ਸਮਰਾਲਾ, 6 ਦਸੰਬਰ (ਗੋਪਾਲ ਸੋਫਤ)-ਖੇਤੀਬਾੜੀ ਅਫ਼ਸਰ-ਕਮ-ਭੋਂ ਪਰਖ ਅਫ਼ਸਰ ਸਮਰਾਲਾ ਗੌਰਵ ਧੀਰ ਦੀ ਅਗਵਾਈ ਹੇਠ ਪਿੰਡ ਕੁੱਲੇਵਾਲ ਵਿਚ ਵਿਸ਼ਵ ਮਿੱਟੀ ਦਿਵਸ ਮਨਾਇਆ ਗਿਆ | ਇਸ ਮੌਕੇ ਡਾ. ਧੀਰ ਨੇ ਕਿਸਾਨਾਂ ਨੂੰ ਮਿੱਟੀ ਪਰਖ ਦੀ ਮਹੱਤਤਾ ਬਾਰੇ ਜਾਗਰੂਕ ਕੀਤਾ | ਡਾ. ਅਮਨਦੀਪ ਕੌਰ (ਏ. ਡੀ. ਓ.-ਭੌਂ ਪਰਖ) ਨੇ ਵੀ ਕਿਸਾਨਾਂ ਨੂੰ ਸੰਦੇਸ਼ ਦਿੱਤਾ ਕਿ ਮਿੱਟੀ ਦੀ ਪਰਖ ਪਿੱਛੋਂ ਲੋੜੀਂਦੀ ਖਾਦ ਪਾਉਣ ਨਾਲ ਫ਼ਸਲ ਉਤਪਾਦਨ ਵਿਚ ਵਾਧਾ ਹੁੰਦਾ ਹੈ ਅਤੇ ਖਰਚੇ ਘਟਦੇ ਹਨ | ਇਸ ਤੋਂ ਇਲਾਵਾ ਸਰਕਾਰ ਵਲੋਂ ਕਿਸਾਨਾਂ ਲਈ ਉਪਲਬਧ ਵੱਖ-ਵੱਖ ਸਬਸਿਡੀਆਂ ਅਤੇ ਸੁਵਿਧਾਵਾਂ ਬਾਰੇ ਵੀ ਜਾਣਕਾਰੀ ਸਾਂਝੀ ਕੀਤੀ ਗਈ | ਏ. ਡੀ. ਓ. ਗਗਨਦੀਪ ਨੇ ਇਹ ਵੀ ਰੌਸ਼ਨੀ ਪਾਈ ਕਿ ਲਗਾਤਾਰ ਰਸਾਇਣਿਕ ਖਾਦਾਂ ਦੀ ਵਧੀਕ ਵਰਤੋਂ ਕਾਰਨ ਮਿੱਟੀ ਦੀ ਗੁਣਵੱਤਾ ਘਟਦੀ ਹੈ, ਜਿਸ ਨਾਲ ਉਪਜ 'ਤੇ ਨਕਾਰਾਤਮਿਕ ਪ੍ਰਭਾਵ ਪੈਂਦਾ ਹੈ | ਏ. ਡੀ. ਓ. ਹਿਮਾਂਸ਼ੂ ਅਗਰਵਾਲ ਨੇ ਇਸ ਲਈ ਜੈਵਿਕ ਖੇਤੀ, ਹਰੀ ਖਾਦ ਤੇ ਫ਼ਸਲ ਚੱਕਰ ਵਰਗੇ ਤਰੀਕੇ ਮਿੱਟੀ ਨੂੰ ਦੁਬਾਰਾ ਜੀਵੰਤ ਬਣਾਉਣ ਲਈ ਬਹੁਤ ਜ਼ਰੂਰੀ ਹਨ | ਕਿਸਾਨਾਂ ਨੂੰ ਮਿੱਟੀ ਵਿਚ ਜ਼ਰੂਰੀ ਸੂਖਮ ਤੱਤਾਂ ਦੀ ਕਮੀ ਬਾਰੇ ਵੀ ਜਾਣਕਾਰੀ ਦਿੱਤੀ ਗਈ ਅਤੇ ਉਨ੍ਹਾਂ ਤੱਤਾਂ ਦੀ ਪੂਰਤੀ ਲਈ ਵਿਗਿਆਨਕ ਤਰੀਕੇ ਸਾਂਝੇ ਕੀਤੇ ਗਏ | ਇਸ ਦੇ ਨਾਲ ਖੇਤੀਬਾੜੀ ਉਪ ਨਿਰੀਖਕ ਚਮਕੌਰ ਸਿੰਘ ਨੇ ਕੈਂਪ ਵਿਚ ਮੌਜੂਦ ਕਿਸਾਨਾਂ ਨੂੰ ਮਿੱਟੀ ਦੇ ਨਮੂਨੇ ਸਹੀ ਤਰੀਕੇ ਨਾਲ ਲੈਣ ਦੀ ਪ੍ਰਕਿਰਿਆ ਵੀ ਦਿਖਾਈ ਗਈ ਤਾਂ ਜੋ ਸਹੀ ਰਿਪੋਰਟ ਮਿਲ ਸਕੇ | ਵਿਭਾਗ ਨੇ ਭਵਿੱਖ ਵਿਚ ਹੋਰ ਪਿੰਡਾਂ ਵਿਚ ਵੀ ਇਸ ਤਰ੍ਹਾਂ ਦੇ ਪ੍ਰੋਗਰਾਮ ਕਰ ਕੇ ਮਿੱਟੀ ਸੁਰੱਖਿਆ ਅਤੇ ਟਿਕਾਊ ਖੇਤੀ ਪ੍ਰਤੀ ਜਾਗਰੂਕਤਾ ਵਧਾਉਣ ਦਾ ਭਰੋਸਾ ਦਿੱਤਾ | ਇਸ ਮੌਕੇ ਪਰਗਟ ਸਿੰਘ, ਜਗਦੀਪ ਸਿੰਘ ਓਟਾਲ, ਸਰਪੰਚ ਜਸਵੰਤ ਸਿੰਘ, ਸਾਬਕਾ ਸਰਪੰਚ ਜਗਤਾਰ ਸਿੰਘ, ਤਰਲੋਚਨ ਸਿੰਘ, ਗੁਰਦੀਪ ਸਿੰਘ, ਕਿਰਨਦੀਪ ਸਿੰਘ, ਜੋਧ ਸਿੰਘ ਅਤੇ ਸੁਰਜੀਤ ਸਿੰਘ ਆਦਿ ਹਾਜ਼ਰ ਸਨ |
