ਕੌਂਸਲ ਦੀ ਨਵੀਂ ਵਾਰਡਬੰਦੀ ਦਾ ਨਕਸ਼ਾ ਲਾ ਕੇ ਹਟਾਉਣ ਦਾ ਕਾਂਗਰਸੀ ਅਤੇ ਅਕਾਲੀ ਨੇਤਾਵਾਂ ਵਲੋਂ ਵਿਰੋਧ
ਅਜੀਤ ਡੈਸਕ
27-12-2025
ਲੋਕਤੰਤਰ ਦਾ ਕੀਤਾ ਜਾ ਰਿਹਾ ਘਾਣ-ਯਾਦੂ
ਸ਼੍ਰੋਮਣੀ ਅਕਾਲੀ ਦਲ ਦੇ ਕੌਮੀ ਜਨਰਲ ਸਕੱਤਰ ਅਤੇ ਹਲਕਾ ਇੰਚਾਰਜ ਯਾਦਵਿੰਦਰ ਸਿੰਘ ਯਾਦੂ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਲੋਕਤੰਤਰ ਦਾ ਘਾਣ ਕਰ ਰਹੀ ਹੈ | ਨਵੀਂ ਵਾਰਡਬੰਦੀ ਦਾ ਨਕਸ਼ਾ ਅੱਧ ਪੌਣੇ ਘੰਟੇ ਲਈ ਹੀ ਲਗਾਇਆ ਗਿਆ ਅਤੇ ਬਾਅਦ ਵਿਚ ਲਾਹ ਲਿਆ ਗਿਆ | ਸਾਨੂੰ ਨਹੀਂ ਪਤਾ ਕਿ ਇਹ ਨਕਸ਼ਾ ਵੀ ਅਸਲੀ ਹੈ ਜਾਂ ਅਸਲ ਵਿਚ ਦਿਖਾਉਣ ਲਈ ਹੀ ਕੋਈ ਨਕਲੀ ਨਕਸ਼ਾ ਲਗਾ ਦਿੱਤਾ ਗਿਆ ਕਿਉਂਕਿ ਜੇਕਰ ਇਹੀ ਨਕਸ਼ਾ ਅਸਲੀ ਹੈ ਤਾਂ ਇਸ ਨੂੰ ਉਤਾਰਨ ਦੀ ਕੀ ਜ਼ਰੂਰਤ ਸੀ? ਇਸ ਨੂੰ ਹਫ਼ਤਾ ਭਰ ਲਗਾਇਆ ਜਾਣਾ ਚਾਹੀਦਾ ਸੀ | ਉਨ੍ਹਾਂ ਕਿਹਾ ਕਿ ਆਮ ਆਦਮੀ ਪਾਰਟੀ ਅਸਲ ਵਿਚ ਹਾਰ ਮੰਨ ਚੁੱਕੀ ਹੈ ਕਿਉਂਕਿ ਜੇਕਰ ਉਸ ਨੂੰ ਹਾਰ ਦਾ ਡਰ ਨਹੀਂ ਤਾਂ ਅਜਿਹੀਆਂ ਕਾਰਵਾਈ ਨਹੀਂ ਕਰਦੀ |
ਲੋਕਤੰਤਰ ਲੀਰੋਂ ਲੀਰ ਕੀਤਾ- ਗੁਰਕੀਰਤ
ਸਾਬਕਾ ਮੰਤਰੀ ਗੁਰਕੀਰਤ ਸਿੰਘ ਨੇ ਨਵੀਂ ਵਾਰਡਬੰਦੀ ਦਾ ਨਕਸ਼ਾ ਸਿਰਫ਼ 1 ਘੰਟੇ ਤੋਂ ਵੀ ਘੱਟ ਸਮਾਂ ਲਗਾਉਣ ਅਤੇ ਉਹ ਵੀ ਦਫ਼ਤਰ ਬੰਦ ਹੋਣ ਦੇ ਸਮੇਂ ਤੋਂ ਬਾਅਦ ਲਗਾਉਣ ਨੂੰ ਤਿੱਖੇ ਸ਼ਬਦਾਂ ਵਿਚ ਨਿੰਦਿਆ ਅਤੇ ਕਿਹਾ ਕਿ ਲੋਕਤੰਤਰ ਲੀਰੋਂ ਲੀਰ ਕੀਤਾ ਜਾ ਰਿਹਾ ਹੈ | ਆਮ ਆਦਮੀ ਪਾਰਟੀ ਨਵੀਂ ਵਾਰਡਬੰਦੀ ਨੂੰ ਲੁਕੋਣਾ ਕਿਉਂ ਚਾਹੁੰਦੀ ਹੈ ਇਹ ਲੋਕ ਆਪ ਹੀ ਸਮਝ ਲੈਣ | ਉਨ੍ਹਾਂ ਕਿਹਾ ਕਿ ਖੰਨਾ ਨਗਰ ਕੌਂਸਲ ਦੀਆਂ ਚੋਣਾਂ ਵਿਚ ਕਾਂਗਰਸ ਦੀ ਜਿੱਤ ਯਕੀਨੀ ਹੈ | ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਕੌਂਸਲਰ ਗੁਰਮੀਤ ਸਿੰਘ ਨਾਗਪਾਲ, ਅਮਰੀਸ਼ ਕਾਲੀਆ ਅਤੇ ਹੋਰ ਕਾਂਗਰਸੀ ਆਗੂ ਵੀ ਹਾਜ਼ਰ ਸਨ, ਜਿਨ੍ਹਾਂ ਨੇ ਇਸ ਕਾਰਵਾਈ ਦਾ ਸਖ਼ਤ ਵਿਰੋਧ ਕੀਤਾ |
