ਕ੍ਰਿਕਟਰ ਰਿੰਕੂ ਸਿੰਘ ਦੀ ਸੰਸਦ ਮੈਂਬਰ ਪ੍ਰੀਆ ਸਰੋਜ ਨਾਲ ਮੰਗਣੀ 8 ਨੂੰ

ਜੌਨਪੁਰ (ਯੂ. ਪੀ.), 1 ਜੂਨ (ਏਜੰਸੀ)- ਰਾਜਨੀਤੀ ਤੇ ਕ੍ਰਿਕਟ ਦੀ ਦੁਨੀਆ ਦੇ ਦੋ ਉੱਭਰਦੇ ਸਿਤਾਰੇ ਹੁਣ ਇੱਕ ਦੂਜੇ ਦੇ ਨਾਲ ਹੋਣ ਜਾ ਰਹੇ ਹਨ। ਇੱਥੇ ਅਸੀਂ ਸਮਾਜਵਾਦੀ ਪਾਰਟੀ ਦੀ ਨੌਜਵਾਨ ਤੇ ਚਮਕਦਾਰ ਸੰਸਦ ਮੈਂਬਰ ਪ੍ਰਿਆ ਸਰੋਜ ਤੇ ਸਟਾਰ ਕ੍ਰਿਕਟਰ ਰਿੰਕੂ ਸਿੰਘ ਬਾਰੇ ਗੱਲ ਕਰ ਰਹੇ ਹਾਂ। ਦੋਵਾਂ ਦਾ ਰਿਸ਼ਤਾ ਪਹਿਲਾਂ ਹੀ ਤੈਅ ਹੋ ਚੁੱਕਾ ਹੈ ਤੇ ਦੋਵੇਂ ਪਿਛਲੇ ਡੇਢ ਸਾਲ ਤੋਂ ਇੱਕ ਦੂਜੇ ਨੂੰ ਜਾਣਦੇ ਹਨ। ਮੀਡੀਆ ਰਿਪੋਰਟਾਂ ਅਨੁਸਾਰ, ਜੌਨਪੁਰ ਦੀ ਮਛਲੀਸ਼ਹਿਰ ਲੋਕ ਸਭਾ ਸੀਟ ਤੋਂ ਸਮਾਜਵਾਦੀ ਸੰਸਦ ਮੈਂਬਰ ਪ੍ਰਿਆ ਸਰੋਜ ਅਗਲੇ ਐਤਵਾਰ, 8 ਜੂਨ ਨੂੰ ਰਿੰਕੂ ਸਿੰਘ ਨਾਲ ਮੰਗਣੀ ਕਰ ਲੈਣਗੇ। ਦੋਵਾਂ ਦੀ ਰਿੰਗ ਸੈਰੇਮਨੀ ਲਖਨਊ ਵਿਚ ਹੋਵੇਗੀ। ਇਸ ਦੇ ਨਾਲ ਹੀ ਕ੍ਰਿਕਟ ਦੇ ਮੈਦਾਨ ਵਿਚ ਚੌਕੇ-ਛੱਕੇ ਮਾਰਨ ਵਾਲੇ ਰਿੰਕੂ ਤੇ ਪ੍ਰਿਆ ਦੇ ਵਿਆਹ ਦੀ ਤਰੀਕ ਵੀ ਤੈਅ ਹੋ ਗਈ ਹੈ। ਦੋਵੇਂ 18 ਨਵੰਬਰ ਨੂੰ ਵਾਰਾਣਸੀ ਦੇ ਹੋਟਲ ਤਾਜ ਵਿਚ ਇੱਕ ਸ਼ਾਨਦਾਰ ਸਮਾਰੋਹ ਵਿਚ ਵਿਆਹ ਦੇ ਬੰਧਨ ਵਿਚ ਬੱਝਣਗੇ।