ਚੰਡੀਗੜ੍ਹ, 6 ਦਸੰਬਰ (ਅਜੀਤ ਬਿਊਰੋ)-ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ 'ਗਲੋਬਲ ਡਿਸਰਪਟਰਜ਼ ਜੀਨੀਅਸ ਹੱਬ' ਬੁੱਕਲੇਟ ਤੇ ਡਿਜੀਟਲ ਪਲੇਟਫ਼ਾਰਮ ਦਾ ਉਦਘਾਟਨ ਕੀਤਾ | ਇਹ ਪੂਰੀ ਤਰ੍ਹਾਂ ਮੁਫ਼ਤ ਗਲੋਬਲ ਪਲੇਟਫ਼ਾਰਮ ਹੈ, ਜੋ ਗਿਆਨ ਦੇਣ ਵਾਲਿਆਂ ਅਤੇ ਗਿਆਨ ਲੈਣ ਵਾਲਿਆਂ ਨੂੰ ਇੱਕੋ ਮੰਚ 'ਤੇ ਜੋੜਦਾ ਹੈ | ਇਸ ਅਭਿਆਨ ਦੇ ਸੰਸਥਾਪਕ ਹਰਿ ਓਮ ਵਰਮਾ, 54 ਸਾਲਾਂ ਦੇ ਤਜਰਬੇ ਵਾਲੇ ਮਕੈਨੀਕਲ ਇੰਜੀਨੀਅਰ ਤੇ ਉਦਯੋਗਪਤੀ ਹਨ | ਉਨ੍ਹਾਂ ਨੇ 1993 'ਚ ਰਮਾਣੀ ਪਿ੍ਸੀਜ਼ਨ ਮਸ਼ੀਨਜ਼ ਪ੍ਰਾ. ਲਿ. ਦੀ ਸਥਾਪਨਾ ਕੀਤੀ | ਉਨ੍ਹਾਂ ਦੇ ਨਵੀਨਤਮ ਕੰਮ ਲਈ ਉਨ੍ਹਾਂ ਨੂੰ ਤਿੰਨ ਰਾਸ਼ਟਰੀ ਇਨਾਮ ਮਿਲੇ-ਜੋ ਅਟਲ ਬਿਹਾਰੀ ਵਾਜਪਾਈ (2000) ਤੇ ਨਰਿੰਦਰ ਮੋਦੀ (2022) ਵਲੋਂ ਦਿੱਤੇ ਗਏ | ਬੁਲਾਰਿਆਂ ਨੇ ਕਿਹਾ ਕਿ ਗਲੋਬਲ ਡਿਸਰਪਟਰਜ਼ ਜੀਨੀਅਸ ਹੱਬ ਇੱਕ ਵਿਸ਼ਵ ਪੱਧਰੀ ਅੰਦੋਲਨ ਹੈ, ਜੋ ਗਿਆਨ ਸਾਂਝਾ ਕਰਨ, ਨਵੀਨਤਾ ਨੂੰ ਪ੍ਰੋਤਸਾਹਿਤ ਕਰਨ ਅਤੇ ਯੁਵਾ ਪ੍ਰਤਿਭਾ, ਸਟਾਰਟ-ਅੱਪ ਤੇ ਉਦਯੋਗ ਮੁਹਾਰਤੀਆਂ ਨੂੰ ਜੋੜਦਾ ਹੈ | ਇਸ ਦਾ ਮੁੱਖ ਸਿਧਾਂਤ ਹੈ ਕਿ ਆਪਣਾ ਗਿਆਨ ਸਾਂਝਾ ਕਰੋ, ਨਹੀਂ ਤਾਂ ਇਹ ਖ਼ਤਮ ਹੋ ਜਾਵੇਗਾ | ਹਰਿ ਓਮ ਵਰਮਾ ਦਾ ਨੇ ਆਪਣੇ ਸੰਦੇਸ਼ 'ਚ ਕਿਹਾ ਕਿ ਦੁਨੀਆ ਛੱਡਦੇ ਸਮੇਂ ਆਪਣੇ ਅੰਦਰ ਦਾ ਸਭ ਤੋਂ ਵਧੀਆ ਆਪਣੇ ਨਾਲ ਨਾ ਲੈ ਜਾਓ | ਰਾਜਪਾਲ ਨੇ ਇਸ ਸਮਾਜ-ਹਿਤੈਸ਼ੀ ਤੇ ਪੂਰੀ ਤਰ੍ਹਾਂ ਮੁਫ਼ਤ ਪਹਿਲ ਦੀ ਪ੍ਰਸ਼ੰਸਾ ਕੀਤੀ |
