ਅਫ਼ਗਾਨਿਸਤਾਨ 'ਚ ਪਾਕਿ ਵਲੋਂ ਗੋਲਾਬਾਰੀ 'ਚ ਮਾਰੇ ਗਏ ਸਨ 13 ਬੱਚੇ

ਸੰਯੁਕਤ ਰਾਸ਼ਟਰ ਨੇ ਸਚਾਈ ਦਾ ਕੀਤਾ ਪਰਦਾਫ਼ਾਸ਼
ਅੰਮਿ੍ਤਸਰ, 24 ਫਰਵਰੀ (ਸੁਰਿੰਦਰ ਕੋਛੜ)-ਅਫ਼ਗਾਨਿਸਤਾਨ 'ਚ ਸੰਯੁਕਤ ਰਾਸ਼ਟਰ ਸਹਾਇਤਾ ਮਿਸ਼ਨ (ਯੂ. ਐੱਨ. ਏ. ਐੱਮ. ਏ.) ਨੇ ਪੁਸ਼ਟੀ ਕੀਤੀ ਹੈ ਕਿ ਨੰਗਰਹਾਰ ਤੇ ਪਕਤਿਕਾ ਪ੍ਰਾਂਤਾਂ 'ਚ ਪਾਕਿਸਤਾਨੀ ਫ਼ੌਜਾਂ ਦੁਆਰਾ ਕੀਤੇ ਗਏ ਹਵਾਈ ਹਮਲਿਆਂ ਵਿਚ ਔਰਤਾਂ ਅਤੇ ਬੱਚਿਆਂ ਸਮੇਤ 13 ਨਿਰਦੋਸ਼ ਨਾਗਰਿਕ ਮਾਰੇ ਗਏ | ਅਫ਼ਗਾਨ ਮੀਡੀਆ ਨੇ ਅੱਜ ਯੂ. ਐੱਨ. ਏ. ਐੱਮ. ਏ. ਦੇ ਹਵਾਲੇ ਨਾਲ ਉਕਤ ਰਿਪੋਰਟ ਦਾ ਹਵਾਲਾ ਦਿੱਤਾ, ਜਿਸ 'ਚ ਖ਼ੁਲਾਸਾ ਕੀਤਾ ਗਿਆ ਹੈ ਕਿ ਹਾਲ ਹੀ 'ਚ ਹੋਏ ਹਵਾਈ ਹਮਲਿਆਂ 'ਚ ਜਿਨ੍ਹਾਂ 13 ਅਫ਼ਗਾਨ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ, ਉਨ੍ਹਾਂ 'ਚ 4 ਲੜਕੇ, 3 ਲੜਕੀਆਂ ਅਤੇ ਇਕ ਮਾਸੂਮ ਬੱਚਾ ਹੈ ਅਤੇ 7 ਬੱਚੇ ਜ਼ਖ਼ਮੀ ਵੀ ਹੋਏ ਹਨ | ਇਹ ਹਮਲੇ ਨੰਗਰਹਾਰ ਸੂਬੇ ਦੇ ਬੇਹਸੂਦ ਅਤੇ ਖੋਗਿਆਨੀ ਜ਼ਿਲਿ੍ਹਆਂ 'ਚ ਹੋਏ | ਮਿਸ਼ਨ ਦੀ ਰਿਪੋਰਟ ਮੁਤਾਬਿਕ ਪਕਤਿਕਾ ਦੇ ਬਰਮਲ 'ਚ ਇਕ ਬੱਚਿਆਂ ਦੇ ਸਕੂਲ ਅਤੇ ਇਕ ਮਸਜਿਦ ਨੂੰ ਨਿਸ਼ਾਨਾ ਬਣਾਇਆ ਗਿਆ, ਜਦੋਂ ਕਿ ਓਰਗੁਨ ਜ਼ਿਲ੍ਹੇ ਵਿਚ ਇਕ ਘਰ 'ਤੇ ਹਵਾਈ ਹਮਲਾ ਹੋਇਆ | ਯੂ. ਐੱਨ. ਏ. ਐੱਮ. ਏ. ਨੇ ਪਾਕਿਸਤਾਨੀ ਹਵਾਈ ਹਮਲਿਆਂ ਦੀ ਨਿੰਦਾ ਕਰਦਿਆਂ ਸਾਰੀਆਂ ਧਿਰਾਂ ਨੂੰ ਕੌਮਾਂਤਰੀ ਮਾਨਵਤਾਵਾਦੀ ਕਾਨੂੰਨ ਦੀ ਪਾਲਣਾ ਕਰਨ ਅਤੇ ਨਾਗਰਿਕਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਦੀ ਅਪੀਲ ਕੀਤੀ | ਅਫ਼ਗਾਨਿਸਤਾਨ ਦੇ ਰਾਸ਼ਟਰੀ ਸੁਰੱਖਿਆ ਮੰਤਰਾਲੇ ਨੇ ਵੀ ਪਾਕਿਸਤਾਨੀ ਫ਼ੌਜੀ ਸ਼ਾਸਨ 'ਤੇ ਨੰਗਰਹਾਰ ਅਤੇ ਪਕਤਿਕਾ ਸੂਬਿਆਂ ਦੇ ਵੱਖ-ਵੱਖ ਰਿਹਾਇਸ਼ੀ ਇਲਾਕਿਆਂ 'ਤੇ ਘਾਤਕ ਹਵਾਈ ਹਮਲੇ ਕਰਨ ਦਾ ਦੋਸ਼ ਲਗਾਇਆ, ਜਿਸ ਦੇ ਨਤੀਜੇ ਵਜੋਂ ਕਈ ਨਾਗਰਿਕ ਮਾਰੇ ਗਏ |