ਖ਼ਾਲਿਦਾ ਜ਼ੀਆ ਨੂੰ ਸਰਕਾਰੀ ਸਨਮਾਨ ਨਾਲ ਅੰਤਿਮ ਵਿਦਾਇਗੀ
ਅਜੀਤ ਡੈਸਕ
01-01-2026
ਢਾਕਾ, 31 ਦਸੰਬਰ (ਪੀ. ਟੀ. ਆਈ.)-ਬੰਗਲਾਦੇਸ਼ ਦੀ ਸਾਬਕਾ ਪ੍ਰਧਾਨ ਮੰਤਰੀ ਅਤੇ ਬੀ.ਐਨ.ਪੀ. ਦੀ ਚੇਅਰਪਰਸਨ ਖਾਲਿਦਾ ਜ਼ੀਆ ਨੂੰ ਬੁੱਧਵਾਰ ਨੂੰ ਸਰਕਾਰੀ ਸਨਮਾਨ ਦੇ ਨਾਲ ਅੰਤਿਮ ਵਿਦਾਇਗੀ ਦਿੱਤੀ ਗਈ | ਖਾਲਿਦਾ ਜ਼ੀਆ ਨੂੰ ਸੰਸਦ ਭਵਨ ਦੇ ਨੇੜੇ ਉਨ੍ਹਾਂ ਦੇ ਪਤੀ ਅਤੇ ਬੰਗਲਾਦੇਸ਼ ਦੇ ਸਾਬਕਾ ਰਾਸ਼ਟਰਪਤੀ ਜ਼ੀਆਓਰ ਰਹਿਮਾਨ ਦੀ ਕਬਰ ਨੇੜੇ ਸਪੁਰਦ-ਏ-ਖ਼ਾਕ ਕੀਤਾ ਗਿਆ | ਉਨ੍ਹਾਂ ਦੇ ਜਨਾਜ਼ੇ 'ਚ ਸ਼ਾਮਿਲ ਹੋ ਕੇ ਦੇਸ਼ ਭਰ 'ਚੋਂ ਪੁੱਜੇ ਲੱਖਾਂ ਲੋਕਾਂ ਨੇ ਆਪਣੀ ਮਰਹੂਮ ਆਗੂ ਨੂੰ ਭਾਵੁਕ ਵਿਦਾਈ ਦਿੱਤੀ | ਅੰਤਿਮ ਰਸਮਾਂ 'ਚ ਭਾਰਤ ਦੇ ਵਿਦੇਸ਼ ਮੰਤਰੀ ਐਸ.ਜੈਸ਼ੰਕਰ ਅਤੇ ਪਾਕਿਸਤਾਨ, ਨਿਪਾਲ ਅਤੇ ਹੋਰ ਗੁਆਂਢੀ ਦੇਸ਼ਾਂ ਦੇ ਪ੍ਰਤੀਨਿਧਾਂ ਨੇ ਵੀ ਸ਼ਾਮਿਲ ਹੋ ਕੇ ਸ਼ਰਧਾਂਜਲੀ ਭੇਟ ਕੀਤੀ | ਖਾਲਿਦਾ ਜ਼ੀਆ ਦੇ ਰਾਸ਼ਟਰੀ ਝੰਡੇ 'ਚ ਲਪੇਟੇ ਹੋਏ ਤਾਬੂਤ ਨੂੰ ਉਨ੍ਹਾਂ ਦੇ ਨਿਵਾਸ ਸਥਾਨ ਤੋਂ ਇਕ ਕਾਫ਼ਲੇ 'ਚ ਅੰਤਿਮ ਰਸਮਾਂ ਵਾਲੇ ਸਥਾਨ 'ਤੇ ਲਿਆਂਦਾ ਗਿਆ | ਲੱਖਾਂ ਲੋਕ ਆਪਣੀ ਮਰਹੂਮ ਨੇਤਾ ਦੀ ਆਖ਼ਰੀ ਝਲਕ ਪਾਉਣ ਲਈ ਸੰਸਦ ਕੰਪਲੈਕਸ ਦੇ ਬਾਹਰ ਇਕੱਠੇ ਹੋਏ ਸਨ | ਬੰਗਲਾਦੇਸ਼ ਦੀ ਅੰਤਰਿਮ ਸਰਕਾਰ ਦੇ ਮੁੱਖ ਸਲਾਹਕਾਰ ਮੁਹੰਮਦ ਯੂਨਸ, ਚੀਫ਼ ਜਸਟਿਸ ਜ਼ੁਬੇਰ ਰਹਿਮਾਨ ਚੌਧਰੀ, ਖਾਲਿਦਾ ਜ਼ੀਆ ਦਾ ਪੁੱਤਰ ਅਤੇ ਬੀ.ਐਨ.ਪੀ ਦਾ ਕਾਰਜਕਾਰੀ ਚੇਅਰਮੈਨ ਤਾਰਿਕ ਰਹਿਮਾਨ, ਵੱਖ-ਵੱਖ ਪਾਰਟੀਆਂ ਦੇ ਆਗੂ ਅਤੇ ਸੀਨੀਅਰ ਸਰਕਾਰੀ ਅਤੇ ਫ਼ੌਜੀ ਅਧਿਕਾਰੀ ਜਨਾਜ਼ੇ ਦੀ ਨਮਾਜ਼ 'ਚ ਸ਼ਾਮਿਲ ਹੋਏ | ਬੰਗਲਾਦੇਸ਼ ਦੀ ਪਹਿਲੀ ਮਹਿਲਾ ਪ੍ਰਧਾਨ ਮੰਤਰੀ ਖਾਲਿਦਾ ਜ਼ੀਆ ਦਾ ਮੰਗਲਵਾਰ ਨੂੰ ਲੰਮੀ ਬਿਮਾਰੀ ਦੇ ਬਾਅਦ ਦਿਹਾਂਤ ਹੋ ਗਿਆ ਸੀ |
