ਅੰਮਿ੍ਤਸਰ 'ਚ ਵੀ ਆਨਲਾਈਨ ਰਜਿਸਟਰੀਆਂ ਲਈ ਤਿਆਰੀਆਂ ਸ਼ੁਰੂ
ਅਜੀਤ ਡੈਸਕ
04-06-2025
ਅੰਮਿ੍ਤਸਰ, 3 ਜੂਨ (ਰੇਸ਼ਮ ਸਿੰਘ)-ਮੋਹਾਲੀ 'ਚ ਈ. ਜੀ. ਰਜਿਸਟਰੀ ਦੀ ਕੀਤੀ ਸ਼ੁਰੂਆਤ ਉਪਰੰਤ ਅੰਮਿ੍ਤਸਰ 'ਚ ਵੀ ਜ਼ਿਲ੍ਹਾ ਪ੍ਰਸ਼ਾਸਨ ਵਲੋਂ ਆਨ ਲਾਈਨ ਰਜਿਸਟਰੀਆਂ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ ਅਤੇ ਸੰਭਾਵਨਾ ਹੈ ਕਿ ਇਹ ਸ਼ੁਰੂਆਤ ਇਸੇ ਮਹੀਨੇ 15 ਜੂਨ ਤੱਕ ਹੋ ਜਾਵੇਗੀ | ਇਸ ਦੇ ਨਾਲ ਹੀ ਅੰਮਿ੍ਤਸਰ ਸਬ ਰਜਿਸਟਰਾਰ ਦਫਤਰ-3 ਨੂੰ ਵੀ ਮੁਖ ਦਫਤਰ 'ਚ ਇਕ ਅਤੇ ਦੋ ਵਾਲੀ ਇਮਾਰਤ 'ਚ ਤਬਦੀਲ ਕੀਤਾ ਜਾ ਰਿਹਾ ਹੈ ਜਿਸ ਲਈ ਇਕ ਕਮਰੇ ਨੂੰ ਦਫਤਰ ਵਜੋਂ ਤਿਆਰ ਕਰਨ ਲਈ ਮੁਰੰਮਤ ਕੀਤੀ ਜਾ ਰਹੀ ਹੈ | ਕੌਮੀ ਜੈਨਰਿਕ ਡਾਕੂਮੈਂਟਸ ਰਜਿਸਟਰੇਸ਼ਨ ਤਹਿਤ ਇਸ ਨੂੰ ਭੁਗਤਾਨ ਆਦਿ ਕਰਨ ਦੇ ਵੀ ਕਾਊਾਟਰ ਖੋਲੇ ਜਾ ਰਹੇ ਹਨ ਤੇ ਰਜਿਸਟਰੀ ਕਲਰਕ ਪਹਿਲਾਂ ਵਾਂਗ ਇਸ ਤੇ ਕੱਚੀ ਪੈਨਸਲ ਨਾਲ ਆਪਣਾ ਕੋਈ ਨੰਬਰ ਨਹੀਂ ਲਗਾ ਸਕਣਗੇ ਅਤੇ ਨਾ ਹੀ ਕੋਈ ਦਸਤਾਵੇਜ਼ ਨਾਲ ਵਸੀਕਾ ਨਵੀਸਾਂ ਦਾ ਹੀ ਤਲਕ ਵਾਸਤਾ ਰਹੇਗਾ | ਖ਼ਾਸ ਗੱਲ ਇਹ ਹੈ ਕਿ ਲੋਕ ਆਪਣੀ ਰਜਿਸਟਰੇਸ਼ਨ ਕਿਸੇ ਵੀ ਦਫ਼ਤਰ 'ਚ ਪੇਸ਼ ਕਰ ਸਕਣਗੇ ਅਤੇ ਆਨ-ਲਾਈਨ ਤੇ ਡਿਜ਼ੀਟਲ ਭੁਗਤਾਨ ਲਈ ਵੀ ਇੱਥੇ ਵਿਸੇਸ਼ ਸਹੂਲਤ ਹੋਵੇਗੀ |
ਇਸ ਲਈ ਬਕਾਇਦਾ ਸਟਾਫ਼ ਨੂੰ ਸਿਖਲਾਈ ਦਿੱਤੀ ਜਾ ਰਹੀ ਹੈ, ਜਿਸ ਉਪੰਰਤ ਇਹ ਕੰਮ ਕਾਫੀ ਜਲਦ ਤੇ ਸੁਖਾਲਾ ਹੋ ਸਕੇਗਾ | ਦੂਜਾ ਪਹਿਲੂ ਇਹ ਹੈ ਕਿ ਇਸ ਫੈਸਲੇ ਨਾਲ ਭਿ੍ਸ਼ਟ ਅਧਿਕਾਰੀਆਂ ਤੇ ਕਰਮਚਾਰੀਆਂ ਦੇ ਸਾਹ ਸੁੱਕੇ ਹੋਏ ਹਨ ਜੋ ਰਜਿਸਟਰੀਆਂ ਦੇ ਕੰਮ ਤੋਂ ਮੋਟੀ ਕਮਾਈ ਕਰਦੇ ਰਹੇ ਹਨ | ਇੱਥੇ ਇਕ ਰਜਿਸਟਰੀ ਕਲਰਕ ਤਾਂ ਸਬ-ਰਜਿਸਟਰਾਰ ਤੋਂ ਵੀ ਮੋਟੀ ਕਮਾਈ ਕਰਨ ਦੇ ਚਰਚੇ ਹਨ ਜੋ ਹੁਣ ਸਭ ਤੋਂ ਵੱਧ ਤੌਖਲੇ 'ਚ ਦੱਸਿਆ ਗਿਆ ਹੈ |