19-11-2026
ਅੱਖਰ:
Ad Position 18 No active advertisement
ਵਿਚਾਰ ਪ੍ਰਵਾਹ
ਪ੍ਰਕਾਸ਼ਿਤ: 19-12-2025

ਲਾਲੜੂ ਖੇਤਰ ਲਈ ਖਤਰਾ ਬਣੇ ਬੇਸਹਾਰਾ ਪਸ਼ੂ <br/>

Ad Position 21
No active advertisement
ਲਾਲੜੂ ਖੇਤਰ ਦੇ ਰਿਹਾਇਸੀ ਖੇਤਰ ਵਿਚ ਘੁੰਮਦੇ ਹੋਏ ਬੇਸਹਾਰਾ ਪਸ਼ੂ | ਤਸਵੀਰਾਂ : ਰਾਜਬੀਰ ਸਿੰਘ <br/> ਮਿ੍ਤਕ ਸੰਤਾ ਸਿੰਘ ਦੀ ਫਾਈਲ ਫੋਟੋ <br/> 19-12-2025
ਲਾਲੜੂ, 18 ਦਸੰਬਰ (ਰਾਜਬੀਰ ਸਿੰਘ)-ਅੰਬਾਲਾ-ਚੰਡੀਗੜ੍ਹ ਕੌਮੀ ਮਾਰਗ ਸਮੇਤ ਇਲਾਕੇ 'ਚ ਘੁੰਮ ਰਹੇ ਬੇਸਹਾਰਾ ਪਸ਼ੂ ਖਤਰਨਾਕ ਸਾਬਿਤ ਹੋ ਰਹੇ ਹਨ | ਪਿੰਡ ਲੈਹਲੀ ਵਿਖੇ 15 ਦਸੰਬਰ ਨੂੰ ਆਪਣੇ ਘਰ ਦੇ ਸਾਹਮਣੇ ਇਕ ਬੇਸਹਾਰਾ ਸਾਨ੍ਹ ਦੇ ਹਮਲੇ ਨਾਲ ਜ਼ਖ਼ਮੀ ਹੋਏ 92 ਸਾਲਾ ਸੰਤਾ ਸਿੰਘ ਦੀ ਪੀ. ਜੀ. ਆਈ. ਚੰਡੀਗੜ੍ਹ 'ਚ ਇਲਾਜ ਦੌਰਾਨ ਮੌਤ ਹੋ ਗਈ | ਕੌਂਸਲ ਅਧਿਕਾਰੀ ਪਿਛਲੇ 15 ਸਾਲਾਂ ਤੋਂ ਇਸ ਮੁੱਦੇ ਨੂੰ ਹੱਲ ਕਰਨ ਦਾ ਵਿਸ਼ਵਾਸ ਤਾਂ ਦਿਵਾ ਰਹੇ ਹਨ, ਪਰ ਸਮੱਸਿਆ ਅਜੇ ਵੀ ਜਿਊਾ ਦੀ ਤਿਊਾ ਹੈ | ਜ਼ਿਕਰਯੋਗ ਹੈ ਕਿ ਅਕਾਲੀ ਸਰਕਾਰ ਸਮੇਂ ਦੌਰਾਨ ਪਿੰਡ ਮਗਰਾ 'ਚ 25 ਏਕੜ ਜ਼ਮੀਨ 'ਤੇ ਇਕ ਜ਼ਿਲ੍ਹਾ ਪੱਧਰੀ ਗਊਸ਼ਾਲਾ ਬਣਾਈ ਗਈ ਸੀ, ਜਿਸ 'ਤੇ ਕਰੋੜਾਂ ਰੁਪਏ ਖਰਚ ਕੀਤੇ ਜਾਣ ਦਾ ਵੀ ਦਾਅਵਾ ਕੀਤਾ ਗਿਆ ਸੀ | ਫਿਰ ਵੀ ਬੇਸਹਾਰਾ ਪਸ਼ੂ ਅਜੇ ਵੀ ਖੇਤਰ ਵਿਚ ਘੁੰਮਦੇ ਆਮ ਦੇਖੇ ਜਾ ਰਹੇ ਹਨ | ਗਊਸ਼ਾਲਾ ਦੇ ਨਿਰਮਾਣ ਤੋਂ ਬਾਅਦ ਪ੍ਰਸ਼ਾਸਨ, ਜਿਸ 'ਚ ਨਗਰ ਕੌਂਸਲ ਵੀ ਸ਼ਾਮਿਲ ਹੈ, ਨੇ ਕਦੇ ਵੀ ਬੇਸਹਾਰਾ ਪਸੂਆਂ ਨੂੰ ਫੜਨ ਤੇ ਗਊਸ਼ਾਲਾ ਵਿਚ ਛੱਡਣ ਦੀ ਖੇਚਲ ਨਹੀਂ ਕੀਤੀ | ਇਸ ਸੰਬੰਧੀ ਕਿਸਾਨ ਆਗੂ ਲਾਭ ਸਿੰਘ, ਕੌਲ ਸਿੰਘ, ਪ੍ਰੇਮ ਰਾਣਾ, ਜਨਕ ਰਾਜ ਮਗਰਾ, ਬਲਜੀਤ ਸਿੰਘ ਧਰਮਗੜ੍ਹ, ਸਰਬਜੀਤ ਸਿੰਘ, ਚੰਦਰਪਾਲ ਲਾਲੜੂ ਅਤੇ ਹਰਵਿੰਦਰ ਸਿੰਘ ਟੋਨੀ ਨੇ ਦੱਸਿਆ ਕਿ ਬੇਸਹਾਰਾ ਪਸ਼ੂ ਇਸ ਵੇਲੇ ਸਮਾਜ ਦੇ ਹਰ ਤਬਕੇ ਲਈ ਵੱਡੀ ਮੁਸੀਬਤ ਬਣੇ ਹੋਏ ਹਨ, ਪਰ ਪ੍ਰਸ਼ਾਸਨ ਦਾ ਇਸ ਪਾਸੇ ਕੋਈ ਧਿਆਨ ਨਹੀਂ ਹੈ | ਜਾਣਕਾਰੀ ਅਨੁਸਾਰ ਪਿਛਲੇ ਕੁਝ ਸਾਲ ਪਹਿਲਾਂ ਸਾਬਕਾ ਪਸ਼ੂ ਪਾਲਣ ਤੇ ਡੇਅਰੀ ਵਿਕਾਸ ਮੰਤਰੀ ਬਲਬੀਰ ਸਿੰਘ ਸਿੱਧੂ ਅਤੇ ਉਸ ਸਮੇਂ ਦੇ ਡਿਪਟੀ ਕਮਿਸ਼ਨਰ ਨੇ ਪਿੰਡ ਮਗਰਾ ਦੀ ਗਊਸ਼ਾਲਾ ਦਾ ਦੌਰਾ ਵੀ ਕੀਤਾ ਸੀ ਅਤੇ ਉਨ੍ਹਾਂ ਨੇ ਇਲਾਕੇ ਵਿਚ ਬੇਸਹਾਰਾ ਘੁੰਮ ਰਹੇ ਪਸ਼ੂਆਂ ਨੂੰ ਚੁੱਕਣ ਵਾਲਾ ਵਾਹਨ ਉਪਲੱਬਧ ਕਰਵਾ ਕੇ ਸਮੱਸਿਆ ਤੋਂ ਛੁਟਕਾਰਾ ਦਿਵਾਉਣ ਲਈ ਕਿਹਾ ਸੀ, ਜੋ ਹਾਲੇ ਵੀ ਅਧੂਰਾ ਹੈ |
ਹੁਣ ਤੱਕ ਬੇਸਹਾਰਾ ਪਸੂਆਂ ਦਾ ਸ਼ਿਕਾਰ ਹੋਏ ਲੋਕ
ਲਾਲੜੂ ਖੇਤਰ ਵਿਚ 27 ਜੁਲਾਈ 2019 ਨੂੰ 30 ਸਾਲਾ ਬਜਿੰਦਰ ਕੁਮਾਰ ਜੋ ਕਿ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਜਾ ਰਿਹਾ ਸੀ, ਦੀ ਅਚਾਨਕ ਬੇਸਹਾਰਾ ਪਸ਼ੂ ਮੁਹਰੇ ਆਉਣ ਨਾਲ ਮੌਕੇ 'ਤੇ ਹੀ ਮੌਤ ਹੋ ਗਈ ਸੀ | ਮਨਜੀਤ ਕੌਰ ਪਤਨੀ ਸੋਹਣ ਸਿੰਘ ਲਾਲੜੂ ਮੰਡੀ ਨੂੰ ਇਕ ਬੇਸਹਾਰਾ ਪਸ਼ੂ ਨੇ ਟੱਕਰ ਮਾਰ ਕੇ ਜ਼ਖ਼ਮੀ ਕਰ ਦਿੱਤਾ ਸੀ, ਜਿਸ ਦੇ ਇਲਾਜ ਦੌਰਾਨ 60-70 ਟਾਂਕੇ ਲਗਾਉਣੇ ਪਏ ਸਨ | ਕੌਮੀ ਮਾਰਗ 'ਤੇ ਬੇਸਹਾਰਾ ਪਸ਼ੂ ਨਾਲ ਹੋਈ ਟੱਕਰ ਨਾਲ ਮੋਟਰਸਾਈਕਲ ਸਵਾਰ 28 ਸਾਲਾ ਨੌਜਵਾਨ ਮਹਿੰਦਰ ਸਿੰਘ ਵਾਸੀ ਉੱਤਰਾਖੰਡ ਥੱਲੇ ਡਿੱਗ ਗਿਆ ਸੀ, ਜਿਸ ਦੀ ਟਰੱਕ ਦੀ ਲਪੇਟ 'ਚ ਆਉਣ ਨਾਲ ਮੌਤ ਹੋ ਗਈ ਸੀ | ਇਸ ਤੋਂ ਇਲਾਵਾ ਛੋਟੂ, ਲੱਜਾ ਰਾਮ, ਅਜਮੇਰ ਸਿੰਘ, ਭਿੰਦੀ, ਜੈ ਦੇਵ ਭੱਟੀ, ਨਿਖਿਲ, ਸੰਦੀਪ ਕੁਮਾਰ ਤੋਂ ਇਲਾਵਾ ਲਾਲੜੂ ਵਿਖੇ ਆਪਣੇ ਘਰ ਮੁਹਰੇ ਬੈਠੇ ਬਜ਼ੁਰਗ ਬਲਵੰਤ ਸਿੰਘ ਸਮੇਤ ਇਕ ਹੋਰ ਬਜ਼ੁਰਗ ਵੀ ਬੇਸਹਾਰਾ ਪਸ਼ੂ ਦੇ ਹਮਲੇ ਦਾ ਸ਼ਿਕਾਰ ਹੋ ਚੁੱਕੇ ਹਨ | ਇਸ ਸੰਬੰਧੀ ਸੰਪਰਕ ਕਰਨ 'ਤੇ ਨਗਰ ਕੌਂਸਲ ਲਾਲੜੂ ਦੇ ਈ. ਓ. ਅਸ਼ੋਕ ਪਥਰੀਆ ਨੇ ਕਿਹਾ ਕਿ ਉਹ ਇਸ ਸਮੇਂ ਪੰਜਾਬ ਤੋਂ ਬਾਹਰ ਹਨ ਤੇ ਵਾਪਸ ਆ ਕੇ ਸਮੱਸਿਆ ਦਾ ਹੱਲ ਪਹਿਲ ਦੇ ਅਧਾਰ 'ਤੇ ਕਰਵਾਉਣਗੇ |

Ad Position 22
No active advertisement
ਪਿਛਲੀ ਖ਼ਬਰ ਨੀਲਮ ਯੂਨੀਵਰਸਿਟੀ ਤੇ ਐਨ. ਜੀ. ਏ. ਆਈ. ਵਲੋਂ ਗਤਕੇ ਦੇ ਵਿਕਾਸ ਲਈ ਭਾਈਵਾਲੀ <br/> ਅਗਲੀ ਖ਼ਬਰ ਜਿੰਦਲ ਆਈ. ਵੀ. ਐਫ. ਨੇ ਜਟਿਲ ਬਾਂਝਪਨ ਦੇ ਮਾਮਲਿਆਂ ਦੇ ਸਫਲ ਪ੍ਰਬੰਧਨ 'ਚ ਮੁਹਾਰਤ ਕੀਤੀ ਸਾਬਤ
Ad Position 24