ਨਵੀਂ ਦਿੱਲੀ, 31 ਦਸੰਬਰ (ਉਪਮਾ ਡਾਗਾ ਪਾਰਥ)-ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ. ਡੀ.) ਨੇ ਬੈਂਕ ਕਰਜ਼ੇ 'ਚ ਧੋਖਾਧੜੀ ਦੇ ਮਾਮਲੇ 'ਚ ਮਸ਼ਹੂਰ ਕੱਪੜਾ ਕੰਪਨੀ ਐਸ. ਕੁਮਾਰਸ ਨੈਸ਼ਨਵਾਈਡ ਲਿਮਟਿਡ ਅਤੇ ਇਸ ਦੇ ਸਾਬਕਾ ਸੀ.ਐਮ.ਡੀ. ਨਿਤਿਨ ਕਸਲੀਵਾਲ ਖ਼ਿਲਾਫ਼ ਕਾਰਵਾਈ ਕਰਦਿਆਂ ਲੰਡਨ 'ਚ ਬਕਿੰਘਮ ਪੈਲੇਸ ਦੇ ਕੋਲ ਸਥਿਤ 150 ਕਰੋੜ ਰੁਪਏ ਦੀ ਅਚੱਲ ਸੰਪਤੀ ਨੂੰ ਕੁਰਕ ਕੀਤਾ ਹੈ | ਇਹ ਕਾਰਵਾਈ ਗ਼ੈਰ ਕਾਨੂੰਨੀ ਢੰਗ ਨਾਲ ਰਕਮਾਂ ਦੇ ਲੈਣ-ਦੇਣ ਤੋਂ ਬਚਾਅ ਬਾਰੇ ਕਾਨੂੰਨ (ਪੀ.ਐਮ.ਐਲ.ਏ.) ਤਹਿਤ ਕੀਤੀ ਗਈ | ਜਾਂਚ ਏਜੰਸੀ ਮੁਤਾਬਿਕ ਇਹ ਸੰਪਤੀ ਨਿਤਿਨ ਅਤੇ ਉਸ ਦੇ ਪਰਿਵਾਰਕ ਮੈਂਬਰਾਂ ਦੀ 'ਲਾਭਕਾਰੀ ਮਲਕੀਅਤ' ਹੈ | ਨਿਤਿਨ 'ਤੇ ਭਾਰਤੀ ਬੈਂਕਾਂ ਦੇ ਇਕ ਸਮੂਹ ਦੇ ਨਾਲ ਤਕਰੀਬਨ 1400 ਕਰੋੜ ਰੁਪਏ ਦੀ ਧੋਖਾਧੜੀ ਦਾ ਦੋਸ਼ ਹੈ | ਜਾਂਚ ਮੁਤਾਬਿਕ ਐਸ. ਕੁਮਾਰਸ ਨੈਸ਼ਨਵਾਈਡ ਲਿਮਟਿਡ ਰਾਹੀਂ ਬੈਂਕਾਂ ਤੋਂ ਲਏ ਕਰਜ਼ੇ ਨੂੰ ਗ਼ਲਤ ਤਰੀਕੇ ਨਾਲ ਵਿਦੇਸੀ ਨਿਵੇਸ਼ ਦੇ ਨਾਂਅ 'ਤੇ ਭਾਰਤ ਤੋਂ ਬਾਹਰ ਭੇਜਿਆ ਗਿਆ | ਈ.ਡੀ. ਮੁਤਾਬਿਕ ਨਿਤਿਨ ਕਸਲੀਵਾਲ ਨੇ ਬੈਂਕਾਂ ਦੇ ਫੰਡ ਨੂੰ ਵਿਦੇਸ਼ੀ ਨਿਆਂ ਖੇਤਰਾਂ 'ਚ ਨਿੱਜੀ ਟਰੱਸਟਾਂ ਅਤੇ ਕੰਪਨੀਆਂ ਦੀ ਇਕ ਪੇਚੀਦਾ ਸੰਰਚਨਾ ਰਾਹੀਂ ਇਨ੍ਹਾਂ ਸੰਪਤੀਆਂ ਨੂੰ ਛੁਪਾਇਆ |
