ ਜਾ ਰਿਹਾ ਹੈ ਜਿਸ ਦਾ ਏਰੀਆ ਘੱਟ ਹੋਣ ਕਾਰਨ ਪਾਣੀ ਦਾ ਪੱਧਰ ਵੱਧ ਹੋਣ ਕਾਰਨ ਕੋਲ ਦੀ ਲੰਘਦੇ ਲਿੰਕ ਰੋਡ ਦੇ ਬਰਾਬਰ ਪਹੁੰਚਿਆ ਹੋਇਆ ਹੈ | ਜਿਸ ਕਾਰਨ ਸੜਕ ਟੁੱਟਣ ਦਾ ਖ਼ਤਰਾ ਬਣਿਆ ਹੋਇਆ ਹੈ|ਇਸ ਸਬੰਧੀ ਹੋਰ ਜਾਣਕਾਰੀ ਦਿੰਦਿਆਂ ਪਿੰਡ ਦੇ ਵਸਨੀਕ ਪਲਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਸਬੰਧੀ ਉਸ ਵੱਲੋਂ ਡਿਪਟੀ ਕਮਿਸ਼ਨਰ ਕਪੂਰਥਲਾ ਦੇ ਧਿਆਨ ਵਿਚ ਵੀ ਇਹ ਮਾਮਲਾ ਲਿਆਂਦਾ ਗਿਆ ਹੈ ਕਿ ਬਰਸਾਤਾਂ ਦੇ ਪਾਣੀ ਦੇ ਨਿਕਾਸ ਵਾਸਤੇ ਕਈ ਸਾਲਾਂ ਤੋਂ ਇਸ ਕਾਲਣੇ ਨੂੰ ਏਰੀਏ ਦੇ ਵੱਖ ਵੱਖ ਪਿੰਡਾਂ ਵੱਲੋਂ ਨਜਾਇਜ਼ ਕਬਜ਼ੇ ਕਰਕੇ ਖੇਤੀ ਕੀਤੀ ਜਾ ਰਹੀ ਹੈ ,ਉਨ੍ਹਾਂ ਦੱਸਿਆ ਕਿ ਪਿੰਡ ਮਿਆਣੀ ਬੋਲਾ ਦਾ ਸਮੁੱਚਾ ਗੰਦਾ ਪਾਣੀ ਇਸ ਕਾਲਣੇ ਵਿਚ ਬੰਨ੍ਹ ਮਾਰ ਕੇ ਪਾਇਆ ਗਿਆ ਹੈ ਤੇ ਜਿਸ ਕਾਰਨ ਇਸ ਕੋਲੋਂ ਪਿੰਡ ਦੇਸਲ ਨੂੰ ਜਾਂਦੀ ਲਿੰਕ ਸੜਕ ਦੇ ਉੱਪਰ ਬਣੀ ਪੁਲੀ ਨੂੰ ਵੀ ਟੁੱਟਣ ਦਾ ਖ਼ਤਰਾ ਬਣਿਆ ਹੋਇਆ ਹੈ | ਉਨ੍ਹਾਂ ਜ਼ਿਲ੍ਹਾ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਇਸ ਬੰਨ੍ਹ ਨੂੰ ਤੁੜਵਾ ਕੇ ਪਾਣੀ ਦਾ ਪੱਧਰ ਨੀਵਾਂ ਕੀਤਾ ਜਾਵੇ |