ਨਵੀਂ ਦਿੱਲੀ, 4 ਸਤੰਬਰ (ਉਪਮਾ ਡਾਗਾ ਪਾਰਥ)-ਕਾਂਗਰਸ ਨੇ ਬੁੱਧਵਾਰ ਨੂੰ ਸਰਕਾਰ ਵਲੋਂ ਐਲਾਨੇ ਜੀ. ਐਸ. ਟੀ. ਸੁਧਾਰਾਂ ਨੂੰ ਨਾਕਾਫ਼ੀ ਦੱਸਦਿਆਂ ਕਿਹਾ ਕਿ ਹਾਲੇ ਵੀ ਸੱਚੇ ਜੀ. ਐਸ. ਟੀ. 2.0 ਦੀ ਉਡੀਕ ਬਾਕੀ ਹੈ | ਕਾਂਗਰਸੀ ਦੇ ਜਨਰਲ ਸਕੱਤਰ ਜੈਰਾਮ ਰਮੇਸ਼ ਨੇ ਸਰਕਾਰ ਵਲੋਂ ਐਲਾਨੇ ਜੀ. ਐਸ. ਟੀ. ਸੁਧਾਰਾਂ ਨੂੰ ਜੀ. ਐਸ. ਟੀ. 1.5 ਦੱਸਦਿਆਂ ਕਿਹਾ ਕਿ ਹਾਲੇ ਇਹ ਵੇਖਣਾ ਕਿ ਨਿੱਜੀ ਨਿਵੇਸ਼ ਨੂੰ ਉਤਸ਼ਾਹ ਮਿਲੇਗਾ? ਕੀ ਸੂਖਮ, ਛੋਟੇ ਅਤੇ ਮੱਧਮ ਕਾਰੋਬਾਰਾਂ (ਐਮ. ਐਸ. ਐਮ. ਈ.) 'ਤੇ ਬੋਝ ਘੱਟ ਹੋਵੇਗਾ? ਜੈਰਾਮ ਰਮੇਸ਼ ਨੇ ਇਹ ਵੀ ਕਿਹਾ ਕਿ ਰਾਜਾਂ ਦੀ ਇਹ ਮੰਗ ਅਜੇ ਵੀ ਅਣਸੁਲਝੀ ਹੈ ਅਤੇ ਹੁਣ ਪਹਿਲਾਂ ਤੋਂ ਵੀ ਅਹਿਮ ਹੋ ਗਈ ਹੈ ਕਿ ਮਾਲੀਏ ਦੇ ਨੁਕਸਾਨ ਦੀ ਮਿਆਦ ਨੂੰ 5 ਸਾਲ ਲਈ ਹੋਰ ਵਧਾਇਆ ਜਾਵੇ | ਰਮੇਸ਼ ਨੇ ਸੋਸ਼ਲ ਮੀਡੀਆ ਮੰਚ 'ਐਕਸ' 'ਤੇ ਪਾਏ ਸੰਦੇਸ਼ 'ਚ ਕਿਹਾ ਕਿ ਕਾਂਗਰਸ ਲੰਮੇ ਸਮੇਂ ਤੋਂ ਜੀ. ਐਸ. ਟੀ. 2.0 ਦੀ ਵਕਾਲਤ ਕਰ ਰਹੀ ਹੈ, ਜਿਸ ਨਾਲ ਟੈਕਸ ਦਰ ਾਂ ਦੀ ਗਿਣਤੀ ਘੱਟ ਹੋਵੇ | ਵੱਡੇ ਪੱਧਰ 'ਤੇ ਖਪਤ ਕੀਤੀਆਂ ਜਾਣ ਵਾਲੀਆਂ ਵਸਤਾਂ 'ਤੇ ਟੈਕਸ ਦਰਾਂ 'ਚ ਕਟੌਤੀ ਹੋਵੇ | ਨਾਲ ਹੀ ਟੈਕਸ ਚੋਰੀ, ਗਲਤ ਵਰਗੀਕਰਨ ਅਤੇ ਵਿਵਾਦ ਘੱਟ ਹੋਣ, ਉਲਟੇ ਟੈਕਸ ਢਾਂਚੇ ਨੂੰ ਖ਼ਤਮ ਕੀਤਾ ਜਾਵੇ, ਐਮ. ਐਸ. ਐਸ. ਈ. 'ਤੇ ਅਮਲਾਂ ਦਾ ਬੋਝ ਘੱਟ ਕੀਤਾ ਜਾਵੇ ਅਤੇ ਜੀ. ਐਸ. ਟੀ. ਕਵਰੇਜ ਨੂੰ ਵਿਸਥਾਰ ਦਿੱਤਾ ਜਾਵੇ |
