ਨਵੇਂ ਸਾਲ ਦੇ ਜਸ਼ਨ ਦੌਰਾਨ ਸਵਿਟਜ਼ਰਲੈਂਡ ਦੇ ਬਾਰ 'ਚ ਲੱਗੀ ਅੱਗ-40 ਮੌਤਾਂ

115 ਤੋਂ ਵੱਧ ਜ਼ਖ਼ਮੀ
ਕ੍ਰਾਂਸ-ਮੋਂਟਾਨਾ (ਸਵਿਟਜ਼ਰਲੈਂਡ), 1 ਜਨਵਰੀ (ਏ.ਪੀ.)-ਨਵੇਂ ਸਾਲ ਦੇ ਜਸ਼ਨ ਦੌਰਾਨ ਸਵਿਸ ਐਲਪਸ ਰਿਜ਼ੋਰਟ ਕਸਬੇ ਵਿਚ ਇੱਕ ਬਾਰ ਵਿਚ ਅੱਗ ਲੱਗਣ ਤੋਂ ਬਾਅਦ 40 ਲੋਕਾਂ ਦੀ ਮੌਤ ਹੋ ਗਈ ਤੇ 115 ਤੋਂ ਵੱਧ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਦੀ ਹਾਲਤ ਗੰਭੀਰ ਹੈ | ਵੈਲੇਸ ਕੈਂਟਨ ਦੇ ਪੁਲਿਸ ਕਮਾਂਡਰ ਫਰੈਡਰਿਕ ਗਿਸਲਰ ਨੇ ਇੱਕ ਨਿਊਜ਼ ਕਾਨਫਰੰਸ ਦੌਰਾਨ ਕਿਹਾ ਕਿ ਲੇ ਕੌਂਸਟੇਲੇਸ਼ਨ ਵਿਚ ਬਾਰ ਵਿਚ ਕਈ ਦਰਜਨਾਂ ਲੋਕ ਮਾਰੇ ਗਏ | ਪੀੜਤਾਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਸੂਚਿਤ ਕਰਨ ਲਈ ਕੰਮ ਚੱਲ ਰਿਹਾ ਹੈ | ਵੈਲੇਸ ਕੈਂਟਨ ਦੇ ਅਟਾਰਨੀ ਜਨਰਲ ਬੀਟਰਿਸ ਪਿਲੌਡ ਨੇ ਕਿਹਾ ਕਿ ਅੱਗ ਲੱਗਣ ਦੇ ਕਾਰਨਾਂ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ | ਕ੍ਰਾਂਸ-ਮੋਂਟਾਨਾ ਸ਼ਹਿਰ ਨੂੰ ਨੋ-ਫਲਾਈ ਜ਼ੋਨ ਐਲਾਨ ਦਿੱਤਾ ਗਿਆ ਹੈ | ਪੁਲਿਸ ਅਤੇ ਐਮਰਜੈਂਸੀ ਟੀਮਾਂ ਮੌਕੇ 'ਤੇ ਪਹੁੰਚ ਕੇ ਬਚਾਅ ਕਾਰਜਾਂ ਵਿਚ ਲੱਗ ਗਈਆਂ ਸਨ | ਜ਼ਖ਼ਮੀਆਂ ਨੂੰ ਹਸਪਤਾਲਾਂ ਵਿਚ ਦਾਖਲ ਕਰਵਾਇਆ ਗਿਆ | ਖੇਤਰੀ ਸਰਕਾਰ ਦੇ ਮੁਖੀ ਮੈਥਿਆਸ ਰੇਨਾਰਡ ਨੇ ਕਿਹਾ ਕਿ ਇਸ ਸ਼ਾਮ ਨੂੰ ਜਸ਼ਨ ਅਤੇ ਏਕਤਾ ਦਾ ਪਲ ਹੋਣਾ ਚਾਹੀਦਾ ਸੀ, ਪਰ ਇਹ ਇੱਕ ਬੁਰੇ ਸੁਪਨੇ ਵਿਚ ਬਦਲ ਗਿਆ | ਰੇਨਾਰਡ ਨੇ ਕਿਹਾ ਕਿ ਜ਼ਖ਼ਮੀਆਂ ਦੀ ਗਿਣਤੀ ਇੰਨੀ ਜ਼ਿਆਦਾ ਸੀ ਕਿ ਖੇਤਰੀ ਹਸਪਤਾਲ ਦੇ ਇੰਟੈਂਸਿਵ ਕੇਅਰ ਯੂਨਿਟ ਅਤੇ ਓਪਰੇਟਿੰਗ ਥੀਏਟਰ ਜਲਦੀ ਭਰ ਗਏ | ਅਧਿਕਾਰੀਆਂ ਨੇ ਕਿਹਾ ਕਿ ਪੀੜਤਾਂ ਦੀ ਮਦਦ ਲਈ ਹੈਲੀਕਾਪਟਰ ਅਤੇ ਐਂਬੂਲੈਂਸਾਂ ਮੌਕੇ 'ਤੇ ਪਹੁੰਚੀਆਂ, ਜਿਨ੍ਹਾਂ ਵਿੱਚੋਂ ਕੁਝ ਵੱਖ-ਵੱਖ ਦੇਸ਼ਾਂ ਦੇ ਸਨ | ਸਵਿਸ ਰਾਸ਼ਟਰਪਤੀ ਗਾਈ ਪਾਰਮੇਲਿਨ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿਚ ਕਿਹਾ ਕਿ ਸਰਕਾਰ ਪੀੜਤਾਂ, ਜ਼ਖ਼ਮੀਆਂ ਅਤੇ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਨਾਲ ਹੈ, ਜਿਨ੍ਹਾਂ ਪ੍ਰਤੀ ਉਹ ਆਪਣੀ ਦਿਲੀ ਸੰਵੇਦਨਾ ਪ੍ਰਗਟ ਕਰਦੀ ਹੈ | ਵੀਰਵਾਰ ਪਾਰਮੇਲਿਨ ਦਾ ਦਫ਼ਤਰ ਵਿਚ ਪਹਿਲਾ ਦਿਨ ਸੀ, ਕਿਉਂਕਿ ਸਵਿਟਜ਼ਰਲੈਂਡ ਦੀ ਸਰਕਾਰ ਦੇ ਸੱਤ ਮੈਂਬਰ ਵਾਰੀ-ਵਾਰੀ ਇੱਕ ਸਾਲ ਲਈ ਰਾਸ਼ਟਰਪਤੀ ਅਹੁਦੇ 'ਤੇ ਬੈਠੇ ਹਨ | ਸਵਿਸ ਬਰਾਡਕਾਸਟਰ ਐਸ.ਆਰ.ਐਫ. ਤੇ ਆਰ. ਟੀ. ਐਸ. ਨੇ ਰਿਪੋਰਟ ਦਿੱਤੀ ਕਿ ਪੀੜਤਾਂ ਦੇ ਪਰਿਵਾਰਾਂ ਦੇ ਸਤਿਕਾਰ ਵਿਚ, ਉਸ ਨੇ ਵੀਰਵਾਰ ਦੁਪਹਿਰ ਨੂੰ ਰਾਸ਼ਟਰ ਨੂੰ ਰਵਾਇਤੀ ਨਵੇਂ ਸਾਲ ਦੇ ਸੰਬੋਧਨ ਨੂੰ ਮੁਲਤਵੀ ਕਰ ਦਿੱਤਾ | ਇੱਕ ਚਸ਼ਮਦੀਦ ਗਵਾਹ ਜਿਸ ਨੇ ਇਕ ਚੈਨਲ ਨਾਲ ਗੱਲ ਕਰਦਿਆਂ ਦੱਸਿਆ ਕਿ ਲੋਕ ਅੱਗ ਤੋਂ ਬਚਣ ਲਈ ਖਿੜਕੀਆਂ ਤੋੜ ਰਹੇ ਸਨ, ਕੁਝ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਏ ਸਨ, ਅਤੇ ਘਬਰਾਏ ਹੋਏ ਮਾਪੇ ਕਾਰਾਂ ਵਿੱਚ ਘਟਨਾ ਸਥਾਨ 'ਤੇ ਭੱਜ ਰਹੇ ਸਨ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਕੀ ਉਨ੍ਹਾਂ ਦੇ ਬੱਚੇ ਅੰਦਰ ਫਸੇ ਹੋਏ ਹਨ | ਨੌਜਵਾਨ ਨੇ ਕਿਹਾ ਕਿ ਉਸਨੇ ਲਗਭਗ 20 ਲੋਕਾਂ ਨੂੰ ਧੂੰਏਾ ਅਤੇ ਅੱਗ ਦੀਆਂ ਲਪਟਾਂ ਵਿਚੋਂ ਬਾਹਰ ਨਿਕਲਣ ਲਈ ਭੱਜਦੇ ਦੇਖਿਆ ਅਤੇ ਜੋ ਕੁਝ ਉਸ ਨੇ ਦੇਖਿਆ ਉਸ ਦੀ ਤੁਲਨਾ ਇੱਕ ਡਰਾਉਣੀ ਫਿਲਮ ਨਾਲ ਕੀਤੀ ਜਦੋਂ ਉਹ ਸੜਕ ਦੇ ਪਾਰ ਤੋਂ ਦੇਖ ਰਿਹਾ ਸੀ | ਹਾਦਸੇ ਵਾਲੀ ਥਾਂ, ਕ੍ਰਾਂਸ ਮੋਂਟਾਨਾ, ਇੰਟਰਲੇਕਨ ਤੋਂ ਲਗਭਗ 100 ਕਿਲੋਮੀਟਰ ਦੂਰ ਹੈ, ਜੋ ਕਿ ਸਾਹਸੀ ਖੇਡਾਂ ਲਈ ਮਸ਼ਹੂਰ ਇਕ ਸੈਰ-ਸਪਾਟਾ ਸਥਾਨ ਹੈ | ਦੁਨੀਆ ਭਰ ਤੋਂ ਲੋਕ ਪੈਰਾਗਲਾਈਡਿੰਗ, ਸਕੀਇੰਗ ਅਤੇ ਟ੍ਰੈਕਿੰਗ ਲਈ ਉੱਥੇ ਆਉਂਦੇ ਹਨ | ਇੰਟਰਲੇਕਨ, ਝੀਲ ਥੂਨ ਅਤੇ ਝੀਲ ਬ੍ਰਾਇਨਜ਼ ਦੇ ਵਿਚਕਾਰ ਸਥਿਤ, ਐਲਪਸ ਦੇ ਆਈਗਰ, ਮੋਂਚ ਅਤੇ ਜੰਗਫ੍ਰਾਉ ਪਹਾੜਾਂ ਤੱਕ ਆਸਾਨ ਪਹੁੰਚ ਪ੍ਰਦਾਨ ਕਰਦਾ ਹੈ |