ਹਰੀਕੇ ਪੱਤਣ, 4 ਸਤੰਬਰ (ਸੰਜੀਵ ਕੁੰਦਰਾ)- ਮੀਂਹ ਇਸ ਵਾਰ ਵੱਡੀ ਆਫ਼ਤ ਬਣ ਕੇ ਸਾਹਮਣੇ ਆਇਆ ਹੈ, ਜਿੱਥੇ ਹੜ੍ਹਾਂ ਕਾਰਨ ਵੱਡੀ ਤਬਾਹੀ ਹੋਈ ਹੈ, ਉੱਥੇ ਅਨੇਕਾਂ ਸੜਕਾਂ ਅਤੇ ਪੁੱਲ ਆਦਿ ਤੇਜ਼ ਵਹਾਅ ਦੀ ਭੇਂਟ ਚੜ੍ਹ ਗਏ | ਕਸਬਾ ਹਰੀਕੇ ਪੱਤਣ ਵਿਚਲੀ ਸੜਕ (ਰਾਸ਼ਟਰੀ ਮਾਰਗ 54 ਪੁਰਾਣਾ) ਜੋ ਕਿ ਪਹਿਲਾਂ ਹੀ ਖਸਤਾ ਹਾਲਤ ਹੈ ਅਤੇ ਹਰੀਕੇ ਦਰਿਆ ਸਾਹਮਣੇ ਤੋਂ ਪਿਛਲੇ 3 ਸਾਲਾਂ ਤੋਂ ਟੁੱਟਾ ਹੋਇਆ ਹੈ ਪਰੰਤੂ ਅਜੇ ਤੱਕ ਨਹੀਂ ਬਣਿਆ ਕਿ ਇਸ ਵਾਰ ਹੋਈ ਜ਼ੋਰਦਾਰ ਮੀਂਹ ਕਾਰਨ ਮੱਛੀ ਮੰਡੀ ਨਜ਼ਦੀਕ ਸੜਕ ਦਾ ਵੱਡਾ ਹਿੱਸਾ ਤੇਜ਼ ਵਹਾਅ ਵਿਚ ਵਹਿ ਗਿਆ | ਜਿਕਰਯੋਗ ਹੈ ਕਿ ਤਿੰਨ ਸਾਲ ਪਹਿਲਾਂ ਦੀ ਟੁੱਟੀ ਸੜਕ ਕਈ ਵਾਰ ਹਾਦਸਿਆਂ ਦਾ ਕਾਰਨ ਬਣ ਚੁੱਕੀ ਹੈ ਪਰੰਤੂ ਹੁਣ ਨਵੀਂ ਜਗ੍ਹਾ ਤੋਂ ਪਾਣੀ ਦੀ ਭੇਂਟ ਚੜਿਆ ਸੜਕ ਦਾ ਹਿੱਸਾ ਵੱਡੇ ਹਾਦਸਿਆਂ ਨੂੰ ਸੱਦਾ ਦੇ ਰਿਹਾ ਹੈ ਕਿਉਂਕਿ ਸੜਕ ਦਾ ਹਿੱਸਾ ਵਹਿ ਚੁੱਕਾ ਹੈ, ਬਾਕੀ ਹਿੱਸੇ ਦੇ ਥੱਲਿਓਾ ਵੀ ਮਿੱਟੀ ਵਗੈਰਾ ਖੁਰ ਚੁੱਕੀ ਹੈ | ਵਿਭਾਗ ਨੇ ਮਿੱਟੀ ਦੀਆਂ ਬੋਰੀਆਂ ਆਦਿ ਰੱਖ ਕੇ ਖ਼ਾਨਾਪੂਰਤੀ ਕਰ ਦਿੱਤੀ ਹੈ | ਇਸ ਸੜਕ ਤੋਂ ਦਿਨ ਰਾਤ ਭਾਰੀ ਆਵਾਜਾਈ ਚੱਲਦੀ ਰਹਿੰਦੀ ਹੈ ਅਤੇ ਰਾਤ ਵੇਲੇ ਇਹ ਹੋਰ ਖ਼ਤਰਨਾਕ ਹੋ ਸਕਦਾ ਹੈ | ਹਰੀਕੇ ਨਿਵਾਸੀਆਂ ਦੀ ਮੰਗ ਹੈ ਕਿ ਇਸ ਸੜਕ ਦੀ ਮੁਰੰਮਤ ਤੁਰੰਤ ਕਰਵਾਈ ਜਾਵੇ |
