ਰੇਲਵੇ ਦਾ ਸਫ਼ਰ ਹੋਵੇਗਾ ਮਹਿੰਗਾ

26 ਤੋਂ ਵਧਣਗੀਆਂ ਟਿਕਟਾਂ ਦੀਆਂ ਕੀਮਤਾਂ
ਨਵੀਂ ਦਿੱਲੀ, 21 ਦਸੰਬਰ (ਉਪਮਾ ਡਾਗਾ ਪਾਰਥ)-ਰੇਲ ਦਾ ਸਫ਼ਰ ਕਰਨ ਵਾਲੇ ਮੁਸਾਫ਼ਿਰਾਂ ਨੂੰ ਵੱਡਾ ਝਟਕਾ ਦਿੰਦਿਆਂ ਭਾਰਤੀ ਰੇਲਵੇ ਨੇ ਟਿਕਟਾਂ ਦੀ ਕੀਮਤ ਵਧਾਉਣ ਦਾ ਫ਼ੈਸਲਾ ਕੀਤਾ ਹੈ | ਜਿਸ ਤਹਿਤ ਜਨਰਲ, ਸਲੀਪਰ ਅਤੇ ਏ. ਸੀ. ਵਰਗ ਦੇ ਟਿਕਟ ਮਹਿੰਗੇ ਹੋ ਜਾਣਗੇ | ਕਿਰਾਏ ਦੀਆਂ ਵਧੀਆਂ ਹੋਈਆਂ ਦਰਾਂ 26 ਦਸੰਬਰ ਤੋਂ ਲਾਗੂ ਹੋਣਗੀਆਂ | ਜਾਣਕਾਰੀ ਮੁਤਾਬਿਕ ਮੇਲ, ਐਕਸਪ੍ਰੈੱਸ ਅਤੇ ਬਿਨਾਂ ਏ. ਸੀ. ਵਾਲੀ ਕੈਟਾਗਰੀ 'ਚ 2 ਪੈਸਾ ਪ੍ਰਤੀ ਕਿਲੋਮੀਟਰ ਕਿਰਾਇਆ ਵਧਾਇਆ ਗਿਆ ਹੈ | ਜਿਸ ਮੁਤਾਬਿਕ 500 ਕਿਲੋਮੀਟਰ 'ਤੇ 10 ਰੁਪਏ ਜ਼ਿਆਦਾ ਖ਼ਰਚ ਕਰਨੇ ਜਾਣਗੇ, ਹਾਲਾਂਕਿ ਪੈਸੇਂਜਰ ਟਰੇਨਾਂ ਦੀਆਂ ਟਿਕਟਾਂ ਦੀਆਂ ਕੀਮਤਾਂ ਨਹੀਂ ਵਧਾਈਆਂ ਗਈਆਂ | ਰੇਲਵੇ ਮੁਤਾਬਿਕ ਸਧਾਰਨ ਕਲਾਸ 'ਚ 215 ਕਿਲੋਮੀਟਰ ਤੋਂ ਘੱਟ ਦੇ ਰੇਲ ਸਫ਼ਰ 'ਤੇ ਕਿਰਾਏ 'ਚ ਕੋਈ ਵਾਧਾ ਨਹੀਂ ਕੀਤਾ ਗਿਆ | ਪਰ 215 ਕਿਲੋਮੀਟਰ ਤੋਂ ਜ਼ਿਆਦਾ ਦੀ ਯਾਤਰਾ ਲਈ ਸਧਾਰਨ ਕਲਾਸ 'ਚ 1 ਪੈਸੇ ਪ੍ਰਤੀ ਕਿਲੋਮੀਟਰ ਜਦਕਿ ਮੇਲ/ਐਕਸਪ੍ਰੈੱਸ ਨਾਨ ਏ. ਸੀ. ਅਤੇ ਏ. ਸੀ. ਕਲਾਸ ਲਈ 2 ਪੈਸੇ ਪ੍ਰਤੀ ਕਿਲੋਮੀਟਰ ਕਿਰਾਏ 'ਚ ਵਾਧਾ ਲਾਗੂ ਕੀਤਾ ਗਿਆ ਹੈ | ਰੇਲਵੇ ਮੁਤਾਬਿਕ ਇਸ ਬਦਲਾਅ ਰਾਹੀਂ ਭਾਰਤੀ ਰੇਲਵੇ ਨੂੰ ਤਕਰੀਬਨ 600 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਹੋਣ ਦੀ ਉਮੀਦ ਹੈ | ਰੇਲਵੇ ਦਾ ਕਹਿਣਾ ਹੈ ਕਿ ਹੇਠਲੀ ਆਮਦਨ ਵਾਲੇ ਪਰਿਵਾਰਾਂ ਦਾ ਧਿਆਨ ਰੱਖਦਿਆਂ ਲੋਕਲ ਟਰੇਨਾਂ ਦੇ ਕਿਰਾਏ 'ਚ ਵਾਧਾ ਨਹੀਂ ਕੀਤਾ ਗਿਆ | ਰੇਲਵੇ ਮੁਤਾਬਿਕ ਪਿਛਲੇ 10 ਸਾਲਾਂ 'ਚ ਟਰੇਨਾਂ ਦੀ ਗਿਣਤੀ 'ਚ ਕਾਫ਼ੀ ਇਜ਼ਾਫਾ ਹੋਇਆ ਹੈ, ਨਾਲ ਹੀ ਟਰੇਨਾਂ ਦਾ ਵੀ ਵਿਸਥਾਰ ਕੀਤਾ ਗਿਆ | ਸੁਰੱਖਿਆ ਅਤੇ ਚੰਗੇ ਸੰਚਾਲਨ ਲਈ ਜ਼ਿਆਦਾ ਮੁਲਾਜ਼ਮਾਂ ਨੂੰ ਵੀ ਤਾਇਨਾਤ ਕੀਤਾ ਗਿਆ | ਰੇਲਵੇ ਤੇ ਹੁਣ ਮਨੁੱਖੀ ਵਸੀਲਿਆਂ ਦਾ 1.15 ਲੱਖ ਕਰੋੜ ਦਾ ਖਰਚਾ ਹੈ | ਇਸ ਤੋਂ ਇਲਾਵਾ ਪੈਨਸ਼ਨ ਦਾ ਵੀ ਪਹਿਲਾਂ ਤੋਂ ਹੀ ਭਾਰ ਹੈ | ਇਸ ਲਈ ਸੰਤੁਲਨ ਲਈ ਕਿਰਾਏ 'ਚ ਵਾਧਾ ਜ਼ਰੂਰੀ ਸੀ | ਜ਼ਿਕਰਯੋਗ ਹੈ ਕਿ ਭਾਰਤੀ ਰੇਲਵੇ ਵਲੋਂ ਟਿਕਟਾਂ ਦੀਆਂ ਕੀਮਤਾਂ 'ਚ ਇਸ ਸਾਲ 'ਚ ਦੂਜੀ ਵਾਰ ਵਾਧਾ ਕੀਤਾ ਗਿਆ ਹੈ | ਇਸ ਤੋਂ ਪਹਿਲਾਂ ਜੁਲਾਈ ਮਹੀਨੇ ਦੀ ਪਹਿਲੀ ਤਰੀਕ ਨੂੰ ਰੇਲ ਕਿਰਾਇਆ ਵਧਾਇਆ ਗਿਆ ਸੀ | ਉਸ ਵੇਲੇ ਵੀ ਕਿਰਾਏ ਦੇ ਢਾਂਚੇ 'ਚ ਏਨਾ ਹੀ ਵਾਧਾ ਕੀਤਾ ਗਿਆ ਸੀ |