ਫਗਵਾੜਾ, 21 ਨਵੰਬਰ (ਹਰਜੋਤ ਸਿੰਘ ਚਾਨਾ)- ਐਫ਼.ਸੀ.ਆਈ ਦੇ ਗੁਦਾਮਾਂ 'ਚ ਪਿਛਲੇ ਦਿਨੀਂ ਚੋਰੀ ਹੋਈ 86 ਹਜ਼ਾਰ ਬੋਰੀਆਂ ਦੇ ਮਾਮਲੇ 'ਚ ਫ਼ਿਰੋਜ਼ਪੁਰ ਤੋਂ ਸੰਸਦ ਮੈਂਬਰ ਤੇ ਐਫ਼.ਸੀ.ਆਈ ਪੰਜਾਬ ਦੇ ਚੇਅਰਮੈਨ ਸ਼ੇਰ ਸਿੰਘ ਗੁਬਾਇਆ ਨੇ ਆਪਣੇ ਸਾਥੀ ਮੈਂਬਰਾਂ ਦੀ ਟੀਮ ਨਾਲ ਅੱਜ ਐਫ਼.ਸੀ.ਆਈ ਦੇ ਗੁਦਾਮਾਂ ਦਾ ਦੌਰਾ ਕੀਤਾ ਤੇ ਇਸ ਚੋਰੀ ਦੇ ਮਾਮਲੇ ਦੀ ਜਾਣਕਾਰੀ ਲਈ | ਸ. ਗੁਬਾਇਆ ਨੇ ਦੱਸਿਆ ਕਿ ਸਬੰਧਿਤ ਇੰਸਪੈਕਟਰ ਤੇ ਕੁੱਝ ਆੜ੍ਹਤੀਆਂ ਦੀ ਮਿਲੀਭੁਗਤ ਨਾਲ ਇਹ ਘਪਲਾ ਹੋਇਆ ਜਾਪਦਾ ਹੈ ਇਸ ਦਾ ਰਿਕਾਰਡ ਚੈੱਕ ਕੀਤਾ ਤੇ ਬਾਕੀ ਜਾਂਚ ਦੌਰਾਨ ਕਿਹੜੇ ਲੋਕਾਂ ਦੀ ਸ਼ਮੂਲੀਅਤ ਸ਼ਾਮਿਲ ਸੀ, ਉਨ੍ਹਾਂ ਲੋਕਾਂ ਖਿਲਾਫ਼ ਕਾਰਵਾਈ ਕਰਨ ਦੀਆਂ ਹਦਾਇਤਾਂ ਦਿੱਤੀਆਂ | ਉਨ੍ਹਾਂ ਦੱਸਿਆ ਕਿ ਉਕਤ ਇੰਸਪੈਕਟਰ ਰਾਤ ਵੇਲੇ ਲੇਬਰ ਨੂੰ ਰੋਕ ਕੇ ਗੱਡੀਆਂ 'ਚ ਮਾਲ ਪੁਆ ਕੇ ਆਲੇ ਦੁਆਲੇ ਭੇਜਦਾ ਸੀ ਜੋ ਇਸ ਵੇਲੇ ਜੇਲ੍ਹ 'ਚ ਹੈ | ਉਨ੍ਹਾਂ ਕਿਹਾ ਕਿ ਇਸ ਦੀ ਵਿਸਥਾਰ ਰਿਪੋਰਟ ਕੇਂਦਰ ਸਰਕਾਰ ਨੂੰ ਸੌਂਪੀ ਜਾਵੇਗੀ |
