ਅੰਮਿ੍ਤਸਰ, 24 ਸਤੰਬਰ (ਸੁਰਿੰਦਰ ਕੋਛੜ)-ਸੰਨ 1948, 1965, 1971 ਅਤੇ 1999 ਦੇ ਕਾਰਗਿਲ ਯੁੱਧ ਸਮੇਤ ਭਾਰਤ ਨਾਲ ਹਰ ਜੰਗ 'ਚ ਚਾਰੋ-ਖਾਨੇ ਚਿੱਤ ਹੋਣ ਦੇ ਬਾਵਜੂਦ ਜੇਤੂ ਹੋਣ ਦਾ ਦਾਅਵਾ ਕਰਦੇ ਆ ਰਹੇ ਗੁਆਂਢੀ ਮੁਲਕ ਪਾਕਿਸਤਾਨ ਨੇ ਆਪ੍ਰੇਸ਼ਨ ਸੰਧੂਰ 'ਚ ਵੀ ਆਪਣੇ ਆਪ ਨੂੰ ਜੇਤੂ ਐਲਾਨਿਆ ਹੈ | ਪਾਕਿ ਨੇ ਮਈ 2025 ਦੀ ਪਾਠ-ਪੁਸਤਕ 'ਚ ਭਾਰਤ ਨਾਲ ਟਕਰਾਅ ਨੂੰ ਸ਼ਾਮਿਲ ਕਰਦਿਆਂ ਪਾਕਿਸਤਾਨੀ ਵਿਦਿਆਰਥੀਆਂ ਨੂੰ ਭਾਰਤ-ਪਾਕਿ ਦੀ ਹਾਲ ਹੀ 'ਚ ਹੋਈ ਜੰਗ ਬਾਰੇ ਝੂਠ ਪਰੋਸਿਆ ਗਿਆ ਹੈ | ਪਾਕਿ ਨੇ ਇਸ ਪਾਠ-ਪੁਸਤਕ 'ਚ ਦਾਅਵਾ ਕੀਤਾ ਹੈ ਕਿ ਉਸ ਨੇ ਹਮਲੇ ਦੌਰਾਨ ਕਈ ਭਾਰਤੀ ਹਵਾਈ ਅੱਡਿਆਂ ਨੂੰ ਤਬਾਹ ਕਰ ਦਿੱਤਾ | ਉਸ ਨੇ 26 ਮਹੱਤਵਪੂਰਨ ਭਾਰਤੀ ਟਿਕਾਣਿਆਂ 'ਤੇ ਵੱਡੇ ਹਮਲੇ ਕੀਤੇ ਅਤੇ ਡੋਨਾਲਡ ਟਰੰਪ ਦੀਆਂ ਵਾਰ-ਵਾਰ ਅਪੀਲਾਂ ਤੋਂ ਬਾਅਦ ਹੀ ਜੰਗਬੰਦੀ ਲਈ ਸਹਿਮਤੀ ਦਿੱਤੀ | ਇਹ ਪਹਿਲੀ ਵਾਰ ਨਹੀਂ ਹੈ, ਜਦੋਂ ਪਾਕਿਸਤਾਨ ਨੇ ਬੇਸ਼ਰਮੀ ਨਾਲ ਇਤਿਹਾਸ ਨੂੰ ਝੂਠਾ ਬਣਾਇਆ ਹੈ | ਉਦਾਹਰਨ ਵਜੋਂ, ਇਹ 1971 ਦੀ ਉਸ ਜੰਗ 'ਚ ਵੀ ਜੇਤੂ ਹੋਣ ਦਾ ਦਾਅਵਾ ਕਰਦਾ ਆ ਰਿਹਾ ਹੈ, ਜਿਸ 'ਚ ਨਾ ਸਿਰਫ਼ ਪਾਕਿ ਨੂੰ ਦੋ ਹਿੱਸਿਆਂ 'ਚ ਵੰਡਿਆ ਗਿਆ ਸੀ, ਸਗੋਂ 93 ਹਜ਼ਾਰ ਪਾਕਿਸਤਾਨੀ ਸੈਨਿਕਾਂ ਨੇ ਭਾਰਤ ਅੱਗੇ ਆਤਮ ਸਮਰਪਣ ਕਰ ਦਿੱਤਾ ਸੀ |
