ਅੰਮਿ੍ਤਸਰ, 1 ਸਤੰਬਰ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ (ਪੀ.ਓ.ਕੇ) ਦੇ ਗਿਲਗਿਤ-ਬਾਲਟਿਸਤਾਨ 'ਚ ਸੋਮਵਾਰ ਨੂੰ ਇਕ ਹੈਲੀਕਾਪਟਰ ਹਾਦਸਾਗ੍ਰਸਤ ਹੋ ਗਿਆ | ਇਸ ਹਾਦਸੇ 'ਚ ਦੋ ਪਾਇਲਟਾਂ ਸਮੇਤ ਘੱਟੋ-ਘੱਟ 5 ਚਾਲਕ ਦਲ ਦੇ ਮੈਂਬਰ ਮਾਰੇ ਗਏ | ਪਾਕਿਸਤਾਨੀ ਫ਼ੌਜ ਦੇ ਮੀਡੀਆ ਵਿੰਗ ਇੰਟਰ-ਸਰਵਿਸਿਜ਼ ਪਬਲਿਕ ਰਿਲੇਸ਼ਨਜ਼ (ਆਈ. ਐੱਸ. ਪੀ. ਆਰ.) ਵਲੋਂ ਜਾਰੀ ਬਿਆਨ ਅਨੁਸਾਰ ਗਿਲਗਿਤ-ਬਾਲਟਿਸਤਾਨ 'ਚ ਫ਼ੌਜ ਦਾ ਹੈਲੀਕਾਪਟਰ ਤਕਨੀਕੀ ਨੁਕਸ ਦੇ ਕਾਰਨ ਠੱਕਦਾਸ ਛਾਉਣੀ ਤੋਂ ਲਗਭਗ 12 ਕਿੱਲੋਮੀਟਰ ਦੂਰ ਹੁਡੋਰ ਪਿੰਡ ਦੇ ਨੇੜੇ ਹਾਦਸਾਗ੍ਰਸਤ ਹੋ ਗਿਆ | ਹੈਲੀਕਾਪਟਰ ਨਿਯਮਤ ਸਿਖਲਾਈ ਉਡਾਣ 'ਤੇ ਸੀ ਜਦੋਂ ਇਸ 'ਚ ਤਕਨੀਕੀ ਨੁਕਸ ਪੈ ਗਿਆ | ਫ਼ੌਜ ਦੇ ਮੀਡੀਆ ਵਿੰਗ ਨੇ ਚਾਲਕ ਦਲ ਦੀ ਪਛਾਣ ਪਾਇਲਟ ਇਨ ਕਮਾਂਡ ਮੇਜਰ ਆਤਿਫ਼, ਸਹਿ-ਪਾਇਲਟ ਮੇਜਰ ਫੈਜ਼ਲ, ਫਲਾਈਟ ਇੰਜੀਨੀਅਰ ਨਾਇਬ ਸੂਬੇਦਾਰ ਮਕਬੂਲ ਅਤੇ ਹਵਾਲਦਾਰ ਜਹਾਂਗੀਰ ਅਤੇ ਨਾਇਕ ਅਮੀਰ ਵਜੋਂ ਕੀਤੀ ਹੈ |
