ਅਮਲੋਹ, 1 ਜੂਨ (ਅੰਮਿ੍ਤ ਸਿੰਘ ਸ਼ੇਰਗਿੱਲ)-ਅੱਜ ਅਮਲੋਹ ਅਨਾਜ ਮੰਡੀ 'ਚ ਬਸੰਤ ਰੁੱਤ ਦੀ ਮੱਕੀ ਦੀ ਆਮਦ ਸ਼ੁਰੂ ਹੋ ਗਈ ਹੈ, ਅੱਜ ਪਹਿਲੇ ਦਿਨ ਬੋਲੀ 'ਤੇ ਨਵੀਂ ਮੱਕੀ ਦਾ ਭਾਅ 2150 ਤੋਂ 2200 ਪ੍ਰਤੀ ਕੁਇੰਟਲ ਦਰਮਿਆਨ ਰਿਹਾ | ਮੰਡੀ ਵਿਚ ਮੌਜੂਦ ਆੜ੍ਹਤੀਆਂ ਨੇ ਗੱਲ ਕਰਨ 'ਤੇ ਦੱਸਿਆ ਕਿ ਇਸ ਵਾਰ ਮੱਕੀ ਦੀ ਗੁਣਵੱਤਾ ਪਿਛਲੇ ਸਾਲ ਨਾਲੋਂ ਕਾਫ਼ੀ ਬਿਹਤਰ ਹੈ ਤੇ ਆਉਣ ਵਾਲੇ ਦਿਨਾਂ ਵਿਚ ਜਿਵੇਂ ਜਿਵੇਂ ਆਮਦ ਤੇਜ਼ ਹੋਏਗੀ ਮੱਕੀ ਦੀ ਗੁਣਵੱਤਾ ਵਿਚ ਵੀ ਹੋਰ ਸੁਧਾਰ ਆਵੇਗਾ | ਜਾਣਕਾਰੀ ਮੁਤਾਬਿਕ, ਮੱਕੀ ਦੇ ਪੱਕਣ ਲਈ ਲਗਪਗ 120 ਦਿਨ ਲੱਗਦੇ ਹਨ | ਇਲਾਕੇ ਵਿਚ ਇਸ ਦੀ ਬਿਜਾਈ ਫਰਵਰੀ ਦੇ ਪਹਿਲੇ ਹਫ਼ਤੇ ਤੋਂ ਸ਼ੁਰੂ ਹੋਈ ਸੀ, ਜਿਸ ਕਰਕੇ ਅਗਲੇ ਹਫ਼ਤੇ ਤੱਕ ਮੰਡੀ 'ਚ ਆਮਦ ਤੇਜ਼ ਹੋ ਜਾਵੇਗੀ | ਇਹ ਵੀ ਵਰਨਣਯੋਗ ਹੈ ਕਿ ਇਸ ਵਾਰ ਅਮਲੋਹ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿਚ ਕਈ ਕਿਸਾਨਾਂ ਨੇ ਸੂਰਜਮੁਖੀ ਦੀ ਥਾਂ ਮੱਕੀ ਦੀ ਕਾਸ਼ਤ ਨੂੰ ਤਰਜੀਹ ਦਿੱਤੀ ਹੈ | ਪਿਛਲੇ ਸਾਲਾਂ ਵਿਚ ਮੱਕੀ ਦੀ ਕਾਸ਼ਤ ਕਰਨ ਵਾਲੇ ਕਿਸਾਨਾਂ ਨੂੰ ਵਧੀਆ ਮੁਨਾਫ਼ਾ ਹੋਇਆ ਸੀ, ਜਦਕਿ ਸੂਰਜਮੁਖੀ ਦੀ ਫ਼ਸਲ ਉਚਿੱਤ ਬੀਜ ਦੀ ਕਮੀ ਕਾਰਨ ਪ੍ਰਭਾਵਿਤ ਹੋਈ ਸੀ | ਜਿਸ ਕਾਰਨ ਕਿਸਾਨਾਂ ਨੇ ਰਕਬੇ ਵਿਚ ਮੱਕੀ ਬੀਜੀ ਹੈ | ਅੱਜ ਪਹਿਲੇ ਦਿਨ ਮੰਡੀ ਵਿਚ ਮੱਕੀ ਦੀ ਖ਼ਰੀਦ ਦੀ ਸ਼ੁਰੂਆਤ ਹੋਣ ਸਮੇਂ ਆੜ੍ਹਤੀਆਂ ਐਸੋਸੀਏਸ਼ਨ ਦੇ ਪ੍ਰਧਾਨ ਪਰਮਵੀਰ ਸਿੰਘ ਮਾਂਗਟ, ਨਰੇਸ਼ ਕੁਮਾਰ ਗਰਗ, ਰਾਜ ਸਿੰਘ ਵਿਰਕ, ਮੋਹਿਤ ਬਾਂਸਲ, ਮਹਿੰਦਰ ਪਾਲ, ਹੈਪੀ, ਮੁਨੀਮ ਜੂਨੀਅਰ ਪ੍ਰਧਾਨ ਗਗਨਦੀਪ ਧੀਰ ਅਤੇ ਮੋਹਨ ਕੁਮਾਰ ਹਾਜ਼ਰ ਸਨ |
