ਅੰਮਿ੍ਤਸਰ, 7 ਦਸੰਬਰ (ਗਗਨਦੀਪ ਸ਼ਰਮਾ)-ਰਾਣੀ ਕਾ ਬਾਗ ਦੇ ਉੱਪਲ ਨਿਊਰੋ ਹਸਪਤਾਲ ਦੇ ਨਿਊਰੋਸਰਜਨ ਡਾ. ਸ਼ਿਖਲ ਉੱਪਲ ਨੇ ਹਾਲ ਹੀ ਵਿਚ ਦੁਬਈ 'ਚ ਹੋਈ ਵਿਸ਼ਵ ਨਿਊਰੋਸਰਜਰੀ ਕਾਨਫਰੰਸ (ਡਬਲਿਊ. ਐੱਫ. ਐੱਨ. ਐੱਸ. 2025) 'ਚ 'ਐਨਿਊਰਿਜ਼ਮ ਕੋਇਲਿੰਗ ਅੰਡਰ ਲੋਕਲ ਅਨੱਸਥੀਸੀਆ ਮਿੱਥ ਜਾਂ ਹਕੀਕਤ' ਵਿਸ਼ੇ 'ਤੇ ਖੋਜ ਪੱਤਰ ਪੜਿ੍ਹਆ | ਉਨ੍ਹਾਂ ਕਿਹਾ ਕਿ ਐਨਿਊਰਿਜ਼ਮ ਕੋਇਲਿੰਗ ਬਿਨਾਂ ਅਨੱਸਥੀਸੀਆ ਦੇ ਖਤਰਨਾਕ ਦਿਮਾਗੀ ਐਨਿਊਰਿਜ਼ਮ ਦੇ ਇਲਾਜ ਲਈ ਇਕ ਆਧੁਨਿਕ ਤੇ ਘੱਟੋ-ਘੱਟ ਹਮਲਾਵਰ ਤਕਨੀਕ ਹੈ ਜਿਹੜੀ ਬਿਨਾਂ ਓਪਨ ਸਰਜਰੀ ਦੇ ਇਸ ਪ੍ਰਕਿਰਿਆ ਵਿਚ ਕੋਇਲਾਂ ਨੂੰ ਇਕ ਪਤਲੇ ਕੈਥੀਟਰ ਰਾਹੀਂ ਦਿਮਾਗ ਦੇ ਖੂਨ ਦੀਆਂ ਨਾੜੀਆਂ 'ਚ ਪਹੁੰਚਾਇਆ ਜਾਂਦਾ ਹੈ ਅਤੇ ਉਹ ਸੁੱਜੇ ਹੋਏ ਖੇਤਰ ਨੂੰ ਭਰਨ ਦੇ ਨਾਲ ਫਟਣ ਦੇ ਜੋਖਮ ਨੂੰ ਘਟਾਉਂਦਾ ਹੈ | ਡਾ. ਸ਼ਿਖਲ ਉੱਪਲ ਨੇ ਦੱਸਿਆ ਕਿ ਇਸ ਤਕਨੀਕ ਨੂੰ ਮਰੀਜ਼ ਲਈ ਸੁਰੱਖਿਅਤ, ਘੱਟ ਦਰਦਨਾਕ ਮੰਨਿਆ ਜਾਂਦਾ ਹੈ ਅਤੇ ਇਹ ਤੇਜ਼ੀ ਨਾਲ ਰਿਕਵਰੀ ਪ੍ਰਦਾਨ ਕਰਦੀ ਹੈ | ਡਾ. ਸ਼ਿਖਿਲ ਉੱਪਲ ਨੇ ਦੱਸਿਆ ਕਿ ਇਹ ਉਨ੍ਹਾਂ ਦਾ ਤੀਜਾ ਕੌਮਾਂਤਰੀ ਖੋਜ ਪੱਤਰ ਹੈ ਅਤੇ ਦਾਅਵਾ ਕੀਤਾ ਕਿ ਇਹ ਮਾਣ ਹਾਸਿਲ ਕਰਨ ਵਾਲੇ ਉਹ ਅੰਮਿ੍ਤਸਰ ਦੇ ਪਹਿਲੇ ਨਿਊਰੋਸਰਜਨ ਹਨ | ਜ਼ਿਕਰਯੋਗ ਹੈ ਕਿ ਇਸ ਗਲੋਬਲ ਕਾਨਫਰੰਸ ਵਿਚ ਦੁਨੀਆ ਭਰ ਦੇ ਉੱਘੇ ਨਿਊਰੋਸਰਜਨਾਂ ਨੇ ਹਿੱਸਾ ਲੈਂਦਿਆਂ ਨਿਊਰੋਸਰਜਰੀ ਦੇ ਖੇਤਰ ਵਿਚ ਅਤਿ-ਆਧੁਨਿਕ ਖੋਜਾਂ 'ਤੇ ਚਰਚਾ ਕੀਤੀ |
